ដោយ : បន្ទាយ
បន្ទាយមានជ័យ៖ដើម្បីកុំអោយស្ទះការងារនិងពង្រឹងនូវគុណភាព អភិបាលកិច្ចក្នុងការដឹកនាំគ្រប់គ្រងព្រះសង្ឃនិងវត្តអារាមព្រះពុទ្ធសាសនាអោយមានដំណើរការបន្ត មានរបៀបរៀបរយ សណ្តាប់ធ្នាប់ បានលទ្ធផលល្អនិងមានប្រសិទ្ធភាពនោះ ព្រះមន្ត្រីសង្ឃសាលាគណខេត្ត សហការជាមួយមន្ទីរធម្មការនិងសាសនាខេត្ត បានបើកកិច្ចប្រជុំបន្ទាន់មួយ ស្ដីពីការជ្រើសរើសព្រះអនុគណក្រុងប៉ោយប៉ែតថ្មីជំនួសអន្ទិត ប៉ុក ចំរើន អតីតអនុគណចាស់ក្រុងប៉ោយប៉ែត ត្រូវបានលាចាកសិក្ខាបទដោយ បង្ខំចិត្តកាលពីពេលកន្លងទៅថ្មីៗនេះ។
លោកបៀវ ថាន ប្រធានមន្ទីរធម្មការនិងកិច្ចការសាសនាខេត្ត ព្រះការរៀបចំជ្រើសរើសរចនាសម្ព័ន្ធដឹកនាំនោះធ្វើទៅតាមឋានានុក្រម គឺព្រះសមណៈភីរ័ត ប៉ោ សុខឿន បច្ចុប្បន្នជាព្រះគ្រូចៅអធិការវត្ត និមិត្តសុធីរាម ហៅវត្តកូនដំរី នាផ្លូវជាតិលេខ៥ភូមិកូនដំរីសង្កាត់ និមិត្តក្រុងប៉ោយប៉ែត-ជាព្រះវិន័យធរអនុគណក្រុង គួរឱ្យឡើងឋាន: ទៅជាព្រះគ្រូអនុគណក្រុងប៉ោយប៉ែត ចាប់ពីថ្ងៃនេះតទៅ ។
លោក បៀវ ថាន ប្រធានមន្ទីរធម្មការនិងសាសនាខេត្តបន្ទាយមានជ័យ បានបញ្ជាក់ឲ្យដឹងថ្ងៃទី២៤ខែមករាឆ្នាំ២០២៤ថា : ព្រះវិជ័យមុនី ធុល សុធាព្រះមេគណខេត្ត និងលោកយឹម សំណាង អភិបាលរងខេត្ត បានបើកកិច្ចប្រជុំជ្រើសរើសនិងតែងតាំងព្រះមន្ត្រីសាលាក្រុងប៉ោយប៉ែតនាខណ:នេះគឺមានភារ:សំខាន់សម្រាប់ធ្វើការដឹកនាំគ្រប់គ្រងគណ:អនុគណក្រុងដែលចាំបាច់ជាបន្តទៀត។
ម្យ៉ាងក្បាលម៉ាស៊ីននេះ ត្រូវតែមានអ្នកដឹកនាំជាបន្ទាន់ជំនួសអ្នកចាស់ ដែលលែងមានជារៀងរហូតផងនិងដើម្បីបញ្ជៀសនូវបាតុភាពអវិជ្ជមានណាមួយកើតឡើងផង។
ព្រះវិជ័យមុនី -រាជាគណ:ធុល សុធាព្រះមេគណខេត្ត និងលោកយឹម សំណាង អភិបាលរងខេត្តបន្ទាយមានជ័យបានមានសង្ឃដីកា និងប្រសាសន៍ផ្តាំផ្ញើដល់ព្រះមន្ត្រីសង្ឃ នៃក្រុងប៉ោយប៉ែតដែលត្រូវបាន ប្រកាសតែងតាំងនៅថ្ងៃនេះសូមរួបរួមគ្នារក្សានូវសុខសន្តិភាពសាមគ្គីផ្ទៃក្នុង រម្ងាប់អធិករណ៍ដែលបម្រុងកើតឬកីកើតមានឡើងព្រោះថា សាមគ្គីភាពគឺជា ចលករនៃភាពស្ងប់ អហិង្សា សន្តិភាព ឯកភាពនិងសាមគ្គីភាព ។
ព្រះមេគណនិងអភិបាលរងខេត្តក៏សុំបិណ្ឌបាត្រនិងសូមព្រះសង្ឃ គណៈអាចារ្យ គណៈកម្មការវត្ត ញោមញាតិពុទ្ធបរិស័ទ សប្បុរសជនទាំងឡាយបន្តចូលរួមលើកកម្ពស់ជំនឿលើព័ទ្ធសាសនា ឧបត្ថម្ភ គាំទ្រនិងជ្រះថ្លានឹងព្រះសង្ឃ ព្រះពុទ្ធសាសានាជារួមបន្តទៀត។
ឯករណីឬរឿងរបស់បុគ្គលព្រះមន្ត្រី/សង្ឃបានប្រព្រឹត្តខុសឆ្គង សូមទុកជារឿងបុគ្គលទៅចុះ ។
ពោលគឺមានការជ្រើសតាំងព្រះមន្រី្តសង្ឃ ក្នុងរចនាសម្ព័ន្ធដឹកនាំ ជាព្រះគ្រូអនុគណ ព្រះវិន័យធរ ព្រះធម្មធរ ព្រះសមុហ៍ និងព្រះលេខាធិការសាលាអនុគណក្រុងប៉ោយប៉ែតទាំងមូល ។
ទោះជាយ៉ាងណា ចំពោះវត្តស្ទឹងបត់នៅមិនទាន់រកបានព្រះគ្រូចៅអធិការវត្តនៅឡើយ ត្បិតអីកាលអង្គប៉ុក ចំរើន គង់នៅ ព្រះអង្គមិនរៀបចំអោយមានរចនាសម្ព័ន្ធដឹកនាំ គ្រប់គ្រងឡើយ។
ពោលគឺមានតែព្រះគ្រូចៅអធិការវរត្ត តែគ្មានព្រះគ្រូសូត្រស្តាំ ព្រះគ្រូសូត្រឆ្វេង លេខា អាចារ្យ គណៈកម្មការ…ច្បាស់លាស់ឡើយ។
ពោលគឺវត្តស្ទឹងបត់និងសាលាអនុគណក្រុងគឺមានតែតួអង្គប៉ុក ចំរើន ដឹកនាំ គ្រប់គ្រងនិងចាត់ចែងផ្តាច់មុខតែ១អង្គឯងប៉ុណ្ណោះ ។
គួររំលឹកថា ក្នុងពេលអញ្ជើញជាអធិបតីបើកវិញ្ញាសារនៃដំណើរការមណ្ឌលសំណេរប្រឡងយកវិញ្ញាបនបត្រពុទ្ធិកបឋមសិក្សាហៅបាលីរង នាពុទ្ធិក:វិទ្យាល័យសម្តេចជា ស៊ីម វត្តស្វាយក្រុងសិរីសោភ័ណកាលពីថ្ងៃទី២០ខែមករាឆ្នាំ២០២៤ លោកអ៊ុំ រាត្រីគាំទ្រជរុញអោយមន្ទីរធម្មការនិងកិច្ចការសាសនានិងគណ:សង្ឃគណខេត្តប្រញាប់ជ្រើសរើសព្រះគ្រូអនុគណក្រុងប៉ោយប៉ែតថ្មីជំនួសតួអង្គចាស់គឺអន្ទិតប៉ុក ចំរើន ដែលបានលាចាកសិក្ខាបទ។
ក្នុងនោះ លោកបង្ហាញអោយជ្រើសរើសព្រះសមណៈភីរ័ត ប៉ោ សុខឿន ព្រះវិន័យធរអនុគណក្រុងប៉ោយប៉ែត ជាបេក្ខភាពសម្រាប់ប្រកួតជ្រើសរើសជាមួយបេក្ខជនផ្សេងផងដែរ។
ព្រះករុណាព្រះសមណាភិរ័ត ប៉ោ សុឃឿន ព្រះអនុគណថ្មីក្រុងប៉ោយប៉ែតមានសង្ឃដីកាថា : សូមប្រគេនពរ និង អរព្រះគុណព្រះប្រធានថេរសភាគណ:សង្ឃខេត្តបន្ទាយមានជ័យ និង លោកប្រធានមន្ទីរធម្មការនិងសាសនាខេត្ត លោកប្រធានក្រុមប្រឹក្សាខេត្ត លោកអភិបាលនៃគណអភិបាលខេត្ត លោកប្រធានក្រុមប្រឹក្សាក្រុង លោកអភិបាលនៃគណ:ភិបាលក្រុងប៉ោយប៉ែត លោកចៅសង្កាត់និមិត្ត ព្រះគ្រូចៅអធិការទាំង២៣វត្តក្នុងក្រុង និងលោកអាចារ្យគណកម្មការ សមាគមអាចារ្យក្រុងប៉ោយប៉ែត ដែលបានសហការគ្នាជ្រេីសយកអាត្មាភាពជាព្រះអនុគណក្រុងប៉ោយប៉ែត
និងក៏ជ្រេីសលេខាធិការបំពេញបន្ថែមប្រអប់ព្រះមន្ត្រីសង្ឃសាលាអនុគណក្រុងប៉ោយប៉ែតអោយពេញប្រអប់ទាំង៥ព្រះអង្គដេីម្បីប្រយោជន៍ក្នុងការបំពេញការងារព្រះពុទ្ធសាសនាអោយបានល្អប្រសេីរ តរៀងទៅ ។
សូមរំលឹកដែរថា អន្ទិតឬអតីតព្រះគ្រូប៉ុក ចំរើន អនុគណក្រុងប៉ោយប៉ែត និងជាព្រះគ្រូចៅអធិការវត្តស្ទឹងបត់នៅភូមិស្ទឹងបត់ភូមិស្ទឹងបត់សង្កាត់ផ្សារកណ្តាលបានប្រកាសលាចាកសិក្ខាបទឬសឹកដោយចំហមួយ ដែលត្រូវធ្វើពិធីនាល្ងាចថ្ងៃទី១៨និងព្រឹកថ្ងៃទី១៩ខែមករាឆ្នាំ២០២៤ ។
ប៉ុន្តែគម្រោងនោះត្រូវខកខានទៅវិញដោយសារមានមហាជនជាច្រើនរង់ចាំមើលមុខព្រះអង្គនេះ ហើយអោយបកស្រាយទាក់ទិនរឿងអាស្រូវផ្លូវភេទរបស់តួអង្គប៉ុក ចំរើន ជាមួយស្ត្រីវ័យក្មេងអាយុ២២ឆ្នាំម្នាក់និងករណីបទល្មើសហិង្សាដោយចេតនាមានស្ថានទម្ងន់(វាយអោយរងរបួស)១ករណីទៀតរបស់តួអង្គនេះលើនេនសង្ឃតូចនៅក្នុងវត្តនេះ សំណុំរឿងនេះជាប់ក្នុងបណ្តឹងនៅតុលាការខេត្តបន្ទាយមានជ័យ។
ហេតុនេះ តួអង្គអន្ទឹតប៉ុក ចំរើន មិនហ៊ានធ្វើពិធីលាចាកសិក្ខាបទដោយចំហទៀតទេ ត្បិតមានលេចឮពាក្យថា :” ព្រះអង្គសឹកពេលណា សមត្ថកិច្ចនឹងចាប់ខ្លួនប៉ុក ចំរើននាពេលនោះក្នុងរឿងវាយអោយរបួស។ឯរឿងអាស្រូវផ្លូវភេទជាមួយស្ត្រីវ័យក្មេង អាចថាដោះស្រាយរួចមួយអន្លើកន្លងមក ដោយតួអង្គរូបនេះបានដោះស្រាយលុយ៣.០០០ដុល្លារអាមេរិកអោយនាងរួចហើយ ” ។
មន្ត្រីមន្ទីរធម្មការនិងគណ:មន្ត្រីសង្ឃសាលាគណខេត្តបានប្រាប់សារព័ត៌មានថា : ហេតុនេះបានជាអតីតចៅអធិការវត្តស្ទឹងបត់និងជាព្រះអនុគណក្រុងប៉ោយប៉ែតបាននិមន្តមកវត្តស្ទឹងបត់ ហើយនិមន្តព្រះគ្រូបាឡាត់គណខេត្ត ណាប់ ម៉ឺន និងព្រះមន្ត្រីសង្ឃ ញោមញាតិមួយចំនួជួយធ្វើកម្មវិធីលាចាកសិក្ខាបទ(សឹក)នាយប់ថ្ងៃទី១៩ខែមករាឆ្នាំ២០២៤វិញ ។
បន្ទាប់មកតួអង្គប៉ុក ចំរើន បានគេចខ្លួនបាត់ទៅ។រីឯកុដិដែលអន្ទិតនេះធ្លាប់គង់នៅ ក៏ចាក់សោមិនអោយព្រះសង្ឃនិងអ្នកផ្សេងចូលដែរ មកទល់ថ្ងៃទី២៦ខែមករានេះ ៕