ដោយ៖ គង់ហេង
កំពង់ចាម៖ លោក វង្ស ពិសិដ្ឋ អនុរដ្ឋលេខាធិការ ក្រសួងសាធារណការ និងដឹកជញ្ជូន,លោក ហេង វណ្ណនី អភិបាលរងខេត្តកំពង់ចាម តំណាងឱ្យលោក អ៊ុន ចាន់ដា ជាអភិបាលខេត្ត អមដោយសហការី បានធ្វើបទបង្ហាញអំពីលទ្ធផល នៃការស្ថាបនា បណ្តាញលូ,ស្ថានីយប្រព្រឹត្តកម្ម និងទីលានទុកសំរាម ក្រុងកំពង់ចាម ទៅកាន់ម្ចាស់ជំនួយ ធនាគារអភិវឌ្ឍន៍អាស៊ី(ADB)។
![](https://cambodiaflashnews.com/wp-content/uploads/2021/06/top-banner.gif)
ពិធីនេះបានរៀបចំឡើងនៅក្នុងសាលាខេត្តកំពង់ចាម នារសៀលថ្ងៃទី ១៤ កុម្ភៈ ក្រោយពីចុះពិនិត្យជាក់ស្តែងលើគម្រោងនីមួយ រយៈពេលពេញមួយព្រឹករួចមកនាថ្ងៃដដែលនោះ។ក្នុងនោះមន្រ្តីបច្ចេកទេស នៃក្រសួងសាធារណការ និងដឹកជញ្ជូនបានធ្វើបទបង្ហាញប្រាប់ឱ្យដឹងថា៖ គម្រោងស្ថាបនាប្រព័ន្ធបណ្តាញលូ និងស្ថានីយប្រព្រឹត្តកម្មទឹកកខ្វក់ ក្រុងកំពង់ចាម នៃគម្រោងអភិវឌ្ឍន៍ ក្រុងរបៀងបួន ចាប់ដំណើរការសាងសង់កាលពីចុងឆ្នាំ២០២២ ដោយក្រុមហ៊ុន ប៉េកាំង អឺបឹន ខន់ស្រ្តាក់សិន គ្រុម ខូលអិលធីឌី របស់ប្រទេសចិន លើផ្ទៃដីសរុប ៤៣៩,៤៥ ហិកតា ក្នុងសង្កាត់ចំនួន បួន៖ សង្កាត់កំពង់ចាម,សង្កាត់បឹងកុក,សង្កាត់សំបួរមាស និងសង្កាត់វាលវង់ ដែលនឹងត្រូវបញ្ចប់ការសាងសង់នៅចុងឆ្នាំ២០២៥។
មន្រ្តីដដែលបានឱ្យដឹងទៀតថា៖ គិតត្រឹមថ្ងៃទី ១ ខែមករា ឆ្នាំ២០២៤នេះ ជាលទ្ធផលដំណើរការស្ថាបនាសម្រេចបានៈ ១.បណ្តាញលូ ទឹកភ្លៀងសរុប ៤២០០ម៉ែត្រសម្រេច បាន ៣៨,១៣ភាគរយ , ២. លូទឹកកខ្វក់ប្រវែងសរុប ៨៨ គីឡូម៉ែត្រ សម្រេចបាន ១០,៣២ ភាគរយ,៣.ស្ថានីយប្រព្រឹត្តកម្មទឹកកខ្វក់ មួយកន្លែង សម្រេចបាន ១៥,៦០ ភាគរយ និង៤.ការតភ្ជាប់បណ្តាញទឹកកខ្វក់តាមផ្ទះនៅមិនទាន់អនុវត្ត។
មន្រ្តីរូបនោះបានបន្តថា៖ ចំណែកឯគម្រោងទីលានទុកដាក់សំរាមក្រុងកំពង់ចាមវិញស្ថិតក្នុងគម្រោងអភិវឌ្ឍន៍ ក្រុងរបៀងបួនដែរនោះមានចម្ងាយឃ្លាតពីក្រុងកំពង់ចាមប្រមាណ ១៥ គីឡូម៉ែត្រសាងសង់លើផ្ទៃដីជិត ២០ ហិកតា ស្ថិតឃុំកោះរកា ស្រុកកំពង់សៀម សាងសង់ដោយក្រុមហ៊ុន ប៊ីអិម ខនស្រ្តាក់ហ្សិន អេឡិចទ្រីកឯ.ក។ ដោយចាប់ផ្តើមស្ថាបនាកាលពីមករា ឆ្នាំ២០២៤នេះ ដែលនឹងបញ្ចប់ការស្ថាបនានៅខែឧសភា ឆ្នាំ២០២៥ ។ ជាលទ្ធផល នៃការសាងសង់សម្រេចបានៈ១.ផ្លូវចូលប្រភេទបេតុងប្រវែង ២.២១៨ ម៉ែត្រ សម្រេចបាន ៤០ភាគរយ, ២.កាត់ថ្នល់ចេញនិងលុបបំពេញនៅទីលានទី១ សម្រេចបាន ៦០ភាគរយ,៣. កាត់និងលុបបំពេញទីតាំងអគារ សម្រេចបាន ៤០ភាគរយ និង៣. សាងសង់កន្លែងស្នាក់នៅសំរាប់កម្មករ សម្រេចបាន ១០០ភាគរយ ជារួមសរុបភាគរយប្រចាំខែមករា កន្លងទៅបានចំនួន ៣,៣១ ភាគរយ៕