សន្ដិសុខសង្គម

សមត្ថកិច្ចបង្ហាញគ្រឿងញៀន៣គីឡូក្រាមដែលជួញដូរឆ្លងដែនបង្កប់តាមកញ្ចប់បញ្ញើ

ដោយ:សុខុម
ភ្នំពេញ៖ នៅព្រឹកថ្ងៃទី២១ខែមករាឆ្នាំ២០២៤កម្លាំងសមត្ថកិច្ចជំនាញប្រឆាំងគ្រឿងញៀនបង្ហាញឲ្យដឹងពីភស្តុតាងរឹបអូសបានគ្រឿងញៀន៣គីឡូក្រាមក្រោមរូបភាពជួញដូរ-ដឹកជញ្ជូនឆ្លងដែនបង្កប់តាមកញ្ចប់បញ្ញើ។
សមត្ថកិច្ចបានឲ្យដឹងថាជំនាញមន្ទីរប្រឆាំងបទល្មើសគ្រឿងញៀន បានសហការជាមួយកម្លាំងគយព្រលានយន្តហោះអន្តរជាតិភ្នំពេញ បង្ក្រាបករណីជួញដូរ និងដឹកជញ្ជូនគ្រឿងញៀនឆ្លងដែន ដែលបង្កប់តាមកញ្ចប់បញ្ញើពីកម្ពុជា ទៅអូស្ត្រាលីចំនួន ២ករណី រឹបអូសបានថ្នាំញៀនជិត ៣គីឡូក្រាម។


សមត្ថកិច្ចបានបញ្ជាក់ថានៅថ្ងៃទី១០ ខែមករា ឆ្នាំ២០៤ កម្លាំងជំនាញ (ក១០) មន្ទីរប្រឆាំងបទល្មើសគ្រឿងញៀន សហការជាមួយកម្លាំងគយប្រចាំ ព្រលានយន្តហោះភ្នំពេញ បានត្រួតពិនិត្យកេសបញ្ញើមួយ និងនៅថ្ងៃទី១៩ ខែមករា ឆ្នាំ២០២៤ កម្លាំងជំនាញ (ក១០) សហការជាមួយក្រុមហ៊ុន Embassy freight express co,ltd និងក្រុមហ៊ុន ១៦៨ Logistics chains co,ltd បានធ្វើការត្រួតពិនិត្យកេសបញ្ញើមិនប្រក្រតីមួយទៀត។ ជាលទ្ធលនៃការចុះបង្ក្រាបទាំង២ទីតាំងនេះ កម្លាំងជំនាញបានចាប់យកសារធាតុញៀនហេរ៉ូអ៊ីន ទម្ងន់ ២,៧៥២.៩៦ក្រាម (២គីឡូ និង៧៥២.៩៦ក្រាម)។
ក្រោយពីរឹបអូសបានគ្រឿងញៀនកម្លាំងជំនាញកំពុងបន្តស្រាវជ្រាវរកបុគ្គលអ្នកពាក់ព័ន្ធ និងចាប់ខ្លួនមេក្លោងមកផ្តន្ទាទោស។ជាមួយនោះវត្ថុតាងថ្នាំញៀន ត្រូវបានកសាងសំណុំរឿងបញ្ជូន ទៅសាលាដំបូងរាជធានីភ្នំពេញ ដើម្បីបន្តនីតិវិធី៕