ប្រែសម្រួល៖ រតនា
ក្រុងគែរៈ៖កាលពីថ្ងៃអាទិត្យទី ៧ មករាកងទ័ពអ៊ីស្រាអែលបានវាយប្រហារតាមអាកាសលើរថយន្តមួយគ្រឿងដែលកំពុងតែធ្វើដំណើរនៅក្បែរក្រុង Rafah ភាគខាងត្បូងនៃតំបន់ហ្គាហ្សាបណ្តាលឲ្យអ្នកសារព័ត៌មានប៉ាឡេស្ទីនពីរនាក់ស្លាប់នៅនឹងកន្លែងខណ:ដែលពួកគេកំពុងចុះយកព័ត៌មាន។
អ្នកសារព័ត៌មានប៉ាឡេស្ទីនទាំងពីរនាក់នោះមានឈ្មោះថា Hamza Al-Dahdouh និង Mustafa Thuraya គឺជាអ្នកសារព័ត៌មានឯករាជ្យ។ Al-Dahdouh បានធ្វើការជាអ្នកសារព័ត៌មានឯករាជ្យឲ្យទូរទស្ស Al Jazeera និងជាកូនប្រុសរបស់អ្នកឆ្លើយឆ្លងព័ត៌មានរបស់ស្ថានីយទូរទស្សន៍ដែលមានមូលដ្ឋាននៅប្រទេសកាតាក្នុងទីក្រុង Gaza, Wael Al-Dahdouh ។ អ្នកសារព័ត៌មានឯករាជ្យម្នាក់ទៀតដែលជាជនរងគ្រោះទីបីមានឈ្មោះថា Hazem Rajab ត្រូវបានរងរបួសផងដែរ។
បណ្តាញសារព័ត៌មានរបស់ទូរទស្ស Al Jazeera បានធ្វើការថ្កោលទោសចំពោះការស្លាប់អ្នកសារព័ត៌មានប៉ាឡេស្ទីនពីរនាក់នោះដោយបានចោទប្រកាន់ថាជាការវាយប្រហារដោយចេតនារបស់កងទ័ពអ៊ីស្រាអែល។
បណ្តាញសារព័ត៌មានរបស់ទូរទស្ស Al Jazeera នេះបាននិយាយនៅក្នុងសេចក្តីថ្លែងការណ៏ថា “យើងស្នើឲ្យតុលាការឧក្រិដ្ឋកម្មអន្តរជាតិ រដ្ឋាភិបាលនៃបណ្តាប្រទេសដែលពាក់ព័ន្ធ អង្គការសិទ្ធិមនុស្ស និងអង្គការសហប្រជាជាតិ ឲ្យអ៊ីស្រាអែលចេញមកទទួលខុសត្រូវលើអំពើឧក្រិដ្ឋកម្មដ៏សាហាវរបស់ខ្លួនដោយទាមទារឲ្យអ៊ីស្រាអែលបញ្ចប់ការសម្លាប់អ្នកសារព័ត៌មាន” ។
យោធាអ៊ីស្រាអែលនៅមិនទាន់បានធ្វើការឆ្លើយតបភ្លាមៗចំពោះសំណើសុំការធ្វើអត្ថាធិប្បាយលើការចោទប្រកាន់របស់បណ្តាញទូរទស្សន៍ស Al Jazeera អំពីការស្លាប់អ្នកសារព័ត៌ទាំងពីរនាក់នោះថាត្រូវបានយោធាអ៊ីស្រាអែលកំណត់គោលដៅវាយប្រហារដោយចេតនានោះទេ។
នៅក្នុងសេចក្តីថ្លែងការណ៍មួយកាលពីថ្ងៃទី ១៦ ខែធ្នូ ដែលជាការឆ្លើយតបទៅនឹងការស្លាប់របស់អ្នកកាសែត Al Jazeera ម្នាក់ផ្សេងទៀតនៅហ្គាហ្សា កងទ័ពអ៊ីស្រាអែលបាននិយាយថា “IDF មិនដែលមានចេតនាកំណត់គោលដៅលើអ្នកកាសែតឡើយ” ។
សង្គ្រាមរវាងអ៊ីស្រាអែលនិងហាម៉ាស់ដែលបានចាប់ផ្តើមកាលពីថ្ងៃទី៧តុលាបានសម្លាប់អ្នកយកព័ត៌មានអស់ជាច្រើមនាក់។ គណៈកម្មាធិការការពារអ្នកសារព័ត៌មាន (CPJ) ដែលជាអ្នកឃ្លាំមើលលំដាប់អន្តរជាតិបានថ្លែងថា គិតមកត្រឹមថ្ងៃសៅរ៍នេះ អ្នកសារព័ត៌មានចំនួន ៧៧ នាក់ហើយដែលត្រូវបានសម្លាប់ដែលក្នុងនោះមានអ្នកសារព័ត៌មានជនជាតិប៉ាឡេស្ទីនចំនួន ៧០ នាក់ អ៊ីស្រាអែល ៤ នាក់ និងលីបង់ ៣ នាក់ផងដែរ។
ការិយាល័យប្រព័ន្ធផ្សព្វផ្សាយរបស់រដ្ឋាភិបាលនៅតំបន់ហ្គាហ្សាដែលគ្រប់គ្រងដោយក្រុមហាម៉ាសបាននិយាយថាការស្លាប់ថ្មីចំនួនពីរបានបង្កើនចំនួនអ្នកសារព័ត៌មានដែលបានស្លាប់ដោយការវាយប្រហាររបស់អ៊ីស្រាអែលឡើងដល់ ១០៩នាក់ហើយ។
មានរូបភាពវីដេអូមួយត្រូវបានគេបង្ហោះលើបណ្តាញ YouTube ដែលតភ្ជាប់ពីបណ្តាញទូរទស្ស Al Jazeera បានបង្ហាញថា Wael Al-Dahdouh យំនៅក្បែរសាកសពកូនប្រុសរបស់គាត់ ហើយកាន់ដៃសពកូនរបស់គាត់។ ក្រោយមក បន្ទាប់ពីការបញ្ចុះសពកូនប្រុសរបស់គាត់រួចរាល់ហើយ គាត់ក៏បាននិយាយនៅក្នុងសុន្ទរកថាតាមទូរទស្សន៍ថា អ្នកសារព័ត៌មាននៅហ្គាហ្សានឹងតស៊ូធ្វើការងាររបស់ខ្លួនបន្តទៀត។ លោកបានអំពាវនាវឲ្យពិភពលោកមើលឲ្យឃើញនូវអ្វីដែលកំពុងកើតឡើងនៅទីនេះ”។
តាមរយ:ការអំពាវនាវលើបណ្តាញទូរទស្ស Al Jazeera ធ្វើឲ្យអ្នកទស្សនានៅទូទាំងតំបន់មជ្ឈឹមបូព៌ាបានស្គាល់លោក Wael Al-Dahdouh យ៉ាងច្បាស់បន្ទាប់មានការផ្សាយផ្ទាល់កាលពីខែមុនថាប្រពន្ធ កូនប្រុស កូនស្រី និងចៅប្រុសម្នាក់ទៀតរបស់គាត់ត្រូវបានសម្លាប់នៅក្នុងការវាយប្រហារតាមអាកាសរបស់យោធាអ៊ីស្រាអែល។
រដ្ឋមន្ត្រីការបរទេសអាមេរិក លោក Antony Blinken បានថ្លែងថា ការសម្លាប់អ្នកសារព័ត៌មានកាលពីថ្ងៃអាទិត្យគឺជា “សោកនាដកម្មហួសពីការស្មាន” ហើយគាត់បន្តថាគាត់ “សោកស្តាយយ៉ាងខ្លាំង” ចំពោះការបាត់បង់គ្រួសារលោក Al-Dahdouh ។
លោក Blinken បានថ្លែងនៅក្នុងសន្និសីទសារព័ត៌មាននៅទីក្រុង Doha រដ្ឋធានីកាតាថា ” ចំនួនអ្នកសារព័ត៌មានដែលត្រូវបានសម្លាប់មានចំនួនកាន់តែច្រើនឡើង” ។
អ្នកសារព័ត៌មានម្នាក់ទៀតដែលបានស្លាប់នោះគឺជាអ្នកយកព័ត៌មានរបស់ Reuters។ ក្រោមការស៊ើបអង្កេតរបស់ Reuters បានរកឃើញថា អ្នកយកព័ត៌មានជនជាតិលីបង់ម្នាក់ត្រូវបានសម្លាប់កាលពីថ្ងៃទី ១៣ ខែតុលា ដោយកងរថក្រោះអ៊ីស្រាអែល ខណៈដែលគាត់កំពុងថតយករូបភាពនៃការបាញ់ផ្លោងរបស់កងរថក្រោះអ៊ីស្រាអែលឆ្លងព្រំដែនទៅលើទឹកដីលីបង់៕
ប្រភព៖ Reuters/fs