ប្រែសម្រួល៖ ស-សម្បត្តិ
រូបភាពវីដេអូដែលមើលទៅធ្វើឲ្យបេះដូងលោតខុសចង្វាក់ខណ:ដែលមនុស្សបីនាក់បានរួចផុតពីសេចក្តីស្លាប់ហើយបានរត់ចេញពីយន្តហោះដែលបានធ្លាក់ផ្ទុះឆេះនៅរដ្ឋ Florida ដែលបានសម្លាប់មនុស្សពីរនាក់កាលពីដើមសប្តាហ៍នេះ។
ការិយាល័យតម្រួតខោនធី Collier បាននិយាយថា Murphy អាយុ ៥០ ឆ្នាំ និងសហនាវិកបើកបរ Ian Frederick Hofmann អាយុ ៦៥ ឆ្នាំត្រូវបានគេកំណត់អត្តសញ្ញាណថាអ្នកទាំងពីរបានស្លាប់នៅក្នុងការធ្លាក់យន្តហោះដ៏គួឲ្យរន្ធត់នេះ។
ចំណែកមនុស្សបីនាក់ដែលបានរួចផុតពីសេចក្តីស្លាប់ហើយបានរត់ចេញពីយន្តហោះដែលបានធ្លាក់ផ្ទុះឆេះនៅរដ្ឋ Florida នោះ គឺជាសមាជិនាវិកមានឈ្មោះថា Sydney Ann Bosmans អាយុ ២៣ ឆ្នាំ និងអ្នករួមដំណើរ Aaron Baker អាយុ ៣៥ ឆ្នាំ និង Audra Green អាយុ ២៣ ឆ្នាំ ដែលអ្នកទាំងបីនៅរស់រានមានជីវិតហើយត្រូវបានគេឃើញតាមរូបភាពក្នុងវីដេអូនោះ កំពុងតែរត់ត្របាញ់ជើង ត្រូវបានគេបញ្ជូនទៅមន្ទីរពេទ្យក្នុងតំបន់ដើម្បីព្យាបាលរបួសរបស់ពួកគេ។ ចំពោះស្ថានភាពរបស់ពួកគេគឺនៅមិនទាន់ដឹងច្បាស់នៅឡើយទេ។
រូបភាពរបស់វីដេអូដែលត្រូវបានចែករំលែកដោយសារព័ត៌មានក្នុងស្រុក ១០ News បានបង្ហាញឲ្យឃើញថា អ្នកទាំងបីកំពុងរត់ចេញពីបំណែកបាក់បែករបស់យន្តហោះដែលត្រូវបានឆាបឆេះបាញ់ផ្សែងខ្មៅដេដាស់នៅពេលវាធ្លាក់ហើយផ្ទុះឆេះនៅលើផ្លូវលេខ I-75 ក្នុងរដ្ឋ Florida ។
អ្នកបើកបររថយន្តដែលឆ្លងកាត់ឈ្មោះ Kyle Cavaliere បានឈប់ហើយស្រែកខ្លាំងៗថា”មានអ្នកផ្សេងទៀតនៅក្នុងទីនោះដែរទេ?” ។
គេឮស្ត្រីម្នាក់ស្រែកតបទៅវិញថា “យែ! អ្នកបើកយន្តហោះ! នៅក្នុងនោះ!” ខណៈដែលមិត្តរួមការងាររបស់នាងដើរទ្រេតទ្រោតក្បែរនាង។
នៅពេលសួរថាតើអ្នកបើកយន្តហោះនៅរស់ឬអត់ ស្ត្រីដែលស្ថិតនៅក្នុងស្ថានភាពភិតភ័យបានឆ្លើយថា៖ “ខ្ញុំមិនដឹងថាគាត់ក្លាយជាយ៉ាងណាទៅហើយនោះទេ”។
យន្តហោះបានហោះចេញពីអាកាសយានដ្ឋាននៅសាកលវិទ្យាល័យ Ohio State University ក្នុងទីក្រុង Columbus រដ្ឋ Ohio វេលាម៉ោងប្រហែល ១ រសៀល។
ក្នុងខ្សែអាត់ថតសំឡេងសម្រាប់ការហោះហើរ អ្នកបើកយន្តហោះ Edward Daniel Murphy បានប្រាប់អ្នកគ្រប់គ្រងព្រលានថា យន្តហោះ “មិនអាចចុះចតរត់លើផ្លូវបានទេ” គឺក្នុងពេលតែមួយភ្លែតនៅមុនពេលវាបានធ្លាក់ផ្ទុះអណ្តាតភ្លើងឆាបឆេះឡើង។
អាជ្ញាធរបាននិយាយថា យន្តហោះ Bombardier Challenger 600 ដែលមានមនុស្ស ៥ នាក់នៅលើយន្តហោះ កំពុងព្យាយាមចុះចតនៅអាកាសយានដ្ឋាន Naples ក្បែរនោះ នៅពេលដែលម៉ាស៊ីនទាំងពីររបស់វាបានគាំងមិនដំណើរការដោយឯកឯង។
យន្តហោះបានព្យាយាមចុះចតនៅលើផ្លូវលេខI-75 ក៏ប៉ុន្តែសាក្សីបាននិយាយថា ស្លាបរបស់វាបានខ្ទាស់ជាប់និងរថយន្ត ហើយអូសវានៅមុនពេលដែលវាបានជ្រុលទៅបុកនិងជញ្ជាំងបេតុង បណ្តាលឲ្យផ្ទុះអណ្តាតភ្លើងឆាបឆេះយ៉ាងសន្ធោសន្ធៅឡើង។
លោក Robin King អ្នកនាំពាក្យអាជ្ញាធរអាកាសយានដ្ឋាន Naples បាននិយាយថា វាត្រូវបានគ្រោងនឹងចុះចតនៅ Naples គឺជាពេលដែលយន្តហោះនេះត្រូវបានធ្លាក់។ លោក Robin King អ្នកនាំពាក្យអាជ្ញាធរអាកាសយានដ្ឋាន Naples បាននិយាយថា នៅពេលដែល Murphy បានទាក់ទងទៅប៉មដើម្បីស្នើសុំការចុះចតជាបន្ទាន់។
បើយោងតាមកម្មវិធីតាមដានការហោះហើររបស់យន្តហោះ FlightAware យន្តហោះនេះត្រូវបានដំណើរការដោយ Hop-a-Jet Worldwide Charter ដែលមានមូលដ្ឋាននៅទីក្រុង Fort Lauderdale រដ្ឋ Florida ។ យន្តហោះនេះត្រូវបានគេកំណត់ពេលឲ្យត្រឡប់ទៅក្រុង Fort Lauderdale នៅរសៀលថ្ងៃសុក្រ។
អ្នកនាំពាក្យរបស់ Ohio State University បាននិយាយថា យន្តហោះនេះមិនមានទំនាក់ទំនងជាមួយ Ohio State University នោះទេ ហើយពួកគេមិនមានព័ត៌មានបន្ថែមអំពីវានោះទេ។
នៅក្បែរនោះគឺជាភូមិគ្រឺះរបស់មហាសេដ្ឋីប្រចាំទីក្រុង Naples មានតម្លៃ ២៩៥ លានដុល្លារ ដែលជាអចលនទ្រព្យដ៏ថ្លៃបំផុតលើសគេសម្រាប់ដាក់លក់នៅសហរដ្ឋអាមេរិក៕
ប្រភព Post Wires