ប្រែសម្រួល៖ សហការី
កាលពីឆ្នាំមុនការនាំចូលទុរេនរបស់ចិនបានកើនឡើង តែផ្ទុយទៅវិញប្រទេសថៃដែលជាអ្នកផ្គត់ផ្គង់ទុរេនរបស់ចិនដ៏ធំជាងគេបាននឹងកំពុងតែបាត់បង់ចំណែកទីផ្សារនាំចូលទុរេនទៅកាន់ប្រទេសចិនដែលជាអ្នកទទួលទិញផ្លែឈើមកពីតំបន់ត្រូពិចដ៏ធំជាងគេលើពិភពលោក។ គឺដោយសារតែឥឡូវនេះចិនបានបើកឱកាសឲ្យវៀតណាមនិងហ្វីលីពីនប្រកួតប្រជែងលើទីផ្សារនាំចូលទុរេនទៅកាន់ប្រទេសខ្លួន។
យោងតាមទិន្នន័យរបស់ដ្ឋបាលសាធារណ:របស់ប្រទេសចិនបានបង្ហាញឲ្យឃើញថា នៅក្នុងឆ្នាំ ២០២៣ ចិនបាននាំចូលទុរេនចំនួន ១.៤ លានតោន គឺកើនឡើង ៦៩ ភាគរយបើធៀបនឹងឆ្នាំមុនៗ។
ចំណែកការនាំចូលពីប្រទេសថៃបានធ្លាក់ចុះពី ១០០ ភាគរយមកនៅត្រឹម ៩៥.៣៦ ភាគរយនៅក្នុងឆ្នាំ ២០២១ ហើយនៅមួយឆ្នាំក្រោយមករហូតមកដល់ឆ្នាំ២០២៣ក៏បានធ្លាក់ចុះដល់ ៦៧.៩៨ ភាគរយ ។
វៀតណាមបានដណ្តើមចំណែកទីផ្សារនាំចូលពីថៃបន្ទាប់ពីចិនបានចាប់ផ្តើមបើកឱកាសឲ្យក្រុមហ៊ុននាំចេញរបស់វៀតណាមនាំចូលទុរេនស្រស់ទៅកាន់ប្រទេសខ្លួនតាំងពីឆ្នាំ ២០២១កន្លងមក។
នៅមុនឆ្នាំ២០២១ការនាំចេញទុរេនរបស់វៀតណាមទៅកាន់ប្រទេសចិនគឺស្ថិតនៅក្នុងកម្រឹតដ៏ទាបបំផុតដោយមានចំនួនត្រឹមតែ ៤.៦ ភាគរយដែលមានតម្លៃសរុបត្រឹមតែ ១៨៨.១ លានដុល្លារ។ តែនៅក្នុងឆ្នាំ ២០២២ រហូតមកដល់ឆ្នាំ២០២៣កន្លងទៅនេះ ការនាំចេញទុរេនរបស់វៀតណាមបានកើនឡើងដល់ ៣១.៨ ភាគរយ ដែលមានតម្លៃសរុបដល់ទៅ ២.១ ពាន់លានដុល្លារអាមេរិក។
អង្គការស្បៀងអាហារ និងកសិកម្មរបស់អង្គការសហប្រជាជាតិបានប្រកាសឲ្យដឹងថា ការនាំចេញផ្លែឈើរបស់វៀតណាមនៅលើទូទាំងពិភពលោកបានឈានដល់ ៤.៩ ភាគរយនៃបរិមាណសរុបនៅក្នុងឆ្នាំ ២០២២ ក្នុងទំហំ ៤០.៨៨ លានគីឡូក្រាម អង្គការនេះបញ្ជាក់ថាចំណែកហ៊ុននៅលើទីផ្សាររបស់វៀតណាមគឺតិចជាង ១ ភាគរយកាលពីឆ្នាំមុន និងសូន្យភាគរយនៅមុនឆ្នាំ២០២២។
យោងតាមនាយកដ្ឋានព័ត៌មានរបស់វៀតណាមបានព្យាករកាលពីសប្តាហ៍មុនថានឹងមានកំណើនដល់ ៣.៥ ពាន់លានដុល្លារអាមេរិកសម្រាប់ចំណូលដែលបានមកពីការនាំចេញទុរេននៅក្នុងឆ្នាំនេះដែលបានកើនឡើងដល់ ៥៥ ភាគរយបើធៀបនឹងឆ្នាំមុនហើយបាននាំមុខគេនៅលើទីផ្សាររបស់ចិន។
HSBC បាននិយាយនៅក្នុងរបាយការណ៍ស្រាវជ្រាវមួយកាលពីឆ្នាំមុនថាវៀតណាមនាំចេញទុរេនទៅកាន់ប្រទេសចិនបានដល់ទៅជាង ៩០ ភាគរយ។
ទុរេនបានក្លាយជាវត្ថុដ៏មានតម្លៃសម្រាប់ពលរដ្ឋចិនវណ្ណៈកណ្តាល បើទោះបីជាមានអ្នកខ្លះមិនចូលចិត្តក្លិនរបស់វាក៏ដោយ ក៏ផ្លែឈើដែលមានបន្លានេះនៅតែមានតម្លៃខ្ពស់លើទីផ្សារចិន ហើយអ្នកកាន់សាសនាជាច្រើនបានហៅវាថាជា “ស្តេចផ្លែឈើ” ។
អ្នកវិទ្យាសាស្ត្រនយោបាយនៅសកលវិទ្យាល័យ Fulbright ប្រទេសវៀតណាមលោក Nguyen Thanh Trung បាននិយាយថា កសិករវៀតណាមជាច្រើនបាននាំគ្នាដាំដំណាំឡើងវិញ និងទិញឧបករណ៍ថ្មីៗដើម្បីប្តូរទៅដាំទុរេន។
លោក Nguyen បានបន្ថែមថា៖ “ កសិករវៀតណាមដឹងពីរបៀបផ្លាស់ផ្តូរដំណាំ និងពន្យារការប្រមូលផល”។ លោកបន្តថា៖ “ទុរេនត្រូវបានគេចាត់ទុកថាជាដំណាំសាច់ប្រាក់នៅប្រទេសវៀតណាម ហើយវាអាចនាំមកនូវអត្ថប្រយោជន៍ជាច្រើន៉ ហើយកសិករដឹងពីរបៀបបង្កើនឱកាសសម្រាប់ពួកគេ”។
ប្រទេសហ្វីលីពីនក៏បានទទួលចំណែកទីផ្សារផងដែរ កាលពីមួយឆ្នាំមុននៅក្នុងខែនេះ។ ប្រទេសចិនបានបើកឱកាសឲ្យហ្វីលីពីនចាប់ផ្តើមនាំចូលផ្លែទុរេនស្រស់ ដែលមានដាំយ៉ាងច្រើននៅលើដីភ្នំភ្លើងភ្នំ Apo លើកោះ Mindanao ភាគខាងត្បូងនៃប្រទេសហ្វីលីពីន៕
ប្រភព៖ South China Morning Post/rl