ដោយ : បន្ទាយ
បន្ទាយមានជ័យ ៖កម្លាំងកងរាជអាវុធហត្ថក្រុងប៉ោយប៉ែត ឃាត់ខ្លួនក្មេងទំនើងប្រុស.ស្រី៤០នាក់ យកមកអប់រំចំនួន៣២នាក់ ។ឯ៨នាក់ ដែលជាប់សារធាតុញៀនកសាងសំណុំរឿងបញ្ជូនបន្តនីតិវិធីកាលពីថ្ងៃទី១៦ ខែកុម្ភៈ ឆ្នាំ២០២៤។
សមត្ថកិច្ចអាវុធហត្ថបានឲ្យដឹងថា៖ ក្រោយពីទទួលបានបទបញ្ជាពីលោកវរសេនីយ៍ត្រីនួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត កម្លាំងកងរាជអាវុធហត្ថក្រុងប៉ោយប៉ែតដឹកនាំដោយលោកវរសេនីយ៍ត្រី គង់ រិទ្ធា មន្ត្រីនគរបាលយុត្តិធម៌នៃអាវុធហត្ថក្រុងចុះល្បាតក្នុងភូមិសាស្ត្រក្រុងប៉ោយប៉ែតបាន ប្រទះឃើញក្រុមក្មេងទំនើង បង្កើតជាក្រុម បក្ខពួក ប្រមូលផ្ដុំគ្នាផឹកស៊ីតាមបណ្ដោយផ្លូវនិងជុំវិញកន្លែងក្សាន្តផ្សេងៗ កម្លាំងបានចុះត្រួតពិនិត្យឆែកឆេរ ហើយនាំមកមូលដ្ឋានកងរាជអាវុធហត្ថក្រុងប៉ោយប៉ែត ចំនួន៤០នាក់ និងធ្វើតេស្តទឹកនោម ។
សមត្ថកិច្ចអាវុធហត្ថបានបន្តថា៖ ក្រោយពីធ្វើតេស្តទឹកនោម លើក្មេងទំនើងទាំង៤០នាក់នោះ រកឃើញជាប់សារធាតុញៀន០៨នាក់ ។
សមត្ថកិច្ចបានកសាងសំណុំរឿងបញ្ជូនទៅកងរាជអាវុធហត្ថខេត្តបន្ទាយមានជ័យ បន្តនីតិវិធីទៅតាមច្បាប់។
ចំណែកក្មេងទំនើង៣២នាក់ទៀត ដោយបានការអនុញ្ញាតពីលោកឧត្តមសេនីយ៍ត្រីបោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ កម្លាំងជំនាញធ្វើកិច្ចសន្យា អប់រំណែនាំ និងអោយអាណាព្យាបាលធានាត្រលប់ទៅលំនៅដ្ឋានវិញដើម្បីអប់រំបន្ត៕