ដោយ : បន្ទុាយ
បន្ទាយមានជ័យ :មន្ត្រីនិងអ្នកពាក់ព័ន្ធបន្តចុះផ្សព្វផ្សាយពីផលប៉ះពាល់នៃ គ្រឿងញៀននិងផ្សព្វផ្សាយពីច្បាប់ចរាចរណ៍ដល់សិស្សានុសិស្សតាម សាលាអនុវិទ្យាល័យ វិទ្យាល័យខ្លះនៅក្រុងសិរីសោភ័ណ។ នេះបើតាមក្រុមការងារឲ្យដឹងកាលពីថ្ងៃទី១៧ខែកុម្ភ: ឆ្នាំ២០២៤ ។
កម្មវិធីធ្វើនៅសាលាវិទ្យាល័យសិរីសោភ័ណមានរួមជាមួយលោកឈូ ប៊ុនរឿង ប្រធានមន្ទីរអប់រំ យុវជននិងកីឡាខេត្ត លោកស្រេង សុផល អភិបាល ក្រុងសិរីសោភ័ណនិងមន្ត្រី អ្នកពាក់ព័ន្ធ។
លោកឈួ ប៊ូនរឿង អោយដឹងថា : ក្រសួងអប់រំ យុវជន និងកីឡាបានសហការជាមួយអគ្គលេខាធិការដ្ឋានអាជ្ញាជាតិប្រយុទ្ធប្រឆាំងគ្រឿងញៀន អាជ្ញាធរជាតិប្រយុទ្ធនឹងជំងឺអេដស៍ មេរោគអេដស៍ គណៈកម្មាធិការត្រួតពិនិត្យគ្រឿងញៀនខេត្ត និងដៃគូពាក់ព័ន្ធតែងបានស្តីពីការបង្ការទប់ស្កាត់ការប្រើប្រាស់បារីអេឡិចត្រូនិក គ្រឿងញៀនខុសច្បាប់ ជំងឺអេដស៍ មេរោគអេដស៍ និងគ្រោះថ្នាក់ចរាចរណ៍ ក្នុងទិសដៅលើកកម្ពស់សុខភាពសិក្សាដើម្បីធានាគុណភាពនិងសុវត្ថិភាពធនធានមនុស្ស។
ការថែទាំយុវជនឱ្យមានសុខភាពល្អរឹងមាំជាការងារសំខាន់ចាំបាច់ដែលត្រូវតែរួមគ្នាគិត រួមគ្នាធ្វើ ពិសេសការផ្សព្វផ្សាយពីបញ្ហាគ្រឿងញៀនដើម្បីពួកគាត់បានយល់ដឹង និងចូលរួមក្នុងសកម្មភាពប្រយុទ្ធប្រឆាំងគ្រឿងញៀន។
លោកអធិការរងទទួលជំនាញ លោកអធិការ លោកអភិបាលក្រុងបានលើកឡើងថា : ក្នុងចំណោមវិធានការទាំង៥នៃការទប់ស្កាត់គ្រឿងញៀន គឺថា ការអប់រំផ្សព្វផ្សាយ ផលប៉ះពាលគ្រឿងញៀនដល់មនុស្សគ្រប់រូបគឺជាកត្តា សំខាន់ ។
មូលហេតុគឺថាប្រសិនបើវិធានការបង្ក្រាបគឺមិនអស់នោះឡើយ ព្រោះ មានអ្នកជក់នៅតែមាន ហើយអ្នកចែកចាយនៅតែបន្តសកម្មភាព ។ ផ្ទុយពីនេះ បើមនុស្សគ្រប់រូប យល់ដឹងពីផលប៉ះពាល់ហើយផ្សព្វផ្សាយ អប់រំគ្នាបន្ត មនុស្សខ្លាច និងមិន លង់ខ្លួនក្នុងការប្រើប្រាស់គ្រឿងញៀនឡើយ ។
ជាមួយគ្នានោះ មន្ត្រីក៏លើកឡើងពីការសូមចូលរួមអនុវត្តន៍ឱ្យបានខ្ជាប់ខ្ជួននូវវិធានការនានាដែលបានចែងក្នុងច្បាប់ស្តីពីចរាចរណ៍ផ្លូវគោក ដូចជាមិនត្រូវបើកបរលើសល្បឿនកំណត់ គោរពសិទ្ធិអាទិភាព ផ្លាកសញ្ញាចរាចរណ៍ ប្រកាន់ស្ដាំ មិនវ៉ាជែងក្នុងស្ថានភាពគ្រោះថ្នាក់។
ហើយបើស្រវឹងសូមកុំបើកបរ ដើម្បីរួមគ្នាកាត់បន្ថយគ្រោះថ្នាក់ចរាចរណ៍ កាត់បន្ថយចំនួនអ្នកស្លាប់ អ្នករងរបួស អ្នកពិការ និងការខូចខាតនានា ដែលបង្កដោយសារគ្រោះថ្នាក់ចរាចរណ៍។
ពោលគឺសុវត្ថិភាពចរាចរណ៍គឺជាផ្នែកមួយយ៉ាងសំខាន់នៃសុខភាពសាធារណៈ ជាការងារចម្បងដែលទាមទារឱ្យមានការដោះស្រាយជាបន្ទាន់។
បំណងនៃការអប់រំផ្សព្វផ្សាយច្បាប់ស្តីពីចរាចរណ៍ផ្លូវគោកនាពេលនេះ រៀបចំឡើងក្នុងគោលបំណងដើម្បីជាការពញ្ញាក់ស្មារតីដល់អ្នកប្រើប្រាស់ផ្លូវទាំងអស់ ជាពិសេសអ្នកប្រើប្រាស់ទោចក្រយានយន្ត ឱ្យយកចិត្តទុកដាក់ និងចូលរួមគោរពច្បាប់ស្តីពីចរាចរណ៍ផ្លូវគោក ៕