ប្រែសម្រួល៖ រតនា
កាលពីថ្ងៃសៅរ៍មានបុរសម្នាក់បានប្រើកាំបិទចុងស្រួចចាក់ទៅលើជនរងគ្រោះនៅស្ថានីយរថភ្លើង Gare de Lyon ដ៏សំខាន់ក្នុងទីក្រុងប៉ារីសបណ្តាលឲ្យមនុស្សរងរបួសចំនួន៣នាក់។ ព្រិត្តិការណ៏នេះគឺជាឧបទ្ទវហេតុដ៏គួរឲ្យភ័យខ្លាចមួយផ្សេងទៀតនៅក្នុងទីក្រុងនេះក្នុងខណ:ដែលខ្លួនកំពុងធ្វើជាម្ចាស់ផ្ទះសម្រាប់កីឡាអូឡាំពិកនៅមុនបើកឆាកប្រកួតក្នុងរដូវក្តៅសម្រាប់រយៈពេលប្រាំមួយខែ។
ប៉ូលិសក្រុងប៉ារីសបាននិយាយថា ពួកគេបានឃាត់ខ្លួនអ្នកប្រើកាំបិទចុងស្រួចដែលបានចាក់ទៅលើជនរងគ្រោះនៅម៉ោងប្រហែល ៨ ព្រឹក។
មានអ្នករងរបួសម្នាក់ស្ថិតនៅក្នុងស្ថានភាពធ្ងន់ធ្ងរ ចំណែក២នាក់ផ្សេងទៀតរងរបួសស្រាលជាង ។ ប៉ូលិសមិនមានព័ត៌មានលម្អិតភ្លាមៗផ្សេងទៀតនោះទេ។
បើយោងតាមការបង្ហោះសារនៅលើប្រព័ន្ធផ្សព្វផ្សាយសង្គម រដ្ឋមន្ត្រីមហាផ្ទៃលោក Gerald Darmanin បានពណ៌នាថាការវាយប្រហារនេះថាជា “ទង្វើដែលមិនអាចលើកលែងបាន” ហើយបានថ្លែងអំណរគុណដល់ប៉ូលិសក្រុងប៉ារីសដែលបានចាប់ឃាត់ខ្លួនជនបង្ក។
សន្តិសុខនៅទីក្រុងប៉ារីសកំពុងត្រូវបានបង្កើនការរឹតបន្តឹង ខណៈដែលត្រៀមស្វាគមន៍កីឡាករអូឡាំពិក ចំនួន១០,៥០០ នាក់និងអ្នកទស្សនារាប់លាននាក់សម្រាប់ការប្រកួតកីឡាអូឡាំពិកលើកដំបូងក្នុងរយៈពេលមួយសតវត្សរ៍នៅក្នុងរដ្ឋធានីប្រទេសបារាំង។
ការប្រកួតនឹងចាប់ផ្តើមបើកឆាកជាមួយនឹងការប្រារព្ធពិធីដ៏ធំរៀបចំឡើងនៅតាមដងទន្លេ Seine នៅថ្ងៃទី ២៦ ខែកក្កដា ដែលជាបញ្ហាប្រឈមផ្នែកសន្តិសុខនៅក្នុងទីក្រុងដែលតែងតែរងនូវការវាយប្រហារ
ម្តងហើយម្តងទៀតពីសំណាក់ភេរវករចាប់តាំងពីឆ្នាំ ២០១៥ ។
នៅក្នុងខែធ្នូ ថ្មីៗនេះមានបុរសម្នាក់បានកំណត់គោលដៅអ្នកធ្វើដំណើរក្បែរប៉ម Eiffel ដោយបានចាក់សម្លាប់អ្នកទេសចរជនជាតិអាល្លឺម៉ង់ម្នាក់ដោយកាំបិត និងពីរនាក់ផ្សេងទៀតរងរបួស។
Gare de Lyon គឺជាស្ថានីយរថភ្លើងដ៏មមាញឹកបំផុតមួយនៅក្នុងទីក្រុងប៉ារីស។ វាជាមជ្ឈមណ្ឌលសម្រាប់រថភ្លើងល្បឿនលឿនដែលភ្ជាប់រដ្ឋធានីទៅកាន់ទីក្រុងផ្សេងៗ និងសម្រាប់រថភ្លើងដឹកអ្នកដំណើរដែលបម្រើនៅឯជាយក្រុង និងទីប្រជុំជនក្នុងតំបន់ប៉ារីសទាំងមូល៕