ប្រែសម្រួល៖ រតនា
កូនក្មេងប្រុសភ្លោះពីរនាក់បងប្អូនត្រូវបានឪពុកបង្កើតរបស់ពួកគេសម្លាប់រួចយកសាកសពទុកចោលនៅក្នុងប្រឡាយទឹកនៅក្នុងសង្កាត់មួយក្នុងប្រទេសសិង្ហបុរី។
នៅក្នុងបទសម្ភាសជាមួយ ព័ត៌មាន CNA អ្នកដឹកនាំការស៊ើបអង្កេត DSP Tan Boon Kok បានបង្ហាញនូវពន្លឺដែលក្រុមរបស់គាត់បានចាត់វិធានការបំបែកសំណុំរឿងដ៏ចាក់ស្រេះនេះ។
របាយការណ៍អំពីព័ត៌មានបឋម៖ កាលពីថ្ងៃទី ២១ ខែមករា ឆ្នាំ ២០២២ ក្នុងថ្ងៃសុក្រ គេបានឲ្យដឹងថាគេបានប្រទះឃើញសពក្មេងប្រុសពីរនាក់បងប្អូនបានស្លាប់នៅក្នុងប្រឡាយទឹក។ ប៉ូលិសទទួលទូរសព្ទនៅម៉ោង ៦.១៨ ល្ងាច។ គេប្រាប់ថាមានបុរសម្នាក់ត្រូវបានគេវាយហើយត្រូវការពឹងពាក់ប៉ូលិសដើម្បីស្វែងរកកូនប្រុសរបស់គាត់។
ជនជាតិសិង្ហបុរីអាយុ ៤៨ ឆ្នាំ ឈ្មោះXavier Yap Jung Houn បានហៅទូរសព្ទដោយបាននិយាយថាកូនភ្លោះអាយុ ១១ ឆ្នាំរបស់គាត់ឈ្មោះ Ethan និង Aston បានបាត់ខ្លួននៅឯ Greenridge Crescent ក្នុងតំបន់ Upper Bukit Timah ។ ក្រោយមកគាត់បាននិយាយថា គាត់បានប្រទះឃើញពួកគេស្លាប់នៅក្នុងប្រឡាយទឹកក្បែរនោះ។
នៅពេលដែលអគ្គស្នងការរងនគរបាលជាតិ លោក តាន់ ប៊ុនកុក ដឹកនាំការស៊ើបអង្កេត (DSP) បានជូនដំណឹងជាលើកដំបូងអំពីឧបទ្ទវហេតុនេះថា គាត់មានការជឿជាក់ថាមានរឿងជាច្រើនលាក់បាំងជាងការមើលឃើញផ្ទាល់នឹងភ្នែក។
អគ្គស្នងការរងនគរបាលជាតិ DSP Tan បានប្រាប់ CNA នៅក្នុងបទសម្ភាសថា “ក្មេងប្រុសពីរនាក់បានស្លាប់” ។ “ដូច្នេះច្បាស់ជាមានអ្វីមួយកើតឡើងចំពោះពួកគេ ហើយខ្ញុំជឿជាក់ថាមានជាប់ពាក់ព័ន្ធដែលមិនអាចលេងសើចបានទេ។ វាមិនមែនជារឿងធម្មតាទេដែលមានក្មេងប្រុសពីរនាក់ត្រូវបានសម្លាប់នៅក្នុងពេលតែមួយ”។
អគ្គស្នងការរងនគរបាលជាតិ DSP Tan បានដឹងពីអ្វីដែលគាត់កំពុងតែនិយាយ។
អគ្គស្នងការរងនគរបាលជាតិ DSP Tan បានធ្វើដំណើរទៅកាន់កន្លែងកើតហេតុ ដែលមានទីតាំងនៅក្នុងឧទ្យានមួយ។ នៅពេលទៅដល់ទីនោះគឺរាងយប់បន្តិចទៅហើយក្នុងតំបន់ Greenridge Crescent ដែលជាលំនៅឋានឯកជនមួយសម្រាប់លំហែកាយយ៉ាងស្អាត និងមានសួនកុមារមួយនៅកាច់ជ្រុងនោះនៅលើផ្លូវកោងបេតុងនៃផ្លូវល្បឿនលឿន។ នៅត្រង់កន្លែងទីធ្លាក្មេងលេងមានទោងយោលពីរ និងកន្លែងហាត់ប្រាណសម្រាប់ឡើងភ្នំសិប្បនិមិត្តតូចមួយ និងរូបដំរីសម្រាប់ក្មេងជិះលេង។
Yap បានប្រាប់មន្ត្រីថា មានបនុស្សម្នាក់តែគាត់មិនដឹងថាជាអ្នកណាទេបានលួចវាយគាត់។ គាត់មិនអាចពណ៌នាពីរូបរាងរបស់មនុស្សនោះបានទេ ដោយសារគាត់ត្រូវបានគេវាយពីក្រោយ ហើយបាត់បង់ស្មារតី។
ពេលដឹងខ្លួនឡើងកូនប្រុសរបស់គាត់បានបាត់ខ្លួន។ គាត់បាននិយាយថា ក្រោយមកគាត់បានប្រទះឃើញពួកគេស្លាប់ក្នុងប្រឡាយទឹក។
អគ្គស្នងការរងនគរបាលជាតិ DSP Tan និងក្រុមរបស់គាត់គិតថាករណីនេះមានបញ្ហាជាច្រើនកើតឡើងជាបន្តបន្ទាប់៖ ដំបូងគឺក្មេងប្រុសស្លាប់ពីរនាក់ ជនដៃដល់ដែលជាអ្នកវាយសម្លាប់មិនស្គាល់អត្តសញ្ញាណ ប្រឡាយពោរពេញទៅដោយទឹកមានពន្លឺស្រអាប់មិនអាចថតយករូបភាពបានច្បាស់នោះទេ។
ច្រាំងប្រឡាយបេតុងរាងរអិលហើយប៉ូលិសមិនចង់ឲ្យភស្តុតាងសំខាន់ៗត្រូវបានបោះចោលនោះទេ។ប៉ូលិសបានយកបាវខ្សាច់ មកទប់ទឹកក្នុងប្រឡាយកុំឲ្យទឹកហូរចូលនាំឲ្យលប់ដាននៅកន្លែងកើតហេតុ។
បាវខ្សាច់ត្រូវបានគេដាក់នៅនឹងកន្លែងកើតហេតុក្នុងរយៈពេល១ម៉ោងរាយកាត់ប្រឡាយដែលមានទទឹងប្រហែលពី៣ម៉ែត្រទៅ៤ម៉ែត្រ។
ខណៈពេលដែលអ្វីៗកំពុងបន្តអនុវត្ត អគ្គស្នងការរងនគរបាលជាតិ DSP Tan បានសង្កេតឃើញថាបុរសឈ្មោះ Yap បានបង្ហាញពីឥរិយាបទមួយចំនួនដែលគួរឲ្យសង្ស័យ។
គាត់បាននិយាយថា ” យោងតាមអាកប្បកិរិយារបស់គាត់មានរឿងមួយចំនួនគួរឲ្យសង្ស័យនៅពេលនោះ ដែលបង្ហាញថាគាត់ហាក់បីដូចជាមិនសូវស្រណុកសុខស្រួលនៅក្នុងចិត្តនោះទេ” ។ “យ៉ាងណាក៏ដោយ យើងកំពុងស្វែងរកអ្នកដែលគាត់បា្រប់ថាជាអ្នកវាយគាត់”។
ប៉ូលិសបានតាមប្រមាញ់យ៉ាងខ្លាំង។ មានមន្ត្រីយ៉ាងហោចណាស់ ១០០ នាក់មកពីតំបន់ផ្សេងៗ រួមទាំងបញ្ជាការប្រតិបត្តិការពិសេស និងភូមិបាល បានរុករករាលដាលពាសពេញតំបន់នេះ ដោយ Gurkhas បានស្វែងរកនៅតាមដងព្រៃតូចៗមួយដែលជាប់ប្រឡាយទឹកដែលមានការលបវាយប្រហារដ៏អាថ៌កំបាំងនេះ។
ការជូនដំណឹងត្រូវបានផ្តល់ទៅឲ្យអ្នកបើកតាក់ស៊ី ដោយស្នើឲ្យពួកគេតាមដានបុរសដែលមានអាយុចន្លោះពី ៣០ ទៅ ៤០ ឆ្នាំ។
អគ្គស្នងការរងនគរបាលជាតិ DSP Tan បាននិយាយថាប៉ូលិសត្រូវតែរាយសំណាញ់ឲ្យធំជាងនេះព្រោះវានៅមានធាតុផ្សំដែលគេនៅមិនទាន់បានរកឃើញ។
លោកបានមានប្រសាសន៍ថា៖ “ករណីដែលគេមិនបានដឹង យើងត្រូវតែធ្វើការស៊ើបអង្កេតនៅចំកន្លែងឧក្រិដ្ឋកម្មហើយស៊ើបរកភស្តុតាងតាំងពីទីនោះមកតាមដែលយើងអាចធ្វើទៅបានដើម្បីប្រមូលយកភស្តុតាងឲ្យបានច្រើន”។
មន្ត្រីបានដើរចូលទៅក្នុងប្រឡាយចម្ងាយ ៨០០ ម៉ែត្រ ភ្នាក់ងារ DOY បានរើសវត្ថុតាងនៅតាមផ្លូវគឺដុំទឹកកក ខោអាវក្មេងប្រុស ស្រោមដៃ និងម៉ាស់របស់ពួកគេ។
នៅចំងាយ ៨០០ ម៉ែត្រ ពួកគេបានរកឃើញកាមេរ៉ា CCTV ដែលប្រើដោយភ្នាក់ងារធនធានទឹក PUB បោះក្នុងប្រឡាយទឹក។ ប៉ុន្តែវីដេអូកាមេរ៉ា នោះមិនបានបង្ហាញឲ្យឃើញពីមុខមាត់អ្នកវាយប្រហារណាម្នាក់នោះទេ។
ស្រោមដៃ និងរបាំងមុខត្រូវបានគេបោះចោលនៅការដ្ឋានសំណង់ក្បែរនោះ។
នៅពេលដែលប៉ូលិសបានលុបរូបភាពមិនច្បាស់ចោលមានរូបភាពមួយបានបង្ហាញឡើងកាន់តែច្បាស់នូវអ្វីដែលបានកើតឡើង។
អគ្គស្នងការរងនគរបាលជាតិ DSP Tan បាននិយាយថា Yap ត្រូវបានចាត់ទុកថាជាសាក្សីដ៏សំខាន់ម្នាក់ក្នុងករណីនេះកន្លងមកក៏ប៉ុន្តែក្រោយមកគាត់ក៏ក្លាយទៅជាជនសង្ស័យដ៏សំខាន់ម្នាក់ក្នុងករណីនេះទៅវិញ។
ពេលប៉ូលិសចុះដល់កន្លែងកើតហេតុដំបូង គាត់ស្ថិតនៅក្នុងប្រឡាយ ហើយបានដើរចេញទៅទើបមន្ត្រីប៉ូលិសកោះហៅគាត់ឲ្យត្រឡប់មកវិញ។
អគ្គស្នងការរងនគរបាលជាតិ DSP Tan បាននិយាយថា “របួសរបស់គាត់មិនធ្ងន់ធ្ងរទេ។ Yap មានស្នាមជាំត្រង់ក្បាល លើខ្នងរបស់គាត់ និងមានស្នាមរបួសតូចតាចនៅលើពោះរបស់គាត់។
អគ្គស្នងការរងនគរបាលជាតិ DSP Tan បានកត់សម្គាល់ឃើញថា Yap ក៏មានរបួសនៅផ្នែកខាងមុខនៃក្បាលរបស់គាត់ផងដែរ បើទោះបីជាគាត់ត្រូវបានគេវាយពីខាងក្រោយក៏ដោយ។
យ៉ាបមិនចង់ទៅពេទ្យទេប៉ូលិសបានបញ្ចុះបញ្ចូលគាត់ឲ្យទៅពេទ្យពិនិត្យ។
អគ្គស្នងការរងនគរបាលជាតិ DSP Tan បាននិយាយថា “យើងបានណែនាំមន្រ្តីឈរជើងនៅទីនោះឲ្យតាមដានមើលអាកប្បកិរិយារបស់គាត់” ។ យើងបានប្រាប់គាត់ថា យើងនឹងនៅទីនេះជាមួយអ្នក ក្នុងករណីណាដែលអ្នកមានរឿងចង់ប្រាប់យើងបន្ថែមទៀត។ អស់ពេលពេញមួយយប់យើងបានសង្កេតឃើញគាត់ដេកមិនលក់នោះទេ។
ខណៈពេលដែល Yap ស្ថិតនៅក្នុងមន្ទីរពេទ្យវេជ្ជបណ្ឌិតបានសង្កេតតាមដានគាត់។ ប៉ូលិសក៏បានបន្តស៊ើបអង្កេតនៅកន្លែងកើតហេតុ។
ក្នុងការស្វែងរកសាក្សី ឬជនសង្ស័យដែលអាចកើតមាន ប៉ូលិសបានស៊ើបសួរគ្រប់ផ្ទះនីមួយៗហើយបានសួរអ្នកស្រុកថាតើពួកគេបានទៅលេងសួនឬអត់។
អគ្គស្នងការរងនគរបាលជាតិ DSP Tan បាននិយាយថា “ជាទូទៅមិនមានមនុស្សភ្ញាក់ផ្អើលនោះទេ” ។ ពួកគេគាំទ្រអ្វីដែលប៉ូលិសកំពុងអនុវត្ត គេបានគណនាអំពី Yap នូវអ្វីដែលបានកើតឡើងដើម្បីពិនិត្យឲ្យគ្រប់ជ្រុងជ្រោយ។
ប៉ូលិសបាននិយាយជាមួយយ៉ាបគ្រប់ពេល គាត់បានបន្តនិយាយអំពីព្រឹត្តិការណ៍ដែលថាមានអ្នកវាយមិនស្គាល់មុខគឺវាយពីក្រោយ។
អគ្គស្នងការរងនគរបាលជាតិ DSP Tan បាននិយាយថា “យើងត្រូវតែសម្ភាសគាត់ឲ្យបានត្រឹមត្រូវ” ។ “នៅពេលគាត់ចេញពីមន្ទីរពេទ្យនៅល្ងាចថ្ងៃបន្ទាប់គឺថ្ងៃសៅរ៍ យើងបានអញ្ជើញគាត់ឲ្យត្រឡប់ទៅ Police Cantonment Complex ដើម្បីសម្ភាសន៍” ។ពេលនោះទើប Yap សារភាពថាគាត់ជាឃាតក។
ករណីរបស់ Yap ដូចដែលបានរៀបរាប់លម្អិតនៅក្នុងឯកសារតុលាការជាបន្តបន្ទាប់ មានដូចខាងក្រោមនេះ។
គាត់មានកូនប្រុសពីរនាក់ជាមួយប្រពន្ធគឺអ្នកស្រី Anna Seah Puay Hiang។ ពួកគេបានជួលអ្នកថែទាំផ្ទះឲ្យជួយមើលកូនភ្លោះដែលកើតនៅថ្ងៃទី ១៤ ខែ តុលា ឆ្នាំ ២០១០។
ប្តីប្រពន្ធនេះសង្ស័យថា កូនភ្លោះទាំងពីរមានជំងឺអូទីស្សឹម ចាប់តាំងពីក្មេងប្រុសទាំងពីរមានអាយុពីរឆ្នាំ។ ពួកគេត្រូវបានធ្វើរោគវិនិច្ឆ័យជាផ្លូវការថាមានជំងឺនេះនៅពេលពួកគេមានអាយុ ៦ ឆ្នាំ ការអភិវឌ្ឍរាងកាយកុមារត្រូវបានចំណាយពេលយូរ។
ទោះបីជាក្មេងប្រុសត្រូវបានគេណែនាំឲ្យដាក់នៅក្នុងសាលាអប់រំពិសេសក៏ដោយ ជាពិសេសម្តាយរបស់ពួកគេបានរកឃើញថាវាពិបាកក្នុងការទទួលយកលក្ខខណ្ឌរបស់ពួកគេណាស់។
នៅឆ្នាំ ២០១៩ ក្មេងប្រុសបានចុះឈ្មោះចូលរៀននៅបឋមសិក្សាកម្រឹត ១ ក្នុងអាយុ ៩ ឆ្នាំនៅសាលាបឋមសិក្សាតែពួកគេនៅតែមិនអាចនិយាយបាន។
ដោយសារតែការលំបាកក្នុងការសិក្សា ពួកគេត្រូវបានម្ដាយនិងអ្នកបម្រើទៅមើលថែទាំដល់ថ្នាក់រៀន។
ក្នុងនាមជាឪពុក យ៉ាប បានជួយដល់តម្រូវការប្រចាំថ្ងៃរបស់ពួកគេ ហើយបានចូលរួមកាន់តែច្រើនក្នុងការសិក្សារបស់ពួកគេ ដោយចំណាយពេលកាន់តែច្រើនជាមួយពួកគេ បន្ទាប់ពីពួកគេបានចូលរៀននៅសាលាបឋមសិក្សា។
គាត់មានការព្រួយបារម្ភខ្លាំងឡើងចំពោះកូនប្រុសនៅឆ្នាំ ២០១៩ ឬ ២០២០ ហើយសោកស្តាយដែលប្រពន្ធគាត់មិនអាចទទួលយកលក្ខខណ្ឌរបស់ពួកគេ។ ការបារម្ភរបស់គាត់កាន់តែខ្លាំងឡើងនៅឆ្នាំ ២០២១ បន្ទាប់ពីប្រពន្ធគាត់ខឹងនឹងក្មេងទាំងនេះឥតឈប់ឈរ។
គាត់ក៏ចាប់ផ្តើមមានគំនិតចង់សម្លាប់ពួកគេ ហើយក៏ទិញដុំទឹកកកក្នុងគោលបំណងសម្លាប់ពួកគេនៅក្នុងខែធ្នូ ឆ្នាំ ២០២១។
រឿងរ៉ាវក៏បានកើតឡើងនៅដើមឆ្នាំ ២០២២ ខណៈពេលដែលគាត់បានគិតទៅថ្ងៃមុខថាតើកូនប្រុសភ្លោះរបស់គាត់ស័ក្តិសមក្នុងការបន្តរៀនទៀតដែរឬទេ។
Yap បានកត់សម្គាល់ពីការធ្លាក់ទឹកចិត្ត និងការខកចិត្តរបស់ប្រពន្ធគាត់ហើយមានអារម្មណ៍ថានាងបានបោះបង់ចោលកូនប្រុសរបស់ពួកគេ។
គាត់ក៏គិតថានឹងសម្លាប់កូនប្រុសភ្លោះទាំងពីរនេះទើបមិនមានការបារម្ភដល់ប្រពន្ធគាត់ ហើយគាត់ក៏ភ័យខ្លាចផងដែរថាក្មេងប្រុសទាំងនោះនឹងត្រូវគេធ្វើបាប ឬទុកចោលដោយគ្មានអ្នកណាមើលថែពួកគេ ប្រសិនបើមានអ្វីកើតឡើងចំពោះប្រពន្ធគាត់ឬរូបគាត់។
Yap បានមកមើលសួនកុមារ Greenridge Crescent ដែលនៅជិតផ្ទះរបស់គាត់។ ដោយសង្កេតឃើញថាតំបន់នោះស្ងប់ស្ងាត់ដោយមានវាលចំហធំនិងព្រៃនៅក្បែរនោះ គាត់បានបោះតង់នៅកន្លែងនោះដើម្បីសម្រេចផែនការខ្មៅងងឹតរបស់គាត់។
នៅថ្ងៃទី ២១មករា ឆ្នាំ ២០២២ Yap បានបើកឡាននាំយកកូនប្រុសរបស់គាត់ទៅសួនកុមារនៅម៉ោង ៤.៤៥ ល្ងាច។ គាត់ទុកឲ្យក្មេងៗលេង១០នាទីនៅកន្លែងក្មេងលេង និងកន្លែងហាត់ប្រាណ មុននឹងនាំពួកគេទៅវាលមួយក្បែរប្រឡាយទឹក។
យ៉ាបបានដឹកក្មេងពីវាលមកកាន់ប្រឡាយទឹក។ បន្ទាប់មកគាត់បាននាំពួកគេដើរចម្ងាយប្រហែល ១៨០ម៉ែត្រចូលទៅក្នុងប្រឡាយដែលជាកន្លែងមានជម្រក។
- សួនកុមារ Greenridge Crescent៖
កន្លែងដែលក្មេងប្រុសត្រូវបានគេរកឃើញនៅក្នុងប្រឡាយ
“បន្ទាប់មក Yap បានច្របាច់ក Ethan និង Aston ម្តងមួយៗ មុនពេលដាក់ពួកគេទៅក្នុងប្រឡាយដែលមានទឹកហូរតាមលូតូចចង្អៀត។
ក្រោយមក យ៉ាប បានព្យាយាមសម្លាប់ខ្លួនដោយដុំទឹកកកតែមិនស្លាប់ហើយគាត់ក៏បានយកដុំថ្មប៉ុនកណ្តាប់ដៃវាយលើក្បាលគាត់។
នៅពេលដែល Yap មិនអាចសម្លាប់ខ្លួនឯងដូចបំណង គាត់ក៏បានបង្កើតសាច់រឿងមួយផ្សេងទៀត – ដើម្បីធ្វើពុតថាគាត់ត្រូវបានគេវាយ។ គាត់ជឿថាប៉ូលិសនឹងរកឃើញការពិត ហើយការរកឃើញការកុហករបស់គាត់នឹងធ្វើឲ្យគាត់មានវិប្បដិសារីបណ្តាលឲ្យមានជាប់ទោសប្រហារជីវិតនេះហើយគឺជាអ្វីដែលគាត់ចង់បាន។
យ៉ាបបានទូរសព្ទទៅប្រពន្ធ ប៉ុន្តែនាងមិនឆ្លើយតប។ បន្ទាប់មកគាត់បានទូរសព្ទទៅប៉ូលិស។
ខណៈពេលដែលកំពុងរង់ចាំប៉ូលិសគាត់ក៏បានរៀបចំសាកសពកូនប្រុសរបស់គាត់ឡើងវិញ ដោយដាក់ឲ្យអង្គុយក្នុងប្រឡាយទឹកដោយដាក់ក្បាលរបស់ពួកគេនៅលើភ្លៅរបស់គាត់។
នៅពេលដែលប៉ូលិសមិនបានមកកាន់ប្រឡាយទឹក Yap បានទៅហៅប៉ូលិសឲ្យមកជួយគាត់។
របួសជាច្រើនត្រូវបានរកឃើញនៅលើខ្លួន Yap រួមទាំងស្នាមជាំនៅលើថ្ងាស និងស្បែកក្បាល ស្នាមរបួសរាក់ៗនៅលើដងខ្លួន និងស្នាមរបួសលើកែងដៃ ជង្គង់ និងកដៃ។
អគ្គស្នងការរងនគរបាលជាតិ DSP Tan បាននិយាយថា Yap បានអះអាងថាគាត់បានប្រើកម្លាំងច្រើនណាស់ ប៉ុន្តែស្នាមរបួសត្រង់ពោះរបស់គាត់ដែលបណ្តាលមកពីទឹកកក។ Yap បានប្រាប់ប៉ូលិសថា គាត់បានទិញទឹកកកពីហាងមួយ ហើយប៉ូលិសបានបញ្ជាក់ពីការទិញទឹកកកនោះជាមួយនឹងម្ចាស់ហាង។
ការសារភាពរបស់ Yap ពីការច្របាច់កក្មេងត្រូវបានបញ្ជាក់ដោយការធ្វើ DNA ។
អគ្គស្នងការរងនគរបាលជាតិ DSP Tan បាននិយាយថា “ដោយសារតែមូលហេតុនៃការស្លាប់ដោយសារការច្របាច់កនោះគឺត្រូវតែមានភ័ស្តុតាងពាក់ព័ន្ធនឹងរាងកាយ” ។
ប៉ូលិសបានផ្ទៀងផ្ទាត់រឿងរបស់ Yap ជាមួយនឹងប្រភពផ្សេងទៀត រួមទាំងគ្រូពេទ្យកោសល្យវិច្ច័យផងដែរ។
“គាត់យល់ឃើញថាវាពិបាកណាស់សម្រាប់កូនភ្លោះរបស់គាត់ជាមនុស្សដែលមិនអាចមើលថែខ្លួនឯងបាន។ ដូច្នេះការព្រួយបារម្ភរបស់គាត់គឺជាអ្វីដែលនឹងកើតឡើងចំពោះពួកគេ ប្រសិនបើគាត់មិននៅក្បែរ លោក អគ្គស្នងការរងនគរបាលជាតិ DSP Tan បាននិយាយដូច្នេះ។
អគ្គស្នងការរងនគរបាលជាតិ DSP Tan បាននិយាយថា រហូតមកដល់ចំណុចនេះ Yap បានរក្សាភាពស្ងប់ស្ងាត់ ហើយអាកប្បកិរិយារបស់គាត់មិនខូចទេ។
គាត់ត្រូវបានចោទប្រកាន់ជាលើកដំបូងពីបទមនុស្សឃាតនៅថ្ងៃទី ២៤ ខែមករាឆ្នាំ ២០២២។ ក្រោយកើតហេតុ សមត្ថកិច្ចបាននាំខ្លួនគាត់ទៅកន្លែងកើតហេតុវិញ នៅថ្ងៃទី២៧ ខែមករា ដែលសមត្ថកិច្ចហៅថា កសាងសំណុំរឿងនៅកន្លែងកើតហេតុឡើងវិញ។អគ្គស្នងការរងនគរបាលជាតិ DSP Tan បាននិយាយថាគាត់មានការធ្លាក់ទឹកចិត្តយ៉ាងខ្លាំង។
DSP Tan បាននិយាយថា “គាត់មិនអាចបន្តកសាងសំណុំរឿងនៅកន្លែងកើតហេតុឡើងវិញបានទេដូច្នេះយើងត្រូវបញ្ជូនគាត់ទៅ Changi Medical Complex គាត់ត្រូវបានឃុំនៅទីនោះ”។
Yap ក្រោយមកត្រូវបានបញ្ជូនទៅកាន់វិទ្យាស្ថានសុខភាពផ្លូវចិត្តសម្រាប់ការវាយតម្លៃផ្លូវចិត្ត ដោយដាក់ស្លាកសញ្ញាលើខ្លួនគាត់ពីហានិភ័យក្នុងការធ្វើអត្តឃាត និងត្រូវបានពេទ្យត្រួតពិនិត្យជាប្រចាំ។
បន្ទាប់ពីការរកឃើញនេះ អយ្យការបានដោះបន្ទុកលើការចោទប្រកាន់ពីបទមនុស្សឃាតប្រឆាំងនឹង Yap – ការចោទប្រកាន់ទីពីរសម្រាប់ការស្លាប់របស់ Aston ត្រូវបានធ្វើក្នុងខែកុម្ភៈ ឆ្នាំ ២០២២ ពីបទមនុស្សឃាតដែលជាប់ទោសមិនមែនជាករណីឃាតកម្ម។ ការកែប្រែបទចោទនេះមានន័យថា យ៉ាប លែងប្រឈមនឹងទោសប្រហារជីវិតទៀតហើយ ប៉ុន្តែអតិបរមានៃការជាប់ពន្ធនាគារគឺអស់មួយជីវិត។
គាត់បានចូលសារភាពកំហុសនៅខែសីហា ឆ្នាំ ២០២៣ ហើយមេធាវីរបស់គាត់គឺលោក Choo Si Sen លោក Patrick Nai និងលោកស្រី Choo Yean Lin បានដាក់ជូនតុលាការនូវលិខិតមួយដែល Yap បានសរសេរ។
ក្នុងលិខិតនោះ លោកបានសុំទោសចំពោះអំពើមនុស្សឃាត និងបញ្ហាដែលលោកបានបង្កឡើង។ គាត់បាននិយាយថា គាត់មានភាពសោកសៅ និងអស់សង្ឃឹមដោយសារតែការបាត់បង់កូនប្រុសទាំងពីរ។
គាត់សង្ឃឹមថាអាចស្លាប់ទៅជាមួយកូនប្រុសទាំងពីរ “នឹងបញ្ចប់ការរងទុក្ខដោយអយុត្តិធម៌” ហើយគាត់ចង់ “ឆាប់ស្លាប់និងចង់ទទួលទោសប្រហារជីវិតឲ្យបានឆាប់រហ័ស”។
គាត់បាននិយាយថានេះគឺជា “ការដាក់ទណ្ឌកម្មដ៏ស្រាលបំផុត” ចំពោះគាត់ដែលមិនអនុញ្ញាតឲ្យគាត់ស្លាប់ជាមួយកូនប្រុសពីរនាក់របស់គាត់។
សាលក្រមត្រូវបានគេអាននៅក្នុងតុលាការ លោក Yap ឈរនៅក្នុងក្រចកសេះពោរពេញទៅដោយទឹកភ្នែក។
ចៅក្រមបានសំរេចកាត់ទោសជាប់ៗគ្នាដើម្បី “ឆ្លុះបញ្ចាំងឲ្យបានត្រឹមត្រូវនូវអំពើរឧក្រិដ្ឋកម្មរួមទាំងការប្រព្រឹត្តរបស់យ៉ាបដែលនាំឲ្យបាត់បង់ជីវិតមនុស្សស្លូតត្រង់ដល់ទៅពីរនាក់” ។
Yap ត្រូវបានកាត់ទោសឲ្យជាប់គុក ១៤ ឆ្នាំសម្រាប់ Ethan និង Aston ។
“ការកាត់ទោសជារួមដែលខ្ញុំបានស្វែងរកតុល្យភាពលើការពិតដែលថា បទល្មើសដ៏សាហាវ និងធ្ងន់ធ្ងរបានកើតឡើងនៅថ្ងៃទី ២១ ខែមករា ឆ្នាំ ២០២២ និងការពិតដែលជនជាប់ចោទទទួលរងឥទ្ធិពលពី ជំងឺធ្លាក់ទឹកចិត្តធ្ងន់ធ្ងរ នៅក្នុងពេលប្រព្រឹត្តបទល្មើស។ មន្រ្តីយុត្តិធម៌ Vincent Hoong បាននិយាយដូច្នេះ។
ដោយឆ្លុះបញ្ចាំងពីអារម្មណ៍របស់គាត់ ឥឡូវនេះសំណុំរឿងនេះត្រូវបានបញ្ចប់ហើយ DSP Tan បាននិយាយថា “គ្មានអ្វីគួរឲ្យសង្ស័យទេថាករណីនេះគឺជាករណីដ៏សោកសៅបំផុត យើងបានព្យាយាមអស់ពីសមត្ថភាពដើម្បីស្វែងជួយរកយុត្តិធម៌ឲ្យគាត់។
“វាមានសារៈសំខាន់ខ្លាំងណាស់ដែលយើងត្រូវប្រឹងប្រែងឲ្យអស់ពីសមត្ថភាពសម្រាប់ការងារនេះ ដើម្បីស្វែងរកការពិត ហើយនៅក្នុងពេលតែមួយធ្វើវាឲ្យអស់ពីសមត្ថភាព៕
អត្ថបទ និង រូបភាព៖ CNA