ដោយ:សុខុម
ភ្នំពេញ ៖គ្រោះថ្នាក់នៅលើដងផ្លូវមួយបានឆក់យកជីវិតបុរសម្នាក់ពេលជិះម៉ូតូដឹកប្រពន្ធកំពុងមានផ្ទៃពោះជ្រុលបុកពីក្រោយរ៉ឺម៉កកាលពីយប់ថ្ងៃទី២៥ខែមករាឆ្នាំ២០២៤ តាមផ្លូវជាតិលេខ៣ សង្កាត់ក្រាំងពង្រ ខណ្ឌដង្កោ រាជធានីភ្នំពេញ។
សមត្ថកិច្ចបានបញ្ជាក់ក្រោយហេតុការណ៍ឲ្យដឹងថា ជនរងគ្រោះមានឈ្មោះ ប៊ិន រិទ្ធ អាយុ៣៥ឆ្នាំ ជាកម្មករសំណង់ រស់នៅបន្ទប់ជួលជិតវត្តព្រៃស្ពឺ សង្កាត់ចោមចៅទី២ និងមានស្រុកកំណើត នៅខេត្តតាកែវ។
ហេតុការណ៍នេះអ្នកលក់ដូរក្បែរកន្លែងកើតហេតុបានប្រាប់ឲ្យដឹងថា ពី ដំបូងគេឃើញបុរសម្នាក់បើកម៉ូតូសណ្តោងរ៉ឺម៉កមួយគ្រឿង ពាក់ផ្លាកលេខ ភ្នំពេញ 1GA-5789 ធ្វើដំណើរតាមបណ្តោយផ្លូវជាតិលេខ៣ ក្នុងទិសដៅពីត្បូងមកជើង។ពេលបើកមកដល់ចំណុចកើតហេតុក៏ឈប់រ៉ឺម៉កនៅលើដងផ្លូវ រួចចុះទៅបត់ជើងតូចនៅក្បែរនោះ។ ពេលនោះជនរងគ្រោះ ជិះម៉ូតូម៉ាកហុងដាឌ្រីមសង់សេ១២៥ ពណ៌ខ្មៅ ពាក់ផ្លាកលេខ តាកែវ1B-0376 ដឹកប្រពន្ធធ្វើដំណើរមកពីក្រោយតាមបណ្តោយផ្លូវជាតិលេខ៣ ទិសដៅស្របគ្នាពីត្បូងមកជើងក្នុងល្បឿនលឿន។ពេលជិះមកដល់ចំណុចកើតហេតុក៏ជ្រុលបុកម៉ូតូសណ្តោងរ៉ឺម៉កពីក្រោយពេញទំហឹងធ្វើឲ្យរ៉ឺម៉កធ្លាក់ចូលទៅចិញ្ចើមផ្លូវ។ជនរងគ្រោះបានបុកនឹងដែករុឺម៉កដួលស្លាប់មួយរំពេច។ ភ្លាមនោះម្ចាស់រ៉ឺម៉ករត់គេចពីកន្លែងកើតហេតុបាត់ស្រមោល។
ក្រោយកើតហេតុភ្លាម នគរបាលក៏បានចុះធ្វើកំណត់ហេតុយករុឺម៉ក់និងម៉ូតូទៅរក្សាទុកនៅប៉ុស្តិ៍ដើម្បីមានចំណាត់ការតាមផ្លូវច្បាប់ជាបន្តទៀត៕