សន្ដិសុខសង្គម

ផ្លូវល្បឿនលឿនមានរថយន្ដក្រឡាប់ផ្ដាច់ជីវិតមនុស្ស ៥នាក់ទៀតហើយ

ដោយ:សុខុម
កំពង់ស្ពឺ៖មនុស្សចំនួន៥នាក់បាត់បង់ជីវិត និង២នាក់រងរបួសធ្ងន់ធ្ងរ ក្នុងហេតុការណ៍ក្រឡាប់រថយន្តជាច្រើនត្រឡប់លើផ្លូវល្បឿនលឿន ទិសដៅពីខេត្តព្រះសីហនុ ទៅរាជធានីភ្នំពេញ។

សមត្ថកិច្ច​បានឲ្យដឹងថា ហេតុការណ៍គ្រោះថ្នាក់ចរាចរណ៍ដ៏គួរឲ្យរន្ធត់នេះបានកើតឡើងនៅម៉ោង៦និង៤៥នាទីព្រឹកថ្ងៃទី៧កុម្ភៈ២០២៤ ន្លោះគីឡូម៉ែត្រលេខ ២០ ត្រង់ចំណុចភូមិព្រៃរំដួល ឃុំត្រពាំងគង ស្រុកសំរោងទង ខេត្តកំពង់ស្ពឺ ។

សមត្ថកិច្ចបន្តថា៖ អ្នកបើកបររថយន្តម៉ាកAlphaឈ្មោះ ញឹក ពិសី ភេទស្រី អាយុ៣៣ឆ្នាំ(ស្លាប់) អ្នករួមដំណើរជាមួយ ៦នាក់ (រថយន្តគ្រួសារដំណើរកម្សាន្ត) ទី១-ហេង កុសល ភេទប្រុស អាយុ៣៥ឆ្នាំ (របួសស្រាល) បងថ្លៃ , ទី២-ញឹក តុលា ភេទស្រី អាយុ ៣៨ឆ្នាំ(ស្លាប់) បងបង្កើត, ទី៣-គឹម ឡៃណាត ភេទស្រី អាយុ៦៥ឆ្នាំ(ស្លាប់) ម្តាយបង្កើត, ទី៤-គឹម ថាវី ភេទស្រី អាយុ៥៤ឆ្នាំ(ស្លាប់) ម្តាយបងថ្លៃ, ទី៥-ទិត្យ ប៊ុនណា ភេទប្រុស អាយុ៦៦ឆ្នាំ(ស្លាប) ឪពុកបងថ្លៃ, ទី៦-ហេង ពេជ្រពិសី ភេទស្រី អាយុ ១៣ឆ្នាំ (របួសធ្ងន់) ប្អូនថ្លៃ។អ្នកទាំងប្រាំពីររស់នៅភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។


រថយន្តខាងលើនេះ បើកបរពីកើតទៅលិច លុះមកដល់ចំណុចកើតហេតុបានរេចង្កូតបុករបាំងផ្លូវក្រឡាប់ បណ្ដាលឲ្យគ្រោះថ្នាក់មនុស្ស និងខូចខាតសម្ភារ។
បើតាមការពិនិត្យនៅកន្លែងកើតហេតុគ្រោះថ្នាក់អាចបណ្ដាលមកពីបើកបរក្នុងល្បឿនលឿនផ្លូវកោង៕