ដោយ៖កំចាយ
កំពត÷ មន្ត្រីក្នុងដែនជំនាញបានអះអាងថា ដោយមានការយកចិត្តទុកដាក់ពីអាជ្ញាធរ មន្ទីរ អង្គភាពពាក់ព័ន្ធលើករណីប្រឈមនឹងកង្វះខាតទឹកសម្រាប់ស្រូវប្រាំងនៅទូទាំងខេត្តកំពតត្រូវបានសង្គ្រោះដោយបញ្ចៀសពីការខូចខាតទាន់ពេលវេលា។
លោក ចាន់ ផេង អនុប្រធានមន្ទីរធនធានទឹក និងឧតុនិយមខេត្តកំពតបានប្រាប់ឱ្យដឹងថា ព្រោះតែកត្តាអាកាសធាតុប្រែប្រួលដោយរដូវប្រាំងអូសបន្លាយរយ:ពេលយូរ និងការកើនកម្តៅខ្លាំង គួបផ្សំពុំមានភ្លៀងកក់ខែផងបានធ្វើឱ្យដំណាំស្រូវរាប់រយហិកតា នៅក្នុងស្រុកកំពង់ត្រាច ស្រុកបន្ទាយមាស និងស្រុកអង្គរជ័យជួបបញ្ហាកង្វះទឹកសម្រាប់ស្រោចស្រពដំណាំ ពិសេសស្រូវប្រាំង។ ទោះជាបែបនេះក្តី ដោយមានការយកចិត្តទុកដាក់ និងណែនាំពីក្រសួងជំនាញ ថ្នាក់ដឹកនាំខេត្ត ព្រមទាំងអាជ្ញាធរពាក់ព័ន្ធបានសហការចុះជួយបូមទឹកជូនប្រជាពលរដ្ឋនៅតំបន់ងាយរងគ្រោះក្នុងស្រុកនីមួយៗចាប់តាំងពីថ្ងៃទី៦ ខែមករា ឆ្នាំ២០២៤ មកម្ល៉េះ។ គិតដល់ថ្ងៃទី២៥ ខែមករា ការបូមទឹកជួយសង្គ្រោះស្រូវប្រាំងសម្រេចបានស្ទើរ១០០ភាគរយហើយនៅក្នុងស្រុកទាំង៣នោះ។
លោក តេង វ៉ាន់ធឿន ប្រធានការិយាល័យក្សេត្រសាស្ត្រ និងផលិតភាពកសិកម្មបានបញ្ជាក់ថា គិតមកដល់ថ្ងៃនេះ មន្ទីរកសិកម្មអស់មានក្តីបារម្ភនូវបញ្ហាខូចខាតស្រូវប្រាំងរបស់ពលរដ្ឋដោយសារកង្វះខាតទឹកទៀតហើយ។ តំបន់ប្រឈមនៅស្រុកទាំង៣ត្រូវបានជួយសង្គ្រោះទាន់ពេលវេលា។
លោកប្រធានការិយាល័យបានបញ្ជាក់ថា គិតត្រឹមថ្ងៃទី២៣ ខែមករា ឆ្នាំ២០២៤ ផ្ទៃដីដំណាំស្រូវប្រាំងទូទាំងខេត្ត ដែលបានបង្កបង្កើនផលអនុវត្តបាន១៣.៤១២ហិកតា ស្មើ១៣៣ភាគរយនៃផែនការ។ មន្ទីជំនាញពាក់ព័ន្ទ រួមទាំងអាជ្ញាធរនៅតែបន្តតាមដានដោយយកចិត្តទុកដាក់ចំពោះការបង្កបង្កើនផលរបស់ប្រជាពលរដ្ឋដោយរង់ចាំអន្តរាគមន៍ឱ្យទាន់ពេលវេលា៕