ដោយ ÷ បន្ទាយ
បន្ទាយមានជ័យ៖សាខាកាកបាទក្រហមកម្ពុជា(កក្រក)ខេត្ត បន្ទាយមានជ័យនៅរសៀលថ្ងៃសុក្រទី ០៩ ខែកុម្ភៈ ឆ្នាំ២០២៤ ដែលមានលោកអ៊ុ រាត្រី ជាប្រធានគណៈកម្មាធិការសាខា បានចាត់តាំងអោយ លោកស្រីសុខ លាភា នាយិការងសាខា បានដឹកនាំក្រុមការងារដែលមានក្រុមប្រតិបត្តិសាខានិងមានការចូលរួមពី លោក កែវ តារារស្មី ប្រធានគណៈកម្មាធិការអនុសាខា កក្រកស្រុកអូរជ្រៅបាននាំយកអំណោយទៅសួរសុខទុក្ខជនរងគ្រោះ ដោយគ្រាប់មីនដែលបាននឹងកំពុងសង្គ្រោះនិងព្យាបាលនៅមន្ទីរពេទ្យខេត្តមិត្តភាពកម្ពុជា ជប៉ុន-មង្គលបូរី ។
សូមរំលឹកថា កាលពីនៅម៉ោង ៩និ៣០នាទីព្រឹកថ្ងៃទី០៩ ខែកុម្ភៈ ឆ្នាំ២០២៤ ជនរងគ្រោះមានឈ្មោះវ៉ាន់ កំសត់ ភេទប្រុស អាយុ៣៤ ឆ្នាំ មានទីលំនៅក្នុងភូមិសិលាខ្មែរ ឃុំអូរបីជាន់ ស្រុកអូជ្រៅ បានដើររកបេះបន្លែព្រៃនៅក្នុងចំការមីនចំណុចមាត់អូរជាប់ព្រំដែនកម្ពុជា -ថៃ ទល់មុខភូមិសិលាថៃឃុំប៉ារ៉ៃស្រុកអារញ្ញប្រាថេតស្រះកែវប្រទេសថៃ ។ទៅក្នុងព្រៃចំការមីន ក្នុងចំណុចទំនប់ក៥ តំបន់ព្រំដែនស្ថិតក្នុងភូមិសិលាខ្មែរឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ក៏បានជាន់មីនប្រឆាំងមនុស្សបណ្តាលរបួសធ្ងន់ដាច់ជើងទាំងពីរ ។
កម្លាំងប៉ុស្តិ៍ព្រំដែនសិលាខ្មែរ និងយោធាកងការពារព្រំដែនលេខ៥០៣ បានជួយសង្គ្រោះបន្ទាន់ ដឹកជនរងគ្រោះទៅមណ្ឌលសុខភាពសិលាខ្មែររួចបញ្ជូនបន្តទៅមន្ទីរពេទ្យខេត្តមិត្តភាពកម្ពុជា-ជប៉ុន មង្គលបូរី ។
លោកស្រីសុខ លាភានាយិការងអោយដឹងថា :ក្នុងនាមក្រុមការងារសាខាកក្រកសូមចូលរួមសោកស្តាយដល់ជនរងគ្រោះដែលបានបាត់បង់ជើងនៅពេលប្រទេសមានសន្តិភាព ។
ពោលគឺម្តាយឪពុកខំបង្កើតមកមានរូបរាងកាយពេញលក្ខណៈគ្រប់គ្រាន់ហើយមិនគួរមកបាត់បង់នៅពេលនេះសោះ។
អំណោយដែលនាំមកពេលនេះរួមមាន÷ មី១កេស, ទឹកដោះគោឆៅ២ឡូតិ៍ ,ត្រីខ១យួរ,ទឹកសុទ្ធវីតាល់ដបធំ១កេស ថវិកាសាខាកក្រកចំនួន៤០ម៉ឺនរៀលនិងថវិកាអនុសាខាស្រុកអូរជ្រៅចំនួន២០ម៉ឺនរៀល៕