ប្រែសម្រួល៖ ស្រីស្រស់
![](https://cambodiaflashnews.com/wp-content/uploads/2021/06/top-banner.gif)
ប៉េកាំង៖ អ្នកនាំពាក្យក្រសួងការបរទេសចិន បាននិយាយនៅថ្ងៃអាទិត្យ (៧មករា)ថា ប្រទេសចិននឹងដាក់ទណ្ឌកម្មក្រុមហ៊ុនផលិតអាវុធអាមេរិកចំនួនប្រាំ ដើម្បីជាការឆ្លើយតបទៅនឹងការលក់អាវុធចុងក្រោយបំផុតរបស់សហរដ្ឋអាមេរិកទៅឱ្យកោះតៃវ៉ាន់។
ការលក់អាវុធរបស់សហរដ្ឋអាមេរិកទៅឲ្យតៃវ៉ាន់គឺជាប្រភពនៃភាពតានតឹងជាញឹកញាប់រវាងក្រុងវ៉ាស៊ីនតោន និងក្រុងប៉េកាំង។
ការដាក់ទណ្ឌកម្មនេះកើតមានមុនការបោះឆ្នោតប្រធានាធិបតីនិងសភានៅថ្ងៃទី 13 ខែមករារបស់កោះតៃវ៉ាន់ ដែលចិនបានដាក់ជាជាជម្រើសរវាងសង្រ្គាម និងសន្តិភាព។
ក្រសួងការបរទេសសហរដ្ឋអាមេរិកកាលពីខែមុនបានអនុម័តការលក់ឧបករណ៍ចំនួន 300 លានដុល្លារដើម្បីជួយរក្សាប្រព័ន្ធព័ត៌មានយុទ្ធសាស្ត្ររបស់តៃវ៉ាន់។
អ្នកនាំពាក្យបាននិយាយនៅក្នុងសេចក្តីថ្លែងការណ៍មួយថា ការលក់សព្វាវុធនាពេលថ្មីៗនេះ “ធ្វើឱ្យប៉ះពាល់ដល់អធិបតេយ្យភាព និងផលប្រយោជន៍សន្តិសុខរបស់ប្រទេសចិនយ៉ាងធ្ងន់ធ្ងរ ធ្វើឱ្យប៉ះពាល់ដល់សន្តិភាព និងស្ថិរភាពនៅច្រកសមុទ្រតៃវ៉ាន់យ៉ាងធ្ងន់ធ្ងរ”។
ក្រុមហ៊ុនដែលនឹងត្រូវដាក់ទណ្ឌកម្មគឺ BAE Systems Land and Armaments, Alliant Techsystems Operations, AeroVironment, Viasat និង Data Link Solutions ។
អ្នកនាំពាក្យរូបនេះបាននិយាយថា ប្រទេសចិននឹងបង្កកទ្រព្យសម្បត្តិរបស់ក្រុមហ៊ុនទាំងនេះ និងហាមប្រាមមនុស្ស ឬអង្គការនានាក្នុងប្រទេសចិនមិនឱ្យចូលរួមជាមួយពួកគេ៕
ប្រភព៖ Reuters/mi