ប្រែសម្រួល៖ សហការី
បេរូត៖ ក្នុងថ្ងៃសៅរ៍ ទី៦ មករា ក្រុមជីវពលហេសបូឡាហ៍នៅលីបង់បានបាញ់រ៉ុក្កែតជាង ៦០ គ្រាប់ទៅលើមូលដ្ឋានយោធាអ៊ីស្រាអែលមួយកន្លែង ក្រុមនេះបានអះអាងថា ការវាយប្រហារដោយមីស៊ីលនេះគឺជាការឆ្លើយតបចំពោះការសម្លាប់មេដឹកនាំទីពីររបស់ក្រុមហាម៉ាសនៅក្នុងក្រុងបេរូត។
ក្រុមជីវពលហេសបូឡាហ៍ដែលគាំទ្រដោយអ៊ីរ៉ង់បានបញ្ជាក់នៅក្នុងសេចក្តីថ្លែងការណ៍មួយថា ការវាយប្រហារដោយមីស៊ីលគឺ “ជាការសងសឹកទៅនឹងឧក្រិដ្ឋកម្មធ្វើឃាតមេដឹកនាំចលនាតស៊ូអ៊ីស្លាមឈ្មោះ Sheikh Saleh al-Arouri ដែលជាអ្នកដឹកនាំការតស៊ូអ៊ីស្លាម។ការវាយប្រហារនេះត្រូវបានកំណត់គោលដៅលើមូលដ្ឋានគ្រប់គ្រងដែនអាកាសនៃមូលដ្ឋានយោធាអ៊ីស្រាអែលហៅថា Meron ដោយបានបាញ់មីស៊ីលប្រភេទផ្សេងៗគ្នាចំនួន ៦២គ្រាប់ ” ។
គេបានសង្កេតឃើញថាមានការវាយប្រហារតគ្នាទៅវិញទៅមកជាប្រចាំនៅតាមបណ្តោយព្រំដែនអ៊ីស្រាអ៊ែលនិងលីបង់ដែលភាគច្រើនកើតឡើងរវាងកងកម្លាំងអ៊ីស្រាអែល និងក្រុមជីវពលហេសបូឡាហ៍ដែលជាសម្ព័ន្ធមិត្តរបស់ក្រុមហាម៉ាសចាប់តាំងពីផ្ទុះសង្រ្គាមរវាងអ៊ីស្រាអែល និងក្រុមហាម៉ាស់កាលពីថ្ងៃទី ៧ ខែតុលាឆ្នាំ២០២៣កន្លងទៅ។
ការសម្លាប់លោក Aouri មេដឹកនាំចលនាតស៊ូអ៊ីស្លាមកាលពីថ្ងៃអង្គារនៅក្នុងបន្ទាយ Hezbollah ភាគខាងត្បូងទីក្រុង Beirut នោះមន្ត្រីការពារជាតិអាមេរិកបានប្រាប់ AFP ថាត្រូវបានធ្វើឡើងដោយអ៊ីស្រាអែលហើយព្រឹត្តិការណ៍នេះកាន់តែបង្កើនការភ័យខ្លាចបន្ថែមទៀត។
អ៊ីស្រាអែលមិនបានចេញមុខអះអាងទទួលខុសត្រូវចំពោះការវាយប្រហារនេះទេ ដែលជាការវាយប្រហារជាលើកដំបូងមកលើរដ្ឋធានីរបស់ប្រទេសលីបង់ចាប់តាំងពីមានរឿងអរិភាពបានចាប់ផ្តើមកាលពីឆ្នាំមុន។
ប្រភពពីយោធាអ៊ីស្រាអែលបាននិយាយថា ខ្លួនបានកំណត់អត្តសញ្ញាណនូវប្រភពបាញ់រ៉ុក្កែតប្រហែលជាង ៤០ គ្រាប់ចេញពីទឹកដីលីបង់នៅព្រឹកថ្ងៃសៅរ៍ ដោយបានបន្ថែមនៅក្នុងសេចក្តីថ្លែងការណ៍ថា មិនយូរប៉ុន្មានក្រោយមកកងកម្លាំងអ៊ីស្រាអែលក៏បានធ្វើការតបតចំពោះការបាញ់រ៉ុក្កែតមកលើមូលដ្ឋានយោធាអ៊ីស្រាអែល ។
សម្លេងស៊ីរ៉ែនសម្រាប់ជាសញ្ញានៃការលបវាយឆ្មក់តាមអាកាសបានបន្លឺឡើងតាមទីក្រុងនានានៅទូទាំងភាគខាងជើងអ៊ីស្រាអែលក្រោយមកក៏ឮសម្លេងផ្ទុះគ្រាប់នៅក្នុងតំបន់ Golan Heights ដែលកាន់កាប់ដោយកងទ័ពអ៊ីស្រាអែល។
នៅក្នុងសុន្ទរកថាមួយកាលពីថ្ងៃសុក្រ មេដឹកនាំក្រុម Hezbollah លោក Hassan Nasrallah បានព្រមានអ៊ីស្រាអែលថា ពួកគេនឹងឆ្លើយតបយ៉ាងឆាប់រហ័ស “នៅលើសមរភូមិ” ចំពោះការសម្លាប់មេដឹកនាំចលនាតស៊ូអ៊ីស្លាម លោក Aouri ។
ភ្លើងសង្គ្រាមឆ្លងដែនបានផ្ទុះឡើងជិតបីខែហើយបានសម្លាប់មនុស្សអស់ជាង១៧៥នាក់នៅក្នុងប្រទេសលីបង់ដែលក្នុងនោះមានកងជីវពលហេសបូឡាចំនួន១២៩នាក់ ហើយនិងជនស៊ីវិលជាង២០នាក់រួមទាំងអ្នកកាសែតបីនាក់ផងដែរនេះបើយោងតាមតួលេខរបស់ AFP។
ចំណែកនៅភាគខាងជើងនៃប្រទេសអ៊ីស្រាអែល ក៏មានទាហានអ៊ីស្រាអែល៩នាក់ និងជនស៊ីវិលយ៉ាងតិច៤នាក់ត្រូវបានសម្លាប់ នេះបើយោងតាមការបញ្ជាក់របស់អាជ្ញាធរអ៊ីស្រាអែល៕
ប្រភព៖ AFP/gr