ប្រែសម្រួល៖ ស-សម្បត្តិ
ក្នុងសំណុំរឿងលាងលុយជាង៣ពាន់លានដុល្លារសិង្ហបុរីដែលត្រូវបានប៉ូលិសបើកកិច្ចប្រតិបត្តិការ បង្ក្រាបកាលពីឆ្នាំមុនឃើញថា មានជាប់ពាក់ព័ន្ធនឹងមនុស្សពីរនាក់បន្ថែមទៀតដែលឥឡូវនេះអាជ្ញាធរសិង្ហបុរីកំពុងតែស្វែងរកចាប់ខ្លួនជនសង្ស័យទាំងពីរនាក់នោះ។
កាលពីថ្ងៃសុក្រ ទី១៩ មករា ឆ្នាំ២០២៤ ប៉ូលិសបាននិយាយថា ទាក់ទងនឹងសំណុំរឿងនេះដីកាចាប់ខ្លួន និងលិខិតក្រហមរបស់ Interpol ត្រូវបានចេញរួចរាល់ហើយដើម្បីតាមចាប់ខ្លួនជនសង្ស័យទាំងពីរនាក់នោះដែលបានចូលសញ្ជាតិខ្មែរមានឈ្មោះថា Su Yongcan អាយុ ៣៣ ឆ្នាំ និង Wang Huoqiang អាយុ ២៩ ឆ្នាំ ជាប់ពាក់ព័ន្ធនឹងបទល្មើសលាងលុយកខ្វក់មានតម្លៃសរុបនៃទ្រព្យសម្បត្តិដែលត្រូវបានរឹបអូស ឬបង្កក បានកើនឡើងដល់ជាង ៣ ពាន់លានដុល្លារសិង្ហបុរីស្មើនឹង ២.២ ពាន់លានដុល្លារអាមេរិក។
ជនសង្ស័យទាំងពីរនាក់នោះបានចាកចេញពីប្រទេសសិង្ហបុរី នៅមុនពេលប៉ូលិសបើកកិច្ចប្រតិបត្តិការបង្ក្រាបលើករណីលាងលុយកខ្វក់ដែលបានចាប់ផ្តើមនៅថ្ងៃទី ១៥ ខែសីហា ឆ្នាំ ២០២៣កន្លងទៅ។
កងកម្លាំងប៉ូលិសសិង្ហបុរី (SPF) បាននិយាយនៅក្នុងសេចក្តីប្រកាសព័ត៌មានថា ដីការក្សាការពារអចលនទ្រព្យចំនួន ៥៥ ប្រភេទផ្សេងទៀត និងយានជំនិះចំនួន ១៥ គ្រឿងដែលពាក់ព័ន្ធនឹងករណីនេះត្រូវបានចេញរួចរាល់ហើយហាមមិនឲ្យមានការជួញដូរដាច់ខាត។
សម្ភាររួមមានកាបូបប្រេនៗចំនួន ១៨៩ គ្រឿងអលង្ការ ៣៤ ដុំ និងនាឡិកាប្រេនៗចំនួន ៥ គ្រឿង ក៏ត្រូវបានរឹបអូសផងដែរ។
កងកម្លាំងប៉ូលិសសិង្ហបុរី SPF បានគូសបញ្ជាក់ថា “តម្លៃសរុបនៃទ្រព្យសម្បត្តិដែលរឹបអូសជាង ៣ ពាន់លានដុល្លារសិង្ហបុរីត្រូវបានរឹបអូសនិងបង្កកមិនឲ្យមានការជួញដូររហូតមកទល់បច្ចុប្បន្ន” ។
ពាក់ព័ន្ធនឹងជនសង្ស័យដែលចូលសញ្ជាតិខ្មែរមានឈ្មោះថា Su Yongcan ដែលធ្លាប់កាន់លិខិតឆ្លងដែនចេញដោយប្រទេសចិន មានសាច់ប្រាក់ជាង ១៦ លានដុល្លារសិង្ហបុរី និងរូបិយប័ណ្ណបរទេសផ្សេងទៀតត្រូវបានរឹបអូស។ ដោយឡែករថយន្តចំនួន ៧គ្រឿង និងរថយន្តផ្សេងពីនេះទៀតចំនួន ១០គ្រឿងត្រូវបានរឹបអូស។
ប៉ូលិសក៏បានបង្កកគណនីធនាគារដែលមានសមតុល្យសរុបជាង ១៤៥ លានដុល្លារសិង្ហបុរី។
ចំណែកលោក Wang Huoqiang ដែលចូលសញ្ជាតិខ្មែរធ្លាប់កាន់លិខិតឆ្លងដែនចិនដែរ ប៉ូលិសបានរឹបអូសសាច់ប្រាក់ប្រហែល ១៨៨.០០០ ដុល្លារសិង្ហបុរី និងរូបិយប័ណ្ណបរទេសផ្សេងទៀត ហើយបានរឹបអូសយានយន្តមួយគ្រឿងផងដែរ។
គណនីធនាគារដែលមានសមតុល្យសរុបជាង ៥ លានដុល្លារសិង្ហបុរី ក៏ត្រូវបានបង្កកផងដែរ។
កងកម្លាំងប៉ូលិសសិង្ហបុរី SPF បានបន្ថែមថា ពលរដ្ឋណាដែលដឹងពីកន្លែងលាក់ខ្លួនរបស់ជនសង្ស័យទាំងពីរនាក់នោះ សូមទាក់ទងតាមបណ្តាញទូរសព្ទបន្ទាន់របស់ប៉ូលិសដែលមានលេខៈ ១៨០០ ២៥៥ ០០០០ ឬបញ្ជូនព័ត៌មានតាមអ៊ីនធឺណិតក៏បានដូចគ្នា។
- អំពីប្រតិបត្តិការបំបែកសំណុំរឿងនេះ
មកដល់ពេលនេះមនុស្សចំនួន ១០នាក់ ដែលជាប់សង្ស័យថាមានជាប់ពាក់ព័ន្ធនឹងករណីលាងលុយកខ្វក់ដ៏ធំមួយនេះ ត្រូវបានចាប់ខ្លួននៅក្នុងការឆ្មក់បកង្ក្រាបដំណាលគ្នានៅទូទាំងប្រទេសសិង្ហបុរីកាលពីថ្ងៃ ១៥ ខែសីហា ឆ្នាំ២០២៣ កន្លងទៅ។ ការបកង្ក្រាបនេះធ្វើឡើងនៅ Good Class Bungalows ខុនដូ និងដីមួយកន្លែងក្នុងប្រទេសសិង្ហបុរី។
ជនសង្ស័យទាំង១០នាក់នោះត្រូវបានចាប់ខ្លួននៅតាមគេហដ្ឋានរបស់ពួកគេរៀងៗខ្លួនក្នុងតំបន់មួយចំនួនដូចជា Sentosa Cove, Tanglin, Orchard, Holland និង River Valley ក្នុងប្រទេសសិង្ហបុរី។
ចាប់តាំងពីមានការលេចឮដំណឺងជាសាធារណៈលើកដំបូងថា តម្លៃនៃទ្រព្យសម្បត្តិដែលត្រូវបានរឹបអូស ឬត្រូវបង្កកទាក់ទងនឹងករណីនេះមានចំនួនត្រឹមតែ១ ពាន់លានដុល្លារសិង្ហបុរីទេ។ តែឥឡូវនេះវាបានកើនឡើងបីដងនៃតម្លៃដើម ១ ពាន់លានដុល្លារសិង្ហបុរីដោយបូករួមទាំងរថយន្តទំនើបៗ ផ្ទះ សាច់ប្រាក់ និងទ្រព្យសម្បត្តិផ្សេងៗទៀត។
ក្នុងចំណោមទ្រព្យសម្បត្តិផ្សេងៗទៀតដែលត្រូវបានរឹបអូសនោះមានដូចជាស្រា មាសគីឡូ និងរូបភាព Bearbrick ។
នេះគឺជាប្រតិបត្តិការបង្ក្រាបការលាងលុយកខ្វក់ដ៏ធំបំផុតមួយហើយមិនត្រឹមតែនៅក្នុងប្រទេសសិង្ហបុរីប៉ុណ្ណោះទេ ប៉ុន្តែវាទំនងជាទាក់ទងដល់ជុំវិញពិភពលោកផងដែរ នេះបើយោងតាមរបាយការណ៏របស់លោក Josephine Teo អនុរដ្ឋមន្ត្រីក្រសួងមហាផ្ទៃដាក់ជូនសភាកាលពីខែតុលា។
ជនសង្ស័យទាំង១០នាក់ ដែលមានដើមកំណើតជាជនជាតិចិន ប៉ុន្តែមានសញ្ជាតិ និងលិខិតឆ្លងដែនចេញដោយអាជ្ញាធរនៃប្រទេសផ្សេងៗគ្នាដូចជា Cyprus និងកម្ពុជា ត្រូវបានតុលាការចោទប្រកាន់ពីបទលាងលុយកខ្វក់។
អ្នកដែលចាប់ខ្លួនបាន ពួកគេត្រូវបានឃុំខ្លួនជាបណ្តោះអាសន្ននៅក្រៅពន្ធនាគារ បន្ទាប់ពីតុលាការបានច្រានចោលការស្នើសុំឲ្យនៅក្រៅឃុំជាបណ្តោះអាសន្ន។ ជនសង្ស័យខ្លះត្រូវប្រឈមនឹងការចោទប្រកាន់ពីបទក្លែងបន្លំឯកសាសាធារណ:ផងដែរ ខណៈពីរនាក់ដែលកំពុងតាមរកចាប់ខ្លួនរងនូវការចោទប្រកាន់បន្ថែមទៀតពីបទរត់គេចខ្លួននិងចេតនាប្រឆាំងនឹងការអនុវត្តច្បាប់របស់អាជ្ញាធរ៕
ប្រភព៖ CNA/ga(kg)