ដោយ:សុខុម
ភ្នំពេញ:សមត្ថកិច្ចតាមឃាត់ខ្លួនបានតារាល្បីតាមtik tok ម្នាក់បើករថយន្តទំនើបម៉ាកLamborghiniបុកម៉ូតូបណ្ដាលឱ្យបុរសម្នាក់បែកក្បាលស្លាប់នៅលើដងផ្លូវ។
ហេតុការណ៍ដ៏រន្ធត់នេះបានកើតឡើងនៅយប់រំលងអធ្រាត្រឈានចូលថ្ងៃទី ២៣ ខែកុម្ភៈ ឆ្នាំ២០២៤ តាមបណ្តោយផ្លូវសហព័ន្ធរុស្ស៊ី ចំណុចមុខធនាគារអេស៊ីលីដា ស្ថិតក្នុងសង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។
សមត្ថកិច្ចបាននិយាយឲ្យដឹងថា រថយន្តបង្កបានបុកម៉ូតូពីក្រោយមនុស្សផ្លោងដល់ទៅ៦០ម៉ែត្រនិងម៉ូតូអូសចម្ងាយជាង ១០០ម៉ែត្រទើបរបូតចេញពីរថយន្ត។
បន្ទាប់មកតៃកុងព្យាយាមបើករថយន្តគេចចេញពីកន្លែងកើតហេតុមិនទទួលខុសត្រូវឡើយ។ប៉ុន្តែ ពេលនោះប្រជាពលរដ្ឋនិងកម្លាំងសមត្ថកិច្ចខណ្ឌពោធិសែនជ័យសហការជាមួយកម្លាំងសមត្ថកិច្ចខណ្ឌមានជ័យ ដេញតាមរហូតដល់មុខរោងចក្រមួយកន្លែង តាមបណ្តោយផ្លូវបេតុងប្រឡាយលូ ស្ថិតក្នុងសង្កាត់ស្ទឹងមានជ័យទី ៣ ខណ្ឌមានជ័យ។
ពេលសមត្ថកិច្ចទៅដល់ឃើញមានរថយន្តស៊េរីទំនើបម៉ាកBMWមួយគ្រឿងពាក់ផ្លាកលេខកម្ពុជា MR-TOMI មកដឹកអ្នកបើកបររថយន្តបង្កនិងបក្ខពួកពីរនាក់ទៀតរួមដំណើរបម្រុងជម្លៀសចេញ តែត្រូវកម្លាំងសមត្ថកិច្ចឃាត់ខ្លួនបាន។
សមត្ថកិច្ចបានបញ្ជាក់ថា សពជនរងគ្រោះឈ្មោះ សោន សឺត អាយុ ២៨ ឆ្នាំ មានទីលំនៅបច្ចុប្បន្នភូមិគោកក្រោល ឃុំគោកដូង ស្រុកអង្គរជុំ ខេត្តសៀមរាប។
ដោយឡែកតារា tik tokជាក្រុមជនជាតិចិនចំនួន៣នាក់រួមទាំងម៉ូតូជនរងគ្រោះនិងរថយន្តបង្កយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញធ្វើការដោះស្រាយតាមផ្លូវច្បាប់៕
