ប្រែសម្រួល៖ សសម្បត្តិ
កាលពីថ្ងៃព្រហស្បតិ៍ ទី១៨ ខែមករាកន្លងទៅនេះ អង្គការ NATO បានប្រកាសពីការចាប់ផ្តើមធ្វើសមយុទ្ធយោធាដ៏កក្រើកមេឃរញ្ជួយដីដោយមានទាហាន ៩០,០០០ នាក់ចូលរួមដើម្បីសាកល្បងសមត្ថភាពក្នុងការចូលរួមក្នុងជម្លោះដូចជាសង្រ្គាមរវាងរុស្ស៊ីនិងអ៊ុយក្រែនជាដើម។
សមយុទ្ធយោធាមានឈ្មោះថា Steadfast Defender 2024 នឹងត្រូវអនុវត្តរហូតដល់ចុងខែឧសភា ដោយមានការចូលរួមពីកងទ័ពមកពី៣១ប្រទេសដែលជាសមាជិករបស់អង្គការណាតូរួមទាំងបេក្ខភាពស៊ុយអែតផងដែរ លោក ឧត្តមសេនីយអាមេរិក Christopher Cavoli មេបញ្ជាការជាន់ខ្ពស់របស់កងទ័ព NATO ប្រចាំអឺរ៉ុបបានប្រាប់អ្នកសារព័ត៌មានយ៉ាងដូច្នេះ។
លោក ឧត្តមសេនីយ៍អាមេរិកបានប្រាប់អ្នកយកព័ត៌មាននៅទីក្រុងប្រ៊ុចសែលបន្ទាប់ពីកិច្ចប្រជុំរយៈពេលពីរថ្ងៃរបស់ប្រមុខការពារជាតិថា “កងទ័ពណាតូនឹងបង្ហាញពីសមត្ថភាពរបស់ខ្លួនក្នុងការពង្រឹងខ្សែការពារតំបន់អឺរ៉ូ-អាត្លង់ទិនិង អាមេរិកខាងជើង” ដោយមានការចូលរួមពីកងទ័ពណាតូ និងស៊ុយអែត នេះបើយោងតាមសម្តីរបស់លោក Cavoli ។
យុទ្ថសាស្ត្រសមយុទ្ធយោធារបស់ណាតូនិងត្រូវបែងចែកជាទ្រង់ទ្រាយសមយុទ្ធតូចៗតាមផ្នែកនិមួយៗលាតសន្ធឹងចាប់ពីអាមេរិកខាងជើងទៅខាងកើតជាប់នឹងព្រំដែនប្រទេសរុស្ស៊ី។ ឧប្បករណ៏យោធាមានរួមបញ្ចូលនាវាកងទ័ពជើងទឹកចំនួន ៥០គ្រឿង យន្តហោះចម្បាំងចំនួន ៨០ គ្រឿង និងរថពាសដែកជាង ១,១០០ គ្រឿង។
សមយុទ្ធយោធាដែលមានទ្រង់ទ្រាយដ៏ធំបំផុតចាប់តាំងពីសមយុទ្ធ Reforger នៅឆ្នាំ ១៩៨៨ ក្នុងកំឡុងសង្គ្រាមត្រជាក់ ហើយនៅពេលនេះវាបានកើតឡើងនៅចំពេលដែល NATO កែសម្រួលប្រព័ន្ធការពាររបស់ខ្លួននៅចំពេលដែលផ្ទុះសង្រ្គាមរវាងរុស្ស៊ីនិងអ៊ុយក្រែន។
សហរដ្ឋអាមេរិកបានបញ្ជូនកងទ័ពរាប់ពាន់នាក់ទៅកាន់ផ្នែកខាងកើតរបស់ខ្លួន ហើយបានរៀបចំផែនការដ៏ស៊ីជម្រៅបំផុតរបស់ខ្លួនចាប់តាំងពីការដួលរលំនៃសហភាពសូវៀត ដើម្បីការពារខ្លួនពីការវាយប្រហាររបស់រុស្ស៊ីនៅក្នុងពេលណាមួយ។
ឧត្តមនាវីឯក Rob Bauer ដែលជាប្រធានគណៈកម្មាធិការយោធារបស់NATO បាននិយាយថា ទំហំប្រតិបត្តិការនៃសមយុទ្ធនេះគឺបង្ហាញពីការត្រៀមខ្លួនថ្មីមួយទៀតរបស់សម្ព័ន្ធមិត្តNATO។
លោកបានបញ្ជាក់ថា “ចំនួនទាហានដ៏ច្រើនសន្ធឹកសន្ធាប់ដែលចូលរួមក្នុងសមយុទ្ធក្នុងទ្រង់ទ្រាយដ៏ធំសម្បើមមួយនេះគឺ មានវិសាលភាពលាតសន្ធឹងកាត់មហាសមុទ្រ ចាប់ពីអាមេរិក រហូតដល់អឺរ៉ុប”។
លោក Bauer បានព្រមានថាពលរដ្ឋស៊ីវិលក្នុងប្រទេសជាសមាជិករបស់អង្គការ NATO ចាំបាច់ត្រូវតែត្រៀមខ្លួនឲ្យកាន់តែប្រសើរឡើងសម្រាប់សង្គ្រាមដែលប្រកបដោយសក្តានុពលនាពេលអនាគតជាមួយ រុស្ស៊ី។
លោកបានថ្លែងថា៖ “យើងត្រូវតែដឹងថាការផ្តល់ឲ្យយើងនូវសន្តិភាពមិនមែនបានមកដោយងាយៗនោះទេនេះហើយជាកត្តាចម្បងដែលយើងត្រូវតែត្រៀមលក្ខណ:ទុកជាមុនដោយរៀបផែនការសម្រាប់ទប់ទល់នឹងជម្លោះ”។
“ យើងមិនស្វែងរកការបង្កជម្លោះនោះទេក៏ប៉ុន្តែប្រសិនបើពួកគេវាយប្រហារមកលើយើង នោះយើងត្រូវតែត្រៀមកម្លាំងឲ្សសមាមាត្រដើម្បីឆ្លើយតបភ្លាមៗ”។
មេបញ្ជាការជាន់ខ្ពស់ណាតូបាននិយាយថា កងទ័ពថ្មើរជើងរបស់រុស្ស៊ីត្រូវបានបំផ្លាញយ៉ាងធ្ងន់ធ្ងរដោយសង្គ្រាមនៅអ៊ុយក្រែន ប៉ុន្តែកងទ័ពជើងទឹក និងទ័ពអាកាសដ៏ “សន្ធឹកសន្ធាប់” របស់រុស្សីនៅតែជាគ្រោះថ្នាក់សម្រាប់យើង។
លោកបាននិយាយថា កិច្ចខិតខំប្រឹងប្រែងរបស់ទីក្រុងម៉ូស្គូក្នុងការបង្កើតកងកម្លាំងរបស់ខ្លួនឡើងវិញកំពុងត្រូវបានជាប់គាំងដោយសារតែទណ្ឌកម្មរបស់លោកខាងលិច ប៉ុន្តែវិមានក្រឹមឡាំងនៅតែគ្រប់គ្រងស្ថានការណ៏បានដើម្បីបង្កើនការផលិតអាវុធនិងមីស៊ីលប្រល័យលោក។
នៅលើទឹកដីអ៊ុយក្រែន លោក Bauer បាននិយាយថា ខណៈពេលដែលនៅតែមានការប្រយុទ្ធគ្នាដ៏ខ្លាំងក្លាកំពុងបន្តអ៊ុយក្រែន “មិនផ្លាស់ផ្តូរ” គោលជំហររបស់ខ្លួននោះទេ។
លោកបាននិយាយថា “មានការវាយប្រហារថ្មីៗរបស់រុស្ស៊ីដែលកំពុងបន្តបំផ្លិចបំផ្លាញហេដ្ឋារចនាសម្ព័ន្ធ តែវាមិនសូវមានប្រសិទ្ធភាពផ្នែកយោធានោះទេ” លោកបានអំពាវនាវឲ្យអ្នកគាំទ្រអ៊ុយក្រែនមិនត្រូវមានចិត្ត “ទុទិដ្ឋិនិយមខ្លាំងពេកទេ” លើក្បាលម៉ាស៊ីនដឹកនាំរបស់ក្រុង Kyiv នៅក្នុងឆ្នាំនេះ៕
ប្រភព៖ Agency/fs