ដោយ៖កំចាយ
កំពត÷ អភិបាលស្រុកបន្ទាយមាសបានបញ្ជាក់ថា សម្រាប់ឆ្នាំ២០២៤នេះ ដោយសារស្រូវមានតម្លៃល្អ បានជំរុញដល់កសិករសម្រុកធ្វើស្រូវប្រាំងច្រើនលើសផែនការ។ ស្របតាមអាកាសធាតុក្តៅហួតហែងគ្មានភ្លៀងកក់ខែផង បានធ្វើឱ្យស្រូវប្រាំងក្នុងស្រុកបន្ទាយមាសរាប់រយហិកតាប្រឈមបញ្ហាខ្វះខាតទឹកស្រោចស្រព។ ជាដំណោះស្រាយក្នុងការឆ្លើយតបបានទាន់ពេលវេលា និងដើម្បីដោះស្រាយបញ្ហាទៅថ្ងៃមុខ អភិបាលស្រុកបន្ទាយមាសបានប្រកាន់យកវិធីសាស្ត្រចំនួន៣ជាសំខាន់។
លោក នូរ ច័ន្ទដា អភិបាលស្រុកបន្ទាយមាសបានមានប្រសាសន៍ថា បន្ទាយមាសជាស្រុកមួយដែលផលិតស្រូវបានច្រើនជាងគេនៅទូទាំងខេត្តកំពត។ សម្រាប់ឆ្នាំ២០២៤នេះ ផែនការផលិតស្រូវប្រាំងមានចំនួន៨ពាន់ហិកតា តែជាក់ស្តែង ការធ្វើស្រូវប្រាំងលើកទី១បានរហូតដល់១០.១៧៨ហិកតា ស្មើនឹង១២០ភាគរយនៃផែនការ។
លោកអភិបាលស្រុកបានបន្តថា ការកើនឡើងនូវផ្ទៃដីផលិតស្រូវប្រាំងនេះដោយសារទីផ្សារស្រូវល្អដែលមានតម្លៃប្រមាណ១.៥០០រៀលក្នុងមួយគីឡូក្រាម។ ព្រោះតែការកើនឡើងនៃផ្ទៃដីធ្វើស្រែប្រាំង និងកត្តាអាកាសធាតុផងនោះ បានធ្វើឱ្យជួបបញ្ហាកង្វះខាតទឹកស្រោចស្រព។ ប៉ុន្តែ ដោយមានកិច្ចចូលរួមសហការពីអាជ្ញាធរ មន្ត្រីមន្ទីរ និងអង្គភាពជំនាញពាក់ព័ន្ធធ្វើឱ្យរដ្ឋបាលស្រុកជួយសង្គ្រោះដំណាំស្រូវបានទាន់ពេលវេលា។ លោក នូរ ច័ន្ទដា បានបញ្ជាក់ថា ជាការដោះស្រាយសម្រាប់បញ្ហាកង្វះខាតទឹកទៅថ្ងៃមុខ ពោលគឺដើម្បីរក្សាប្រភពទឹក ប្រកបដោយនិរន្តរភាព លោកដាក់ចេញនូវយុទ្ធសាស្ត្រសំខាន់៣ក្នុងការអនុវត្ត រួមមាន ១. ធ្វើទំនប់ស្ទាក់ទឹកនៅតាមប្រឡាយនីមួយៗ, ២. ស្តារទំបន់ បឹងបួចាស់ៗឡើងវិញ និងទី៣.ជីកអណ្តូងសម្រាប់ប្រើប្រាស់បន្ថែម។
លោក អៀង សារ៉ាត់ កសិកររស់នៅភូមិក្រឡង់ ឃុំស្តេចគង់ខាងត្បូង ស្រុកបន្ទាយមាស បានប្រាប់ឱ្យដឹងថា កសិករឆ្នាំនេះបានធ្វើស្រូវប្រាំងច្រើន ព្រោះស្រូវមានតម្លៃខ្ពស់។ ដំបូងឡើយគាត់ព្រួយបារម្ភខ្លាចពីការខ្វះទឹក ប៉ុន្តែក្រោយមានអន្តរាគមន៍ពីអាជ្ញាធរ និងមន្ត្រីជំនាញពាក់ព័ន្ធ កសិករទាំងអស់សប្បាយចិត្តឡើងវិញហើយ។
តាមរបាយការណ៍របស់មន្ទីរកសិកម្មបានបញ្ជាក់ថា គិតត្រឹមថ្ងៃទី២៣ ខែមករា ឆ្នាំ២០២៤ ផ្ទៃដីដំណាំស្រូវប្រាំងទូទាំងខេត្តអនុវត្តបាន១៣.៤១២ហិកតា ស្មើ១៣៣ភាគរយនៃផែនការ ។ មន្ទីជំនាញ រួមនឹងអាជ្ញាធរនៅតែបន្តតាមដានដោយយកចិត្តទុកដាក់ចំពោះការបង្កបង្កើនផលរបស់ពលរដ្ឋ ហើយរង់ចាំអន្តរាគមន៍ប្រសិនបើមានបញ្ហាណាមួយដែលបង្កឱ្យប៉ះពាល់ដល់ដំណាំរបស់ប្រជាកសិករ៕