ប្រែសម្រួល៖ ស-សម្បត្តិ
កាលពីថ្ងៃសៅរ៍ ទី២០ មករា ប៉ូលិសបានឲ្យដឹងថាមានបុរសពីរនាក់ដែលមានអាយុ ២១ និង ២៥ឆ្នាំ ត្រូវបានចាប់ខ្លួនពីបទជាប់ពាក់ព័ន្ធបន្លំធ្វើជាមន្ត្រីចិនដើម្បីប្រព្រឹត្តអំពើចាប់ជំរិតជាដំណាក់កាលៗ។
កងកម្លាំងប៉ូលិសសិង្ហបុរី (SPF) បានឲ្យដឹងថា ជនរងគ្រោះទាំងពីរនាក់ក្នុងសំណុំរឿងនេះត្រូវបានជនសង្ស័យឆបោកនិងជម្រិតយកប្រាក់ជិត ៤៥០,០០០ ដុល្លារសិង្ហបុរីស្មើនឹង ៣៣៥,៨ ដុល្លារអាមេរិក។
ប៉ូលិសដំបូងបានទទួលរបាយការណ៍ពីរដាច់ដោយឡែកពីគ្នាកាលពីថ្ងៃពុធថាមានជនរងគ្រោះជាក្មេងស្ត្រីអាយុ ១៩ ឆ្នាំម្នាក់ និងបុរសវ័យក្មេងអាយុ ២១ ឆ្នាំម្នាក់ត្រូវបានគេចាប់ជំរិត។
ឪពុកម្តាយរបស់ជនរងគ្រោះនៅស្រុកចិន បានទទួលខ្លីបវីដេអូបង្ហាញពីរូបភាពជនរងគ្រោះត្រូវបានគេចងហើយនិងមានសម្លេងជនមិនស្គាល់មុខនិយាយជាភាសាចិនកុកងឺជម្រិតទារប្រាក់ពីឪពុកម្តាយរបស់ជនរងគ្រោះជាថ្នូរនឹងការដោះលែងពួគេទាំងពីរនាក់។
ឪពុកម្តាយរបស់ជនរងគ្រោះបានទាក់ទងទៅមិត្តភ័ក្តិរបស់ពួកគេនៅប្រទេសសិង្ហបុរី ដែលជាអ្នករាយការណ៍ពីឧប្បត្តិហេតុនេះទៅប៉ូលីស។ ប៉ូលិសបានតាមដានជនរងគ្រោះ ហើយនៅទីបំផុតប៉ូលិសក៏បានរកឃើញពួកគេដែលកំពុងនៅក្នុងដៃជនដែលបន្លំខ្លួនធ្វើជាមន្ត្រីចិន។
បើយោងតាមប៉ូលិសសិង្ហបុរី SPFបានឲ្យដឹងថា ករណីទី១ នារីរងគ្រោះអាយុ ១៩ឆ្នាំ បានទទួលការហៅទូរសព្ទដោយមិនបានស្នើសុំកាលពីថ្ងៃទី ៣១ ខែតុលា តាមប្រភពជនឆបោកដែលក្លែងជាមន្ត្រីអន្តោប្រវេសន៍។ នៅក្នុងពេលនោះនាងត្រូវបានជនឆបោកទីមួយបញ្ជូនទៅឲ្យជនឆបោកម្នាក់ទៀតដែលអះអាងថាជាប៉ូលិសមកពីស្រុកចិន។
ជនឆបោកដែលបន្លំធ្វើជាមន្ត្រីចិនរូបនោះបានក្លែងធ្វើជាចោទប្រកាន់នាងថា មានព័ត៌មានពិសេសថានាងត្រូវបានគេប្រើដើម្បីចុះឈ្មោះកាតធនាគារសម្រាប់សកម្មភាពលាងលុយកខ្វក់ក្នុងស្រុកចិន។
នាងក៏ត្រូវបានគេកុហក់ថា ដើម្បីជៀសវាងពីការចាប់ខ្លួន និងត្រូវនិរទេសចេញពីសិង្ហបុរី នាងត្រូវបង់ប្រាក់ដើម្បីធានាខ្លួននៅក្រៅឃុំ និងដើម្បីដោះស្រាយរឿក្តីនេះផងដែរ។ ក្រោយមក នាងក៏បានផ្ទេរប្រាក់ជាង ២៣០,០០០ ដុល្លារសិង្ហបុរី ទៅក្នុងគណនីធនាគាររបស់ជនសង្ស័យដែលបន្លំខ្លួនធ្វើជា “ប៉ូលីសចិន” ។
ជនរងគ្រោះក៏ត្រូវបានជនឆបោកទីមួយប្រាប់ឲ្យរាយការណ៍ទៅ “ជនឆបោកទីពីរដែលបន្លំជាប៉ូលីសមកពីស្រុកចិន” តាមរយៈការហៅជាវីដេអូតាមទូរសព្ទដៃរបស់នាង ៥ ដងជារៀងរាល់ថ្ងៃ ដោយប្រាប់នាងថាគឺជាផ្នែកមួយនៃការស៊ើបអង្កេតដែលកំពុងបន្ត។
នៅដើមខែមករា ជនឆបោករូបនេះបានសុំឲ្យនាងសហការក្នុងការស៊ើបអង្កេតដោយថតវីដេអូដែលខ្លួននាងត្រូវបានចង ហើយធ្វើពុតថានាងត្រូវបានគេចាប់ខ្លួន។ នាងត្រូវបានគេប្រាប់ថាវីដេអូនេះនឹងត្រូវប្រើដើម្បីផ្សព្វផ្សាយការយល់ដឹងអំពីអំពើឆបោក។
ជនឆបោកបានរៀបចំថតជាវីដេអូ ដោយសម្រាប់ការថតដោយជនឆបោកទីពីរអាយុ ២៥ ឆ្នាំ ម្នាក់ទៀតជាអ្នករៀបចំសម្រាប់ការថតឆុតឆាកនេះហើយក៏បានធ្វើសកម្មភាពក្លែងជាចាប់ជំរិតដោយយកកាំបិត គុគរី ភ្ជង់មកលើនារីរងគ្រោះ ដើម្បីធ្វើឲ្យសកម្មភាពក្លែងជាចាប់ជម្រិតនេះឲ្យកាន់តែមានភាពទាក់ទាញនិងជឿជាក់ថាវាពិតប្រាកដមែន។
នៅប្រហែលមួយសប្តាហ៍ក្រោយមក ជនឆបោកបានកុហក់នារីរងគ្រោះឲ្យនៅដាច់ដោយឡែកក្នុងផ្ទះមួយដោយកុហក់ថាដើម្បីរក្សាសុវត្ថិភាពឲ្យនាងករណីត្រូវបានរៀបចំឡើងដោយជនឆបោកទីពីរអាយុ ២៥ ឆ្នាំដដែល ហើយហាមមិឲ្យនាងទាក់ទងជាមួយអ្នកដទៃ រួមទាំងឪពុកម្តាយរបស់នាងផងដែរ ដើម្បីជួយសម្រួលដល់ការស៊ើបអង្កេតរបស់ពួកគេ។ហើយនៅទីបំផុតនារីរងគ្រោះអាយុ១៩ឆ្នាំរូបនេះ ត្រូវបានកម្លាំងប៉ូលិសសិង្ហបុរី SPF រកឃើញនាង។
ចំណែកនៅក្នុង ករណីទី២ គឺជនរងគ្រោះ ភេទប្រុស អាយុ ២១ឆ្នាំ បានទទួលទូរសព្ទហៅចូលដោយមិនមានការស្នើសុំមួយ កាលពីដើមខែវិច្ឆិកា ដោយកុហក់គាត់ឲ្យទៅជួបមន្ត្រីចិនក្លែងក្លាយជា ICAមកពីស្រុកចិន ហើយជនឆបោកបន្តកុហក់គាត់ថាគាត់ត្រូវបានមន្ត្រីចិន ICAនេះ រាយការណ៍ថាជនរងគ្រោះត្រូវបានគេប្រាប់មន្ត្រីចិន ICA ថាគាត់មានលេខទូរសព្ទចិនដែលជាប់ទាក់ទងនឹងការរីករាលដាលនៃពាក្យចចាមអារ៉ាមដែលទាក់ទងនឹង COVID-19 នៅក្នុងប្រទេសចិន។
បន្ទាប់មកគាត់ត្រូវបានជនឆបោកទីមួយក៏បញ្ជូនគាត់ទៅកាន់ជនឆបោកទីពីរម្នាក់ទៀតដែលបន្លំខ្លួនធ្វើជាប៉ូលីសមកពីស្រុកចិន ដែលជនឆបោកទីមួយបានកុហក់គាត់នៅមុនពេលមកជួបជនឆបោកទីពីរនេះថាប៉ូលីសចិនបានចោទប្រកាន់គាត់ពីបទពា់ព័ន្ធនិងសកម្មភាពលាងលុយកខ្វក់។
ជនឆបោកទាំងពីរនាក់បានរៀបចំសម្តែងដូចគ្នានិងករណីទីមួយដែរ គឺជនរងគ្រោះជាបុរសម្នាក់នោះក៏ត្រូវគេបោកប្រាស់ថាឲ្យគាត់រាយការណ៍ទៅ “ប៉ូលីសចិន” តាមរយៈសារ និងការហៅជាវីដេអូតាមកម្មវិធីផ្ញើសារនៅលើទូរសព្ទរបស់គាត់ចំនួនប្រាំដងក្នុងមួយថ្ងៃដើម្បីសហការក្នុងការស៊ើបអង្កេត។
បន្ទាប់មក ជនរងគ្រោះត្រូវបានគេបោកប្រាស់ឲ្យផ្ទេរប្រាក់ប្រហែល ២១៥,០០០ដុល្លារសិង្ហបុរី ទៅគណនីធនាគារដែលផ្តល់ដោយជនឆបោក ក្រោមលេសថា ដើម្បីធានាខ្លួននៅក្រៅឃុំ។
កាលពីដើមខែមករា ជនឆបោកក៏បានសុំឲ្យបុរសរងគ្រោះថតវីដេអូដោយធ្វើជាក្លែងចងខ្លួនគាត់ និងសម្តែងថាគាត់ត្រូវបានគេចាប់ជម្រិត ដោយកុហក់គាត់ថាជាការសម្តែងដើម្បីអប់រំអំពីអំពើឆបោក។
ដូចគ្នានឹងករណីទីមួយដែរគឺជនសង្ស័យអាយុ២៥ឆ្នាំម្នាក់បានរៀបចំឈុតឆាកសម្តែងក្នុងការក្លែងធ្វើជាចាប់ជំរិតដោយយកកាំបិតគុគរីភ្ជង់ទៅលើបុរសរងគ្រោះហើយគម្រាមទារថ្លៃលោះខ្លួន ។ តាមការពិនិត្យរបស់ប៉ូសិសឃើញថាជនរងគ្រោះមានស្នាមជាំពាសពេញខ្លួន។ក្រោយមកជនឆបោកបានប្រាប់ជនរងគ្រោះឲ្យនៅដាច់ដោយឡែកក្នុងផ្ទះដែលជួលដោយជនឆបោក ហើយនៅទីបំផុតជនរងគ្រោះដែលជាបុរសអាយុ២១ឆ្នាំ ត្រូវបានកម្លាំងប៉ូលិសសិង្ហបុរី (SPF) រកឃើញគាត់។
ជនរងគ្រោះទាំងពីរនាក់មិនបានដឹងថា ជនឆបោកបានផ្ញើខ្លីបវីដេអូដែលជនឆបោកបានកុហក់ថាជាការសម្តែងដើម្បីអប់រំអំពីអំពើឆបោកទៅឲ្យឪពុកម្តាយរបស់ពួកគេបានឃើញ ដើម្បីជម្រិតទារប្រាក់លោះនោះទេ។
យោងតាមការស៊ើបអង្កេតបឋមប៉ូលិសសិង្ហបុរី SPFបានឲ្យដឹងថា ជនរងគ្រោះទាំង២នាក់នេះបានធ្វើតាមការបោកប្រាស់របស់ជនឆបោកទាំងអស់។ ជនឆបោកបានផ្តូរទូរសព្ទរបស់ជនរងគ្រោះជាមួយនឹងទូរសព្ទដៃថ្មី និងស៊ីមកាតថ្មី ដើម្បីបិទបាំងមិនឲ្យនរណាម្នាក់ទាក់ទងជនរងគ្រោះបានក្រៅពីពួគេដែលជាជនឆបោក។
វត្ថុតាងដែលរឹបអូសបានមានដូចជា កាំបិទគុគគ្រី និងខ្សែចងដែលប្រើប្រាស់ក្នង់ការថតវីដេអូចំណែកការស៊ើបអង្កេតរបស់ប៉ូលិសកំពុងបន្តទៅតាមនីតិវិធី។
ប៉ូលិសបានក្រើនរំលឹកដល់សាធារណជនថា ភ្នាក់ងារអនុវត្តច្បាប់នៅក្រៅប្រទេសមិនមានយុត្តាធិការនៅក្នុងប្រទេសសិង្ហបុរីទេ។ ពួកគេមិនអាចធ្វើប្រតិបត្តិការ ចាប់ខ្លួននរណាម្នាក់ ឬស្នើសុំជំនួយដោយគ្មានការយល់ព្រមពីរដ្ឋាភិបាលសិង្ហបុរីនោះទេ។
ប៉ូលីសសិង្ហបុរី SPF បាននិយាយថា “ប៉ូលីសប្រកាន់គោលជំហរយ៉ាងម៉ឺងម៉ាត់ប្រឆាំងនឹងជនណាម្នាក់ដែលមានជាប់ពាក់ព័ន្ធនឹងអំពើបោកប្រាស់ បើទោះបីជាដោយចេតនា ឬដោយអចេតនាក៏ដោយ ហើយពួកគេនឹងត្រូវបានបង្រ្កាបស្របតាមច្បាប់យ៉ាងម៉ឺងម៉ាត់ “។
ជនដែលត្រូវបានរកឃើញថាមានពិរុទ្ធភាពពីបទក្លែងបន្លំអាចត្រូវជាប់ពន្ធនាគាររហូតដល់ ១០ ឆ្នាំ និងពិន័យជាប្រាក់ ខណៈដែលអ្នកដែលត្រូវបានរកឃើញថាមានពិរុទ្ធភាពពីបទប្រើប្រាស់អាវុធអាចប្រឈមនឹងការជាប់ពន្ធនាគាររហូតដល់ ៥ ឆ្នាំ និងយ៉ាងហោចណាស់ត្រូវវាយនឹងថ្នាំងអំពៅចំនួន ៦ ដងផងដែរ៕
ប្រភព៖ CNA/ec(g)