ប្រែសម្រួល៖ ស.សម្បត្តិ
ប៉េកាំង៖ ប្រព័ន្ធផ្សព្វផ្សាយរដ្ឋរបស់ប្រទេសចិនបានប្រកាសអំពីការប្តេជ្ញាចិត្តរបស់ ប្រធានាធិបតីចិន លោក ស៊ី ជីនពីងក្នុងការបង្កើនយុទ្ធនាការបោសសម្អាតអំពើពុករលួយលើវិស័យសំខាន់ៗ រួមមានយោធា ហិរញ្ញវត្ថុ ថាមពល និងហេដ្ឋារចនាសម្ព័ន្ធ។
ប្រធានាធិបតីចិន លោក ស៊ី ជីនពីង ចាប់តាំងពីបានចូលកាន់អំណាចក្នុងអាណត្តិទសវត្សរ៍ទីពីរ របស់គាត់ដែលក្នុងនាមជាមេដឹកនាំកំពូលរបស់ចិននោះ លោក ស៊ី បានបើកយុទ្ធនាការដ៏ខ្លាំងក្លាប្រឆាំងនឹងអំពើពុករលួយចាប់តាំងពីឆ្នាំ ២០២២ ដែលជាផ្នែកមួយក្នុងការអនុវត្តគោលននយោបាយសម្រាប់រយ:ពេលដ៏យូរអង្វែង។
អ្នកគាំទ្រគោលនយោបាយប្រឆាំងអំពើពុករលួយបាននិយាយថា យុទ្ធនាការប្រឆាំងអំពើពុករលួយគឺជាការលើកកម្ពស់អភិបាលកិច្ចល្អ បើទោះបីជាអ្នករិះគន់និយាយាថា វាជាឧបករណ៏សម្រាប់លោក ស៊ីប្រើប្រាស់ក្នុងការបោសសម្អាតអ្នកប្រឆាំងនឹងនយោបាយរបស់លោកក៏ដោយ។
នៅក្នុងសុន្ទរកថាថ្លែងទៅកាន់ភ្នាក់ងារប្រឆាំងអំពើពុករលួយរបស់បក្សកុម្មុយនិស្តចិនដែលកំពុងកាន់អំណាចនោះ លោកស៊ី បានបញ្ជាឲ្យ “មានការខិតខំប្រឹងប្រែងកាន់តែខ្លាំងក្លាបន្ថែមទៀត” ដើម្បីប្រយុទ្ធប្រឆាំងនឹងអំពើពុករលួយនៅក្នុងវិស័យ “យោធា ហិរញ្ញវត្ថុ សហគ្រាសរដ្ឋ ថាមពល ឱសថ និងហេដ្ឋារចនាសម្ព័ន្ធ” ។ .
លោក ស៊ី បាននិយាយថា “ជ័យជម្នះដ៏លើសលប់មួយត្រូវបានសម្រេចនៅក្នុងការប្រយុទ្ធប្រឆាំងនឹងអំពើពុករលួយ ដែលកំពុងកើតឡើងលើគ្រប់វិស័យដោយខិតខំលាក់បាំងពីការតាមដាននិងស៊ើបអង្កេត” នៅក្នុងរយៈពេលដប់ឆ្នាំចុងក្រោយនេះ នេះបើយោងតាមសេចក្តីរាយការណ៏របស់សារព័ត៌មាន Xinhua ។ លោក ស៊ី បានព្រមានថា “ស្ថានភាពនៅតែធ្ងន់ធ្ងរ និងស្មុគស្មាញ”។
លោក ស៊ី បានមានប្រសាសន៍ថា “យើងគួរតែយល់ដឹងឲ្យបានច្បាស់លាស់អំពីការអភិវឌ្ឍថ្មីមួយនៅក្នុងការប្រយុទ្ធប្រឆាំងនឹងអំពើពុករលួយដែលមានបណ្តាញមូលដ្ឋានចាក់ស្រេះបង្កើតជាខ្សែរយ:បន្តគ្នាក្នុងលក្ខខណ្ឌប្រព្រឹត្តអំពើពុករលួយ”។
យោងតាមតួលេខផ្លូវការចុងក្រោយបង្អស់នៅក្នុងខែមិថុនា ឆ្នាំ ២០២២ មានមន្ត្រីក្នុងជួរគណបក្សប្រហែល ៤.៨ លាននាក់ក្នុងប្រទេសចិនត្រូវបានតាមដាននិងស៊ើបអង្កេតចាប់តាំងពីឆ្នាំ ២០១២មក ។
ហើយនៅក្នុងចំណោមមន្ត្រីទាំងនោះ មានជាង ១,៥ លាននាក់ត្រូវបានកាត់ទោសដោយរាប់ចាប់ពីការកាត់ទោសដាក់ពន្ធនាគារក្នុងរយ:ពេលយូររហូតដល់ការបណ្តេញចេញពីមុខតំណែងជាផ្លូវការ ការដកតំណែង និងការបណ្ដេញចេញពីគណបក្សជាដើម។
ក្នុងរយៈពេលប៉ុន្មានខែថ្មីៗនេះ យុទ្ធនាការបង្ក្រាបអំពើពុករលួយនេះបានរីករាលដាលលើគ្រប់វិស័យរួមមាន យោធា ធនាគារ ធានារ៉ាប់រង អាជីវកម្មដែលគាំទ្រដោយរដ្ឋ និងកីឡា។
ទូរទស្សន៍រដ្ឋ CCTV បានរាយការណ៍កាលពីថ្ងៃចន្ទថា អតីតនាយកប្រតិបត្តិកំពូលនៅក្នុងក្រុមហ៊ុនប្រេង និងឧស្ម័នរដ្ឋម្នាក់ត្រូវបានចាប់ខ្លួនពីបទសង្ស័យថាបានទទួលសំណូក។
ហើយនៅថ្ងៃដដែលនោះ ទីភ្នាក់ងារប្រឆាំងអំពើពុករលួយបានប្រកាសពីការស៊ើបអង្កេតលើអតីតប្រធានការិយាល័យប្រតិបត្តិការសេដ្ឋកិច្ចផ្នែកផលិតផ្តាច់មុខថ្នាំជក់របស់រដ្ឋផងដែរ៕
ប្រភព៖ AFP/rl