ប្រែសម្រួល៖ស-សម្បត្តិ
នៅថ្ងៃចន្ទ ទី២៩ មករា រដ្ឋមន្ត្រីការបរទេសនៃបណ្តាប្រទេសអាស៊ាន បានជំរុញឲ្យមានការបញ្ចប់ជម្លោះដ៏បង្ហូរឈាមនៅមីយ៉ាន់ម៉ានិងរួមគ្នាគាំទ្រផែនការសន្តិភាពនៅក្នុងតំបន់ និង “ដំណោះស្រាយស្តីពីវិបត្តិនៅមីយ៉ាន់ម៉ា” ។
នៅក្នុងសេចក្តីថ្លែងការណ៍របស់សមាគមប្រជាជាតិអាស៊ីអាគ្នេយ៍ (អាស៊ាន) រដ្ឋមន្ត្រីការបរទេសនៃ បណ្តាប្រទេសអាស៊ានបានផ្តល់ការគាំទ្រដល់កិច្ចខិតខំប្រឹងប្រែងរបស់បេសកជនពិសេសថ្មីមកពីប្រទេសឡាវស្តីពីវិបត្តិដែល”ទាក់ទងទៅភាគីពាក់ព័ន្ធក្នុងជម្លោះនៅមីយ៉ាន់” និងបានបង្ហាញនូវទំនុកចិត្តលើការប្តេជ្ញាចិត្តរបស់គាត់ក្នុងការជួយដល់ភាគីពាក់ព័ន្ធក្នុងជម្លោះរួមទាំងប្រជាជនមីយ៉ាន់ម៉ាផងដែរ។
ប្រទេសមីយ៉ាន់ម៉ាត្រូវបានជាប់គាំងដោយសារតែជម្លោះចាប់តាំងពីពួកយោធាបានធ្វើរដ្ឋប្រហារដណ្តើមអំណាចនៅក្នុង ២០២១ ដែលបានបង្កឲ្យមានភាពចលាចលនៅទូទាំងប្រទេសថែមទាំងបានបញ្ចប់លទ្ធិប្រជាធិបតេយ្យ និងបញ្ឈប់កំណែទម្រង់សេដ្ឋកិច្ចអស់រយៈពេលមួយទសវត្សរ៍កន្លងមក។
យោងតាមប្រព័ន្ធផ្សព្វផ្សាយរដ្ឋរបស់មីយ៉ាន់ម៉ាបានឲ្យដឹងថា បេសកជនពិសេសថ្មីលោក Alounkeo Kittikhoun បានជួបជាមួយប្រមុខរបបយោធាក្នុងអំឡុងពេលដំណើរទស្សនកិច្ចទៅកាន់ប្រទេសមីយ៉ាន់ម៉ាកាលពីដើមខែនេះ។ ទាំងអាស៊ាន និងឡាវនៅមិនទាន់បានប្រកាសជាសាធារណ:អំពីលទ្ធផលនៃដំណើរទស្សនកិច្ចនេះនៅឡើយទេហើយគេក៏នៅមិនទាន់ដឹងច្បាស់ថាតើលោកបានជួបជាមួយនឹងក្រុមប្រឆាំងណាមួយនោះទេ។
រដ្ឋមន្ត្រីការបរទេសអាស៊ានបានចេញសេចក្តីថ្លែងការណ៍ថា “យើងបានបញ្ជាក់ឡើងវិញនូវការប្តេជ្ញាចិត្តរបស់អាស៊ាននៅក្នុងការជួយមីយ៉ាន់ម៉ាដើម្បីស្វែងរកដំណោះស្រាយដោយសន្តិវិធី យ៉ាងទូលំទូលាយ និងយូរអង្វែងចំពោះវិបត្តិដែលកំពុងកើតមាន ខណៈដែលមីយ៉ាន់ម៉ានៅតែជាផ្នែកដ៏សំខាន់មួយរបស់អាស៊ាន”។
“យើងបានបញ្ជាក់ឡើងវិញនូវការឯកភាពរបស់អាស៊ាន និងបានរំលឹកឡើងវិញថា កិច្ចខិតខំប្រឹងប្រែងណាមួយគួរតែត្រូវបានគាំទ្រ ស្របទៅតាមផែនការសន្តិភាពនិងការសម្របសម្រួលជាមួយប្រធានអាស៊ាន ” ដោយជំរុញឲ្យមានការបញ្ឈប់អំពើហិង្សា និងការអត់ធ្មត់ ដើម្បីអនុញ្ញាតឲ្យមានលំហូរសកម្មភាពមនុស្សធម៌។
អាស៊ានបានប្រឈមមុខនឹងការមិនចុះសម្រុងផ្ទៃក្នុងអំពីរបៀបដោះស្រាយវិបត្តិនៅមីយ៉ាន់ម៉ា។
មានការប្រយុទ្ធគ្នានៅលើសមរភូមិជាច្រើន។
របបយោធាបាននិងកំពុងប្រយុទ្ធនៅលើលើសមរភូមិជាច្រើនដើម្បីបង្រ្កាបការបះបោរដោយកងជីវពលដែលគាំទ្រលទ្ធិប្រជាធិបតេយ្យដែលបានចងសម្ព័ន្ធភាពជាមួយនិងរដ្ឋាភិបាលស្រមោលមីយ៉ាន់ម៉ា និងកងទ័ពជនជាតិភាគតិច ដែលរបបយោធាបានហៅពួកគេថា “ភេរវករ” និងបដិសេធមិនចរចាជាមួយក្រុមប្រដាប់អាវុធទាំងនោះ។ មានមនុស្សជាង ២លាននាក់ត្រូវបានផ្លាស់ទីលំនៅដោយសារតែសង្រ្គាម។
ឥណ្ឌូនេស៊ីដែលជាប្រធានអាស៊ានកាលពីពេលមុនបានខិតខំផ្តួចផ្តើមគំនិតការទូតស្ងាត់ៗដើម្បីលើកទឹកចិត្តឲ្យមានការសន្ទនារវាងភាគីជម្លោះរបស់មីយ៉ាន់ម៉ា ក៏ប៉ុន្តែអ្នកវិភាគមួយចំនួនបានដាក់ការសង្ស័យថាតើប្រធានថ្មីដែលជាឡាវមានឥទ្ធិពល ឬឆន្ទៈដើម្បីឈានទៅរកដំណោះស្រាយឬយ៉ាងណានោះទេ?
ប្រទេសមីយ៉ាន់ម៉ាបានបញ្ជូនបេសកជនទៅចូលរួមក្នុងកិច្ចប្រជុំកាលពីថ្ងៃចន្ទ ដោយទទួលយកការអញ្ជើញរបស់អាស៊ានជាលើកដំបូងក្នុងការបញ្ជូនអ្នកតំណាង “មិនមែនបក្សនយោបាយ” ទៅចូលរួមក្នុងកិច្ចប្រជុំមួយនេះ។
របបយោធាមានការខឹងសម្បាចំពោះអ្វីដែលខ្លួនហៅថាការជ្រៀតជ្រែករបស់អាស៊ាននៅក្នុងកិច្ចការផ្ទៃក្នុងរបស់ខ្លួន។
រដ្ឋមន្ត្រីការបរទេសឥណ្ឌូណេស៊ី Retno Marsudi នៅក្នុងសារផ្ញើទៅកាន់ Reuters បាននិយាយថា ការចូលរួមរបស់រដ្ឋលេខាធិការអចិន្ត្រៃយ៍ស្តីទីនៃក្រសួងការបរទេសរបស់ខ្លួនគឺលោក Malar Than Htike បានកត់សម្គាល់ថាមិនមានការផ្លាស់ប្តូរនៅក្នុងគោលនយោបាយរបស់អាស៊ាននោះទេ។
លោកស្រីបានបន្តថា៖ “វាមិនប៉ះពាល់ដល់ការសម្រេចចិត្តរបស់អាស៊ាននោះទេ។
រដ្ឋមន្ត្រីការបរទេសនៃបណ្តាប្រទេសអាស៊ានក៏បានអំពាវនាវឲ្យមានការអត់ធ្មត់ និងផ្តល់សេរីភាពក្នុងការធ្វើនាវាចរណ៍នៅលើដែនសមុទ្រចិនខាងត្បូង និងបានជំរុញឲ្យបើកឱកាសសម្រាប់ការបន្តកិច្ចពិភាក្សាដោយឈរលើក្រមសីលធម៌រវាងអាស៊ាន និង ចិន៕
ប្រភព៖ Reuters/ac