ដោយ : បន្ទាយ
បន្ទាយមានជ័យ :មានជីវភាពក្រីក្រ ប្រថុយនិងធ្វេសប្រហែស បានដើរបេះបន្លែព្រៃស្លឹកព្រេចនៅតំបន់ព្រំដែនត្រូវជាន់មីនដាច់ ជើងទាំងពីរ។
ឧបទ្ទហេតុជាន់ផ្ទុះមីនប្រឆាំងនេះ កើតឡើងនៅវេលាម៉ោង៩និង ៣០នាទី ព្រឹកថ្ងៃទី០៩ខែកុម្ភៈឆ្នាំ២០២៤ ក្នុងព្រៃចម្ការមីននៃតំបន់ព្រំដែនមិនទាន់ច្បាស់លាស់មុខទំនប់ក៥ ស្ថិតក្នុងភូមិសិលាខ្មែរឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។
នគរបាលស្រុកអូរជ្រៅនិងនគរបាលវរសេនាតូចការពារព្រំដែនលេខ៩១១ បានឲ្យដឹងថា៖ ជនរងគ្រោះឈ្មោះ វណ្ណ កំសត់ ភេទប្រុស អាយុ៣៤ឆ្នាំ រស់នៅភូមិសិលាខ្មែរ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។
នគរបាលបានបន្តថា ៖ មុនពេលកើតហេតុ ជនរងគ្រោះ បានដើរ រកបេះបន្លែស្លឹកព្រេចដើម្បីលក់ដូចសព្វមួយដង។
តែលើកនេះ បានដើរជ្រុលចូលជ្រៅទៅក្នុងព្រៃចម្ការមីន ក្នុងចំណុចទំនប់ក៥ តំបន់ព្រំដែន ស្ថិតក្នុងភូមិសិលា ខ្មែរ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ក៏បានជាន់ជាន់មីនប្រឆាំងមនុស្សបណ្តាលរបួសជើងធ្ងន់ជើងទាំងពីរ ក្នុងនោះដាច់ជើងខាងស្តាំ។
កម្លាំងប៉ុស្តិ៍ព្រំដែនសិលាខ្មែរ និងយោធាកងការពារព្រំដែនលេខ៥០៣ បានជួយសង្គ្រោះបន្ទាន់ ដឹកជនរងគ្រោះទៅមណ្ឌលសុខភាពសិលាខ្មែររួចបញ្ជូនបន្តទៅមន្ទីរពេទ្យខេត្តមិត្តភាពកម្ពុជា-ជប៉ុន មង្គលបូរី ៕