ដោយ៖ភោគ ជា
សៀមរាប៖ អង្គការមូលនិធិប្រាសាទពិភពលោក(World Monument Fund)របស់សហរដ្ឋអាមេរិក បានធ្វើពិធីរំលឹកខួបលើកទី៣៥ឆ្នាំនៃបេសកកម្មរបស់ខ្លួនព្រមទាំងពិធីប្រគល់និងទទួលជួសជុលការដ្ឋានប្រាសាទចំនួន៣ក្នុងរមណីយដ្ឋានជូនអាជ្ញាធរអប្សរាគ្រប់គ្រងវិញ កាលពីរសៀលថ្ងៃទី២៦ខែមករាឆ្នាំ២០២៤។
ពិធីប្រគល់ការដ្ឋានជួសជុលចំនួន៣នោះមានប្រាសាទតាសោម ប្រាសាទព្រះខ័ននិងរោងទងនៃចម្លាក់សមុទ្រកូទឹកដោះរបស់ប្រាសាទអង្គរវត្ត ក្រោមអធិបតីភាពរបស់លោកជំទាវបណ្ឌិតសភាចារ្យភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ បណ្ឌិតហង់ ពៅអគ្គនាយកនៃអាជ្ញាធរជាតិអប្សរានិងមន្ត្រីជាច្រើនរូបព្រមទាំងដៃគូនៃកិច្ចសហប្រតិបត្តិការក្នុងការជួសជុលនិងអភិរក្សប្រាសាទបុរាណជាច្រើនស្ថាប័នទៀត។
លោកជំទាវបណ្ឌិតសភាចារ្យភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈបានថ្លែងនៅក្នុងពិធីប្រគល់ការដ្ឋានជួសជុលចំនួន៣មកឱ្យអាជ្ញាធរអប្សរាគ្រប់គ្រងវិញនោះថា អាជ្ញាធរជាតិអប្សរានឹងបន្តថែរក្សាប្រាសាទទាំងបីនេះ ហើយកម្ពុជានឹងចងចាំជារៀងរហូតចំពោះការរួមចំណែករបស់មូលនិធិប្រាសាទពិភពលោក(World Monument Fund)ក្នុងការជួយការពារបេតិកភណ្ឌជាតិរបស់កម្ពុជា ហើយកម្ពុជាក៏រង់ចាំបន្តធ្វើការជាមួយអង្គការមូលនិធិប្រាសាទពិភពលោកក្នុងវិស័យទូលំទូលាយដូចជាការផ្លាស់ប្តូរជំនាញស្តីពីការអភិរក្ស វេទិកាយុវជនសម្រាប់ការគ្រប់គ្រងបេតិកភណ្ឌ ការស្រាវជ្រាវផ្នែកបុរាណវិទ្យានិងសិក្ខាសាលារួមគ្នាដើម្បីចែករំលែកបទពិសោធន៍ជាដើម។
ចំណែកប្រធាននិងជានាយកប្រតិបត្តិរបស់អង្គការមូលនិធិប្រាសាទពិភពលោករបស់សហរដ្ឋអាមេរិក អ្នកស្រីBenedicte De Montlaurបានថ្លែងថាការចូលរួមរបស់(World Monument Fund )ក្នុងការងារជួសជុលប្រាសាទនៅរមណីយដ្ឋានអង្គរបានចាប់ផ្តើមតាំងពីឆ្នាំ១៩៨៩ជាមួយនឹងបេសកកម្មចុះវាល ដើម្បីវាយតម្លៃស្ថានភាពនៃប្រាសាទ ដើម្បីឆ្លើយតបតាមការស្នើសុំរបស់អតីតព្រះមហាក្សត្រព្រះបាទនរោត្តម សីហនុ ហើយបន្ទាប់មកអង្គការមូលនិធិប្រាសាទពិភពលោកក៏បានបង្កើតកម្មវិធីអភិរក្ស និងបណ្តុះបណ្តាលដ៏ទូលំទូលាយ ដោយជួយបំពេញបន្ថែមទៅលើកិច្ចខិតខំប្រឹងប្រែងរបស់សាកលវិទ្យាល័យភូមិន្ទវិចិត្រ សិល្បៈ(RUFA) ដែលទើបនឹងបើកឡើងវិញ។
ចាប់តាំងតែពីឆ្នាំ១៩៩១ ក្នុងពេលដែលប្រធាន(WMF)បានធ្វើទស្សនកិច្ចលើកដំបូងមកកាន់អង្គរគឺជាចំណុចចាប់ផ្តើមនៃកិច្ចសហប្រតិបត្តិការដ៏ធំធេងនិងនិរន្តរភាពរវាងWMF និងរាជរដ្ឋាភិបាលកម្ពុជា។ រហូតមកដល់ថ្ងៃនេះ អង្គការមូលនិធិប្រាសាទពិភពលោកបានទទួលការគាំទ្រយ៉ាងត្រចះត្រចង់ទាក់ទងនឹងជំនាញសម្រាប់ការស្រាវជ្រាវ និងឯកសារអំពីបេតិកភណ្ឌស្ថាបត្យកម្មកម្ពុជា អន្តរាគមន៍ក្នុងការផ្តល់ស្ថិរភាព និងការអភិរក្សប្រាសាទ ព្រមទាំងការបណ្តុះបណ្តាលសំខាន់ៗសម្រាប់អ្នកអភិរក្សកម្ពុជា។
យោងទៅលើប្រវត្តិសាស្ត្រកម្ពុជាក៏សូមថ្លែងអំណរព្រះគុណនិងអរគុណចំពោះសម្តេចឪព្រះ នរោត្តម សីហនុ ដែលបានខិតខំខ្នះខ្នែងអំពាវនាវរកជំនួយអន្តរជាតិក្នុងឆ្នាំ១៩៨៩សម្រាប់ជួយសង្គ្រោះប្រាសាទបុរាណខ្មែរជាច្រើន ហើយកម្ពុជាក៏ទទួលស្គាល់ការដឹកនាំដ៏រឹងមាំរបស់សម្តេចតេជោហ៊ុន សែន ចំពោះការប្តេជ្ញាចិត្តក្នុងការការពារអង្គរដ៏អស្ចារ្យរបស់សម្តេចដែរ៕
