ដោយ៖ គង់ហេង
ត្បូងឃ្មុំ៖ កម្លាំងចម្រុះដឹកនាំដោយលោក ប៉េង សម្បត្តិ ជាអភិបាលរងខេត្តត្បូងឃ្មុំ ដោយមានការសម្របសម្រួលពីលោក សូ សុវិទ្យា និងលោក ឡាយ ឃាង ជាព្រះរាជអាជ្ញារង អមសាលាដំបូងខេត្តនេះបានចុះពិនិត្យ និងកាយកម្ទេចចោលសំណង់ជា ខ្ទម តូច ធំ ចំនួន ២៨ កន្លែង ជាជម្រកទីតាំងអាជីវកម្មរ៉ែមាសខុសច្បាប់ នៅភូមិសំពៅលូន ឃុំជាំតាម៉ៅ ស្រុកមេមត់ នៅថ្ងៃទី ១០ មករាម្សិលមិញនេះ។
សមត្ថកិច្ចដែលបានចូលរួមក្នុងប្រតិបត្តិការកាយកម្ទេចកន្លែងធ្វើអាជីវកម្មរ៉ែមាស អនាធិបតេយ្យបានឱ្យដឹងថា៖ ក្នុងការកាយកម្ទេចបង្រ្កាបនោះ គ្មានការការចាប់ឃាត់ខ្លួនជនណាម្នាក់ទេ ឬក៏ដកហូតសម្ភារៈជាវត្ថុតាង អ្វីនោះដែរ។ ដោយសារតែមុនឈានដល់ប្រតិបត្តិការនេះ ខាងរដ្ឋបាលខេត្តត្បូងឃ្មុំបានជូនដំណឹងចំនួន ពីរ សប្តាហ៍មុនរួចហើយ។
សូមបញ្ជាក់ថា តំបន់រ៉ែមាសខាងលើមានផ្ទៃក្រឡាចំនួន ១០០ គីឡូម៉ែត្រក្រឡាក្នុងស្រុកមេមត់ គឺខាងក្រសួងរ៉ែ និងថាមពលបានសម្រេចផ្តល់អាជ្ញាប័ណ្ណរុករករ៉ែមាស ឱ្យទៅក្រុមហ៊ុនរបស់ប្រទេសអូស្រ្តាលីមួយឈ្មោះ «រ៉ឺនេសង់ មីនើរ៉ល»កាលពីចុងឆ្នាំ២០២១៕
