ប្រែសម្រួល៖ ស-សម្បត្តិ
ស្ត្រីជាអ្នកដំណើរម្នាក់នៅលើនាវទេសចរណ៍ Cruise Line របស់ប្រទេសន័រវេសបានដាក់ពាក្យបណ្តឹងចោទប្រកាន់ មេសន្តិសុខបម្រើការនៅលើនាវាថា បានចាប់រំលោភនាងនៅក្នុងអំឡុងពេលធ្វើដំណើរកម្សាន្តក្នងថ្ងៃខួបកំណើត។
![](https://cambodiaflashnews.com/wp-content/uploads/2021/06/top-banner.gif)
ស្ត្រីម្នាក់មកពីរដ្ឋកាលីហ្វ័រញ៉ា សហរដ្ឋអាមេរិក ដែលត្រូវបានកំណត់អត្តសញ្ញាណនៅក្នុងឯកសារតុលាការដែលទទួលបានដោយសារព័ត៌មាន ប៉ុស្តិ៍ ឈ្មោះ Jane Doe បាននិយាយថានាងកំពុងប្រារព្ធខួបកំណើតគម្រប់អាយុ ៣៣ ឆ្នាំរបស់នាងនៅក្នុងកម្មវិធី Summer Cruise Fest នៅលើនាវាទេសចរណ៏ Norwegian Sky នៅក្នុងឆ្នាំ ២០២៣ ។
នាងបានចូលរួមការសម្តែងដោយ Young Jeezy ហើយបន្ទាប់មកបានចូលរួមក្នុងកម្មវិធីកំប្លែង Hip-Hop នៅម៉ោងប្រហែល ៩:៣០ យប់ នៅថ្ងៃទី ៣ ខែកក្កដា។
ពាក្យបណ្តឹងបញ្ជាក់ថា ស្ត្រីរូបនេះបាននិយាយថានាងបានផឹកស្រាជោកជាំពេញពោះ ។នៅពេលដែលនាងត្រឡប់ទៅកាប៊ីនរបស់នាងវិញ ស្ត្រីនោះ “ត្រូវបានសន្តិសុខម្នាក់ឈ្មោះ John Roe ចូលទៅជិត ហើយក៏បានសួរថាតើនាងត្រូវការឲ្យគាត់ជួយគ្រាហ៍នាងទៅបន្ទប់ទេ”? នាងក៏បានតបទៅបុរសឈ្នោះ Roe ដែលជាសន្តិសុខការពារសុវត្ថិភាពនៅលើនាវានោះថានាងស្រវឹងស្រាឡើងវង្វេងវង្វាន់អស់ហើយ នៅក្នុងពេលនោះដែរគាត់ក៏បានគ្រាហ៍នាងទៅកាន់កាប៊ីនមួយផ្សេងទៀត គឺជាកន្លែងដែលគាត់បានប៉ះពាល់និងចាប់រំលោភលើរូបរាងកាយរបស់នាង។
ពាក្យបណ្តឹងបាននិយាយថា ជនរងគ្រោះបាន “ព្យាយាមរើបំរះចេញពីកណ្តាប់ដៃជនល្មើស John Roe ប៉ុន្តែជនល្មើស John Roe បានប្រើកម្លាំងចាប់នាងជាប់” មិនឲ្យនាងរត់ចេញបានឡើយ។
ក្រោយពេលកើតហេតុ ស្ត្រីរងគ្រោះបានដើរឆ្លងមកកាន់កាប៊ីនរបស់នាងដោយមានអ្នកយាមម្នាក់ទៀត នាំនាងទៅកាន់ទីនោះ ។
បើយោងទៅតាមពាក្យបណ្តឹង នៅថ្ងៃបន្ទាប់នាងបានរាយការណ៏ទៅអាជ្ញាធរគ្រប់គ្រងនាវា Norwegian Sky ហើយបានដាក់ពាក្យប្តឹងចោទប្រកាន់ជនល្មើស John Roe ពីបទរំលោភផ្លូវភេទ។
នៅពេលដែលនាវាទេសចរណ៏បានត្រឡប់ទៅ Miami វិញ នាងបានទូរសព្ទទៅប៉ូលិស។
ស្ត្រីរូបនេះបាននិយាយថាក្រោយមកនាងបានទៅមន្ទីរពេទ្យ Highland ក្នុងទីក្រុង Oakland រដ្ឋ California ដើម្បីពិនិត្យនិងព្យាបាល។
ខ្លឹមសារនៅក្នុងពាក្យបណ្តឹងនេះបានបំភ្លឺថានាង “បានទទួលការប្រឹក្សាផ្លូវចិត្តនិងការព្យាបាលផ្លូវភេទសម្រាប់ជំងឺបាក់ទឹកចិត្តនិងការធុញថប់ព្រួយបារម្ភដែលបណ្តាលមកពីការចាប់រំលោភបំពានដែលនាងបានរងគ្រោះ” ដោយបានបន្ថែមថានាង “បន្តទទួលរងការវាយប្រហារបំភិតបំភ័យយ៉ាងស្រួចស្រាវនិងមានការធុញថប់អារម្ភដោយសារជំងឺបាក់ទឹកចិត្តយ៉ាងធ្ងន់ធ្ងរពីការចាប់រំលោភផ្លូវភេទ” ។
អង្គភាព ផ្តល់សេវាគាំពារហៅថា ( Almighty Protection Services) ដែលត្រូវបានចុះកិច្ចសន្យាបន្តដោយ NCL បានដឹងអំពីឧបទ្ទវហេតុនេះនៅថ្ងៃទី ៥ ខែកក្កដា ប៉ុន្តែនៅមិនទាន់បានចាត់វិធានការអ្វីនៅឡើយទេ នេះបើយោងតាមពាក្យបណ្តឹងដែលត្រូវបានដាក់នៅតុលាការសហព័ន្ធ Florida សហរដ្ឋអាមេរិកកាលពីថ្ងៃទី ៣១ ខែតុលាឆ្នាំ២០២៣កន្លងទៅ។
មានអ្នកដែលជាប់ពាក់ព័ន្ធដែលមានបង្ហាញឈ្មោះនៅក្នុងពាក្យបណ្ដឹងពីបទធ្វេសប្រហែសផងដែរគឺ Khaled Mohammed Khaled ជាតារារ៉េបដែលគេស្គាល់ថាគាត់ជា DJ Khaled មានអាយុ ៤៨ ឆ្នាំដែលត្រូវបានចុះបញ្ជីជាអ្នក “ផ្សាយពាណិជ្ជកម្មសប្បាយនិងកម្សាន្ត” នៅក្នុងពេលជិះទូកកម្សាន្ត។
មេធាវីរបស់ Khaled Mohammed Khaled បានដាក់សំណើជាច្រើនដងដើម្បីច្រានចោលសំណុំរឿងចោទប្រកាន់លើរូបគាត់ “ព្រោះវាមិនមានភ័ស្តុតាងដែលបានបញ្ជាក់ដូចការអះអាងដែលអាចជឿជាក់បានប្រឆាំងនឹងលោក Khaled និងអង្គហេតុទាក់ទងនឹងសកម្មភាពរបស់គាត់ឃើញថាមិនត្រឹមត្រូវនោះទេ” នេះបើយោងប្រភពពីមន្រ្តីតុលាការ។
មេធាវីរបស់ NCL ក៏បានដាក់សំណើសុំច្រានចោលករណីនេះផងដែរ ដោយបានហៅការចោទប្រកាន់នេះថាជា “ការភ្ជង់កាំភ្លើងលើកូនក្តីរបស់គាត់” ដែលមានន័យថា ពួកគេមានភាពមិនច្បាស់លាស់ក្នុងការសន្និដ្ឋាន ឬមិនមានខ្លឹមសារត្រឹមត្រូវស្របតាមគតិយុត្តដែលមានស្ថានទម្ងន់ក្នុងការដាក់បន្ទុកលើការចោទប្រកាន់ឲ្យបានត្រឹមត្រូវតាមច្បាប់នោះទេ។
ស្ត្រីរូបនេះកំពុងស្វែងរកការជំរះក្តីពីគណៈវិនិច្ឆ័យដោយទាទារជំងឺចិត្តចំពោះការខូចខាតជាទឹកប្រាក់ចំនួន ៧៥,០០០ ដុល្លារ និងកំណត់ទោសទណ្ឌស្របតាមបទចោទប្រកាន់លើចុងចោទថា “មានការធ្វេសប្រហែស និងមានចេតនា កៀបសង្កត់ និងតាមព្យាបាទយ៉ាងធ្ងន់ធ្ងរបំផុត”។
តំណាងក្រុមហ៊ុននាវាទេសចរណ៍ សេវាការពារ និង DJ Khaled មិនបានឆ្លើយតបភ្លាមៗចំពោះសំណើសុំការធ្វើអត្ថាធិប្បាយពីសារព័ត៌មានប៉ុស្តិ៍នោះទេ៕