ប្រែសម្រួល៖ ស-សម្បត្តិ
បាងកក៖ កាលពីថ្ងៃសុក្រ ទី២៦ មករា ប៉ូលិសថៃបាននិយាយថានៅក្នុងប៉ុន្មានថ្ងៃកន្លងមកនេះមានការបង្ហោះវីដេអូអំពីសត្វតោជិះនៅក្នុងរថយន្តទំនើប Bentley ដែលជាកម្មសិទ្ធិរបស់ស្រ្តីជនជាតិថៃម្នាក់បានរីករាលដាលនៅលើបណ្តាញអ៊ីនធឺណិត។
ប៉ូលិសបានបញ្ជាឲ្យមានការស៊ើបអង្កេតបន្ទាប់ពីវីដេអូដែលបង្ហាញពីកូនតោកំពុងជិះជុំវិញទីក្រុងរមណីយដ្ឋានថៃនៃទីក្រុងប៉ាតាយ៉ាក្នុងរថយន្ត Bentley ពណ៌ស ទទួលបានការចូលមើលជាង ២.៦ លានដងតាមអ៊ីនធឺណិត។
ការិយាល័យកណ្តាលផ្នែកស៊ើបអង្កេតបានប្រកាសនៅលើទំព័រ Facebook ផ្លូវការរបស់ខ្លួនថានៅក្នុងថ្ងៃទី២៦ មករាកន្លងទៅនេះប៉ូលិសបានស្រាវជ្រាវរកស្រ្តីជនជាតិថៃម្នាក់នោះនិងបានធ្វើការចោទប្រកាន់លើរូបគាត់ពីបទកាន់កាប់កូនតោជាកម្មសិទ្ធិខុសច្បាប់ ។
សេចក្តីថ្លែងការណ៍របស់ប៉ូលិសបាននិយាយថា “យើងបានចាប់ខ្លួននាងយោងតាមច្បាប់អភិរក្ស និងការពារសត្វព្រៃដែលបានចេញនៅក្នុងឆ្នាំ 2019″។
តាមច្បាប់ថៃ នាងអាចនឹងត្រូវពិន័យជាប្រាក់រហូតដល់ ១០ ម៉ឺនបាត ស្មើនឹង២ ៨០០ ដុល្លារ និងប្រឈមនឹងការជាប់ពន្ធនាគារមួយឆ្នាំ។
នាង Sawangjit បានប្រាប់ប៉ូលិសថា នាងបានទិញសត្វតោពីនារីម្នាក់ទៀតក្នុងតម្លៃ ២៥០,០០០ បាត ប៉ុន្តែនាងមិនអាចទទួលបានឯកសារប្រគល់ជាផ្លូវការនោះទេ ដោយសារតែព័ត៌មានមិនគ្រប់គ្រាន់ទាក់ទងនឹងការបង្កាត់ពូជរបស់កូនសត្វតោនេះ។
នាងបានចិញ្ចឹមកូនតោនោះនៅក្នុងផ្ទះជួលរបស់បុរសជនជាតិស្រីលង្កាម្នាក់ដែលគេប្រទះឃើញគាត់ក្នុងវិដេអូជាអ្នកបើករថយន្ត Bentley នោះ។
នាយកដ្ឋានអភិរក្ស ឧទ្យានជាតិ និងសត្វព្រៃបាននិយាយថាបុរសជនជាតិស្រីលង្កាម្នាក់នោះត្រូវបាន
អាជ្ញាធរថៃនិរទេសខ្លួនទៅកាន់ប្រទេសស្រីលង្កាវិញហើយ៕
ប្រភព៖ AFP/at