ប្រែសម្រួល៖ ស-សម្បត្តិ
ម៉ានីល៖ នៅថ្ងៃសៅរ៍ ទី២៧ មករានេះ យោធាហ្វីលីពីនបានសម្លាប់ក្រុមសកម្មប្រយុទ្ធរដ្ឋអ៊ីស្លាមនៅភាគខាងត្បូងប្រទេសហ្វីលីពីនចំនួន ៩ នាក់ដែលក្នុងនោះរួមទាំងជនសង្ស័យពីរនាក់ដែលជាប់ពាក់ព័ន្ធនៅក្នុងការបំផ្ទុះគ្រាប់បែកដ៏សាហាវនៅវិហារកាតូលិកមួយកាលពីខែមុន។
នៅថ្ងៃសៅរ៍ ទី២៧ មករានេះ កងកម្លាំងប្រដាប់អាវុធហ្វីលីពីន (AFP) បាននិយាយនៅក្នុងសេចក្តីថ្លែងការណ៍មួយថា ទាហានបួននាក់បានរងរបួសក្នុងអំឡុងពេលប្រតិបត្តិការកំទេចភេរវករកាលពីថ្ងៃព្រហស្បតិ៍ និងថ្ងៃសុក្រនៅក្នុងខេត្ត Lanao del Sur ។
កងកម្លាំងប្រដាប់អាវុធហ្វីលីពីន AFP បាននិយាយថា អ្នកដែលត្រូវបានសម្លាប់គឺជាសមាជិកនៃ Daulah Islamiyah ដែលជាក្រុមសកម្មប្រយុទ្ធរដ្ឋអ៊ីស្លាមដែលបានកាន់កាប់ទីក្រុង Marawi ភាគខាងត្បូងនៅក្នុងឆ្នាំ ២០១៧ ហើយយោធាហ្វីលីពីនបានវាយដណ្តើមយកមកគ្រប់គ្រងវិញតាមរយៈការវាយលុកដោយទ័ពថ្មើរជើងនិងការវាយប្រហារតាមអាកាសអស់រយៈពេលប្រាំខែ។
នៅក្នុងចំណោមអ្នកស្លាប់ទាំងនោះមានជនសង្ស័យពីរនាក់ដែលមានឈ្មោះក្នុងការបំផ្ទុះគ្រាប់បែកកាលពីថ្ងៃទី៣ ខែធ្នូ នៅក្នុងកន្លែងហាត់ប្រាណក្នុងសាកលវិទ្យាល័យក្នុងក្រុង Marawi ដែលបានសម្លាប់មនុស្សយ៉ាងហោចណាស់ ៤នាក់ និងរបួស ៥០នាក់។
ប្រមុខយោធាហ្វីលីពីន Romeo Brawner បាននិយាយនៅក្នុងសេចក្តីថ្លែងការណ៍មួយថា “យោធាហ្វីលីពីនយល់ច្បាស់ពីការលះបង់នៅក្នុងប្រតិបត្តិការនេះ” ។
លោក Brawner បានបន្តថា “កិច្ចប្រតិបត្តិការនេះគឺជាគំរូមួយ៖ យោធាហ្វីលីពីន AFP នឹងមិនអត់ធ្មត់ចំពោះជនបង្កគ្រោះថ្នាក់ដល់អាយុជីវិត និងសុខមាលភាពរបស់ប្រជាជនរបស់យើងនោះទេ”៕
ប្រភព៖ Reuters/ac