ប្រែសម្រួល៖ ស-សម្បត្តិ
TEL AIVV៖កាលពីថ្ងៃសៅរ៍ ទី ២០ មករា ប្រជាជនអ៊ីស្រាអែលរាប់ពាន់នាក់បានចេញមកប្រមូលផ្តុំគ្នាក្នុងក្រុង Tel Aviv ទាមទារឲ្យផ្លាស់ផ្តូររដ្ឋាភិបាលរលោកនាយករដ្ឋមន្ត្រី Benjamin Netanyahu ដោយចោទមេដឹកនាំជើងចាស់រូបនេះថាបានធ្វើឲ្យខូចសន្តិសុខក្នុងប្រទេស និងអំពាវនាវឲ្យមានការបោះឆ្នោតជាថ្មី។
ការផ្ទុះឡើងនូវបាតុកម្មប្រឆាំងនឹងរដ្ឋាភិបាលបានអង្រួនប្រទេសនេះឲ្យរង្គោះរង្គើផ្ទៃក្នុងចាប់តាំងពីឆ្នាំ ២០២៣ដែលបង្កឡើងដោយការចូលឆ្មក់វាយប្រហាររបស់ក្រុមជីវពលហាម៉ាស់នៅភាគខាងត្បូងអ៊ីស្រាអែលកាលពីថ្ងៃទី ៧ ខែតុលាឆ្នាំ ២០២៣។ ទិដ្ឋភាពប្រេះឆាផ្ទៃក្នុងនយោបាយត្រូវបានលោក Netanyahu មើលរំលងនៅចំពេលដែលពលរដ្ឋអ៊ីស្រាអែលបាននិងកំពុងប្រមូលផ្តុំគ្នាប្រឆាំងនឹងរដ្ឋាភិបាលរបស់លោកដោយស្នើឲ្យយោធាអ៊ីស្រាអែលយកចិត្តទុកដាក់ឲ្យបានខ្ពស់ចំពោះសុវត្ថិភាពពលរដ្ឋនិងសោកនាដកម្មនៃក្រុមគ្រួសារអ្នកដែលត្រូវបានសម្លាប់នៅក្នុងការវាយប្រហាររបស់ក្រុមជីវពលហាម៉ាស់និងជោគវាសនាអ្នកដែលត្រូវបានក្រុមជីវពលហាម៉ាសចាប់ធ្វើជាចំណាប់ខ្មាំង។
សង្គ្រាមដ៏សាហាវឃោរឃៅដែលកំពុងបន្តបំផ្លិចបំផ្លាញក្នុងតំបន់ហ្គាហ្សារហូតមកដល់ខែទី ៤ បង្កឡើងដោយកងយោធាអ៊ីស្រាអែលបើយោងតាមការស្ទង់មតិបានបង្ហាញឲ្យឃើញថាមានការគាំទ្រតិចតួចសម្រាប់លោក Netanyahu ហើយពួកគេបានអំពាវនាវកាន់តែខ្លាំងឡើងឲ្យផ្លាស់ប្តូរប្រមុខដឹកនាំប្រទេស។ នេះជាកត្តាឆ្លុះបញ្ចាំងនៅក្នុងការស្ទង់មតិកាលពីយប់ថ្ងៃសៅរ៍នៅទីលានកណ្តាលក្រុង Tel Aviv ដែលមានពលរដ្ឋប្រមូលផ្តុំគ្នាធ្វើការតវ៉ាយ៉ាងច្រើនឡើងតាំងពីឆ្នាំមុនរហូតមកទល់នឹងពេលនេះ។
ក៏ប៉ុន្តែហ្វូងមនុស្សដែលប្រមូលផ្តុំគ្នាក្នុងពេលនេះមានចំនួនតិចជាងកាលពីឆ្នាំមុន តែមិនក្រោមរាប់សិបពាន់នាក់នោះទេ ដោយមានទាំងអ្នកវាយស្គរ ស្រែកទ្រហោយំ និងគ្រវីទង់ជាតិអ៊ីស្រាអែលនៅលើទីលានកណ្តាលក្រុង Tel Aviv ។
បងស្រីទាហានអ៊ីស្រាអែលម្នាក់ឈ្មោះ Noam Alon បាននិយាយថា “រដ្ឋាភិបាលដែលមើលរំលងពួកយើងក្នុងព្រឹត្តិការណ៍ឆ្មក់វាយប្រហារដោយក្រុមជីវពលហាម៉ាស់នៅថ្ងៃទី ៧ ខែតុលា គឺនៅតែបន្តបោះបង់ពួកយើងចោលរហូតមកដល់ថ្ងៃនេះ ចាប់តាំងពីពួកគេត្រូវបានជម្លៀសចេញពីភាគខាងជើង និងភាគខាងត្បូង ព្រំដែន ដូចជាក្រុមគ្រួសារជនរងគ្រោះ និងជោគវាសនាចំណាប់ខ្មាំង”។
នាងបាននិយាយពីនៅលើវេទិការថា៖ “អំណាចដែលនៅក្នុងដៃរបស់យើងគឺទាមទារឲ្យមានការបោះឆ្នោតដើម្បីផ្លាស់ប្តូររដ្ឋាភិបាលដឹកនាំដោយលោក Netanyahu ។ “រដ្ឋាភិបាលនេះត្រូវតែឲ្យត្រឡប់ទៅដេកនៅផ្ទះឥឡូវនេះ!”។
ហើយហ្វូងបារតុករបានបន្ទរតាមកន្ទុយពាក្យរបស់នាងដោយស្រែកខ្លាំងៗថា: “និងហើយឥឡូវនេះ! “។
ក្នុងទិដ្ឋភាពជារួមបានបង្ហាញឲ្យឃើញអំពីការបែកបាក់គ្នាបានលេចឡើងនៅក្នុងចំណោមសមាជិក គណៈរដ្ឋមន្ត្រីរបស់គាត់តែ លោក Netanyahu នៅតែមានមហិច្ឆតាកាន់អំណាចជាបន្តទៀត។
មេដឹកនាំគណបក្សប្រឆាំងបានស្នើសុំឲ្យមានការបង្កើតរដ្ឋាភិបាលរួបរួមជាតិមួយដែលមិនត្រូវបានដឹកនាំដោយលោក Netanyahu ប៉ុន្តែមិនទទួលបានការគាំទ្រនោះទេ៕
ប្រភព៖ Reuters/zl