ប្រែសម្រួល៖ ស.សម្បត្តិ
![](https://cambodiaflashnews.com/wp-content/uploads/2021/06/top-banner.gif)
កាលពីថ្ងៃសៅរ៍ ទី ៦ មករា អភិបាលក្រុង Pokrovsk បាននិយាយថារុស្ស៊ីបានបង្កើនការវាយប្រហារកាន់តែខ្លាំងឡើងបណ្តាលឲ្យមនុស្សយ៉ាងហោចណាស់ ១១ នាក់ដែលក្នុងនោះមានកុមារ ៥ នាក់ត្រូវបានសម្លាប់ក្រោមការវាយប្រហារដោយមិស៊ិលទៅលើទីក្រុង Pokrovsk ភាគខាងកើតអ៊ុយក្រែន ។
ការវាយប្រហារដោយមិស៊ិលរបស់រុស្ស៊ីបានកើនឡើងខ្លាំងជាងមុនចាប់តាំងពីចុងខែធ្នូមក។ នៅក្នុងជម្លោះរវាងអ៊ុយក្រែន និងរុស្ស៊ី បង្កឲ្យមានមនុស្សស្លាប់ និងរបួសយ៉ាងច្រើន។ សង្រ្គាមដែលបង្កឡើងដោយរុស្ស៊ីនៅលើទឹកដីអ៊ុយក្រែននៅក្នុងខែកុម្ភៈ ឆ្នាំ ២០២២ មកទល់នឹងពេលនេះអស់ពេលជិតពីឆ្នាំហើយ។
នៅក្នុងស្ថានភាពវាយលុកដ៏សន្ធាប់ពីសំណាក់កងទ័ពរុស្ស៊ីនៅភាគខាងកើតអ៊ុយក្រែនសមរភូមិជួរមុខមានភាពតានតឹងខ្លាំងធ្វើឲ្យកងទ័ពអ៊ុយក្រែនបង្កើនការប្រុងប្រយ័ត្ននៅតាមខ្សែត្រៀមជួរមុខកាន់តែខ្លាំងជាងមុនដោយពួកគេមិនអាចផ្លាស់ប្តូរគ្នាបានឡើយ។
នៅក្នុងខណ:ដែលកងទ័ពរុស្ស៊ីធ្វើការវាយប្រហារតំបូងបង្អស់ដោយមិស៊ិល S-300 ទៅលើតំបន់ភាគខាងកើតអ៊ុយក្រែនបានបង្កឲ្យមានមនុស្ស៨នាក់រងរបួស។
បន្ទាប់មកលោក Vadim Filashkin ប្រធានតំបន់ Donetsk បានចេញមកបង្ហោះសារនៅលើ Telegram ឲ្យដឹងថា “ការវាយប្រហារជាចម្បងត្រូវបានផ្តោតគោលដៅទៅលើ Pokrovsk និង Rivne នៅក្នុងសហគមន៍នៃ Myrnograd” ។
គាត់បានបង្ហោះរូបភាពបង្ហាញពីសកម្មភាពអ្នកជួយសង្គ្រោះដែលកំពុងធ្វើការរុះរើកំទេចកំទី ផ្ទះចំនួនប្រាំមួយដែលបានបំផ្លាញដោយគ្រាប់មិស៊ិលនៅ Pokrovsk និងមួយទៀតនៅ Rivne ក្បែរនោះផងដែរ។
បើងយោងតាមអ្នកសង្គ្រោះបន្ទាន់បានឲ្យដឹងថាចំនួនអ្នកស្លាប់ក្រោយមកអាចកើនឡើងជាបន្តបន្ទាប់ដែលឥឡូវនេះរកឃើញសាកសពចំនួន ៦ នាក់ហើយ រួមទាំងកុមារ ២ នាក់ផង ដែលត្រូវបានទាញចេញពីគំនរបាក់បែកនៃអគារមួយក្នុងចំណោមអគារបាក់បែកទាំងនោះ។
លោក Volodymyr Zelenskyy ប្រធានាធិបតីអ៊ុយក្រែន បានថ្កោលទោសការវាយប្រហារដោយគ្រាប់មិស៊ិលនេះថា “រុស្ស៊ីតែងតែផ្តោតគោលដៅទៅលើអគារលំនៅឋានធម្មតាៗ ដែលជាផ្ទះរបស់ប្រជាជន”។
លោកបានបេ្តជ្ញាថា នឹងធ្វើការវាយបកវិញទ្វេដងដោយមិនអនុញ្ញាតឲ្យកងទ័ពរុស្សីរួចខ្លួនជាដាច់ខាត។
ទីប្រជុំជន Pokrovsk ធ្លាប់មានប្រជាជនរស់នៅចំនួន ៦០,០០០ នាក់ហើយក៏ធ្លាប់រងនូវការវាយប្រហារដោយការទម្លាក់គ្រាប់បែកដ៏សាហាវមួយកាលពីខែសីហាឆ្នាំមុនបណ្តាលឲ្យមនុស្ស ៩ នាក់ស្លាប់ និង ៨២ នាក់រងរបួស។
ទីក្រុងនេះមានចម្ងាយប្រហែល៥០គីឡូម៉ែត្រពីខ្សែត្រៀមជួរមុខ។
ចំណែកនៅតំបន់ Kherson នៃភាគខាងត្បូងអ៊ុយក្រែនក៏មានមនុស្សពេញវ័យម្នាក់ និងកុមារពីរនាក់បានរងរបួសនៅក្នុងការបាញ់ផ្លោងនេះផងដែរ ។
បើយោងតាមអាជ្ញាធរក្នុងតំបន់រៀងៗខ្លួនបានឲ្យដឹងថា មនុស្សម្នាក់បានស្លាប់នៅក្នុងទីក្រុង Toretsk ជិត Bakhmut ហើយម្នាក់ទៀតបានស្លាប់ និងពីរនាក់ទៀតរងរបួសនៅក្នុងទីក្រុង Nikopol នៅភាគខាងកើត។សរុបទាំងអស់នៅក្នុងការវាយប្រហារនៅទូទាំងតំបន់នៃភាគខាងកើតអ៊ុយក្រែនបានសម្លាប់មនុស្សចំនួន១១នាក់ដែលក្នុងនោះមានកុមាចំនួន ៥ នាក់ផងដែរ៕
ប្រភព៖ Reuters/fs