ប្រែសម្រួល៖ សហការី
ប្រទេសថៃ៖ គូស្នេហ៍មួយនៅប្រទេសថៃ ត្រូវបានតុលាការចោទប្រកាន់ពីបទលាក់សាកសពកុមារដែលទើបនឹងចេះដើរតេះតះនៅក្នុងទូទឹកកក។
កាសែតបាងកកប៉ុស្តិ៍បានរាយការណ៍ថា កាលពីថ្ងៃសៅរ៍គេបានប្រទះឃើញសាកសពក្មេងប្រុសអាយុ ២ ឆ្នាំម្នាក់ដែលត្រូវបានលាក់នៅក្នុងទូរទឹកកកនៅក្នុងផ្ទះមួយដែលគ្រួសារនោះទទួលមើលក្មេងដែលឪពុកម្តាយគឺជាអ្នកញៀនថ្នាំ ស្តិតនៅក្នុងសង្កាត់ បឹង បៅធុង នៃខេត្ត ណុនថា បុរី។
បុរសជនជាតិថៃឈ្មោះហាន់ណារ៉ុង ប្រៃផានុង អាយុ ៣១ ឆ្នាំរួមទាំងប្រពន្ធរបស់គាត់ឈ្មោះ ម៉ារីសា ថងអាំ អាយុ ២៥ ឆ្នាំត្រូវបានតុលាការចោទប្រកាន់ថាមិនបានរាយការណ៍ពីការស្លាប់របស់ទារកដែលទើបនឹងចេះដើរតេះតះទៅប៉ូលិសនិងបានលាក់ទុកសាកសព។ លោក ហាន់ ណារ៉ុង ក៏ត្រូវបានចោទប្រកាន់ពីបទល្មើសគ្រឿងញៀនផងដែរ។
ប្រព័ន្ធផ្សព្វផ្សាយថៃបានរាយការណ៍ថា លោក ហាន់ ណារ៉ុង ជាមិត្តភក្តិរបស់ឪពុកក្មេងនោះ។ លោក ព្រិត ចារុនសាអាត នាយប៉ុស្តិ៍នគរបាល បឹង បៅធុង បានប្រាប់អ្នកសារព័ត៌មានថា ប៉ូលិសនឹងសាកសួរឪពុកម្តាយបង្កើតរបស់ក្មេងប្រុសនេះបន្ថែមទៀត។
មន្ត្រីប៉ូលិសនិងអ្នកជំនាញផ្នែកកោសល្យវិច្ច័យ និងក្រុមគ្រូពេទ្យត្រូវបានហៅទៅកាន់លំនៅដ្ឋានមួយនៅផ្លូវរតនៈបុត្រកាលពីថ្ងៃសៅរ៍។
យោងតាមរបាយការណ៍ពី ថៃ PBS World បានឲ្យដឹងថា អាជ្ញាធរបានទៅផ្ទះដែលកើតហេតុនោះបន្ទាប់ពីម្តាយរបស់ហាន់ណារ៉ុងបានត្អូញត្អែរដោយសារតែមានក្លិនស្អុយជះចេញពីក្នុងផ្ទះ ហើយថាកុមារបានបាត់ខ្លួនតាំងពីថ្ងៃទី ២ ខែមករា។
កាសែតបាងកកប៉ុស្តិ៍បានរាយការណ៍ថា ក្រុមមន្ត្រីបានរកឃើញសាកសពរបស់ក្មេងទើបនឹងចេះដើរតេះតះរុំក្នុងភួយលាក់ទុកនៅក្នុងទូទឹកកក។លទ្ធផលនៃការធ្វើកោសល្យវិច័យកាលពីថ្ងៃអាទិត្យបានបញ្ជាក់ថា ក្មេងប្រុសនេះបានស្លាប់ដោយសារតែស្លាក់បាយដំណើបនៅក្នុងបំពង់កបណ្តាលឲ្យស្ទះខ្យល់ស្លាប់។
ប៉ុន្តែសាច់ញាតិរបស់ក្មេងប្រុសជំទាស់នឹងការរកឃើញនៃការធ្វើកោសល្យវិច័យ ដោយសារមានស្នាមជាំជាច្រើននៅលើដៃនិងជើងរបស់ក្មេងប្រុស។ ស្ត្រីសង្ស័យបាននិយាយថា គាត់បានប្រទះឃើញក្មេងនោះមានស្រមោចចូលក្នុងភ្នែក និងបាយក្នុងមាត់។
ហើយសាកសពរបស់ក្មេងប្រុសនេះត្រូវបានយកទៅបូជាកាលពីថ្ងៃចន្ទ៕
ប្រភព៖ Agencies/fh(mi)