ប្រែសម្រួល៖ ស្រីស្រស់
![](https://cambodiaflashnews.com/wp-content/uploads/2021/06/top-banner.gif)
វ៉ាស៊ីនតោន៖ អ្នកគ្រប់គ្រងអង្គការ NASA លោក Bill Nelson បាននិយាយកាលពីថ្ងៃអង្គារ ទី៩ ខែមករា ឆ្នាំ២០២៤ថា សហរដ្ឋអាមេរិកកំពុងជំរុញការវិលត្រឡប់របស់អវកាសយានិកដែលបានគ្រោងទុករបស់ខ្លួន ទៅកាន់ផ្ទៃព្រះច័ន្ទទៀត ពីឆ្នាំ២០២៥ ដល់ឆ្នាំ២០២៦។
Artemis ដែលត្រូវបានគេដាក់ឈ្មោះឲ្យដោយយកលំនាំតាមសាច់រឿងទេវកថាក្រិកជាប្អូនស្រីរបស់ Apollo ជំនាន់មុនត្រូវបានប្រកាសជាផ្លូវការតាំងពីឆ្នាំ ២០១៧ ដែលជាផ្នែកមួយនៃផែនការរបស់ទីភ្នាក់ងារអវកាសអាមេរិក ដើម្បីបង្កើតវត្តមានប្រកបដោយនិរន្តរភាពនៅលើភពព្រះច័ន្ទដែលជាភពមួយនៅជិតភពផែនដីបំផុតនិងត្រូវធ្វើការសិក្សាស្រាវជ្រាវនៅទីនោះសម្រាប់បន្តបេសកកម្មនាពេលអនាគតទៅកាន់ភពព្រះអង្គារ។
បេសកកម្មដំបូងគឺជាការបង្ហោះសាកល្បងដោយមិនបានគិតថាទៅដល់ឋានព្រះច័ន្ទឬនិងត្រឡប់មកវិញនោះមានឈ្មោះថា Artemis 1 ត្រូវបានធ្វើនៅក្នុងឆ្នាំ ២០២២ បន្ទាប់ពីត្រូវបានពន្យារពេលជាច្រើនលើកមក។
លោក Nelson បានប្រាប់អ្នកយកព័ត៌មានថា យានArtemis 2 ដែលមានការពាក់ព័ន្ធនឹងនាវិក ដែលគ្រោងនឹងចុះចតលើផ្ទៃព្រះច័ន្ទក៏ត្រូវបានពន្យារពេលពីចុងឆ្នាំនេះ ដល់ខែកញ្ញា ឆ្នាំ ២០២៥ ។
យាន Artemis 3 ដែលជាយានទីមួយនឹងត្រូវនាំមនុស្សដំបូងគេទៅចុះចតនិងដើរលើឋានព្រះច័ន្ទស្របតាមគន្លងច័ន្ទគតិ នៅប៉ូលខាងត្បូងរបស់ព្រះច័ន្ទ ដែលគ្រោងនឹងអនុវត្តនៅក្នុងខែកញ្ញា ឆ្នាំ ២០២៦។
លោក Nelson បាននិយាយថា “សុវត្ថិភាពគឺជាអាទិភាពចម្បងរបស់យើង ហើយដើម្បីផ្តល់ឲ្យក្រុម Artemis នូវពេលវេលាបន្ថែមទៀតដើម្បីគិតអំពីបញ្ហាដែលត្រូវឆ្លងកាត់ឧបសគ្គមួយចំនួន” ។
អង្គការ NASA ក៏កំពុងស្វែងរកការសាងសង់ស្ថានីយអវកាសស្របតាមគន្លងច័ន្ទគតិមួយដែលមានឈ្មោះថា Gateway ដែលជាយានអវកាសសម្រាប់បេសកកម្មចុះចតនៅពេលក្រោយ៕