ប្រែសម្រួល៖សហការី
LAS VEGAS៖ កាលពីថ្ងៃពុធ ទី ៣ មករាមានអំពើហិង្សាមួយបានកើតឡើងនៅក្នុងតុលាការស្រុក Clark County នៅក្រោយពេលដែលចៅក្រមលោកស្រី Mary Kay Holthus បានច្រានចោលការស្នើសុំឲ្យបន្ធូរបន្ថយទោសដែលបានស្នើឡើងដោយជនជាប់ចោទឈ្នោះ Redden មានអាយុ ៣០ ឆ្នាំនៅក្នុងសំណុំរឿងបង្ករបួសស្នាមមួយដែលលោកស្រីកំពុងរៀបចំចេញសាលក្រមសម្រេចដាក់ទោសឲ្យជាប់ពន្ធនាគារ។
បុរសជនជាតិ Nevada ម្នាក់ដែលត្រូវបានតុលាការកំពុងបើកសវនាការកាត់ទោសបានធ្វើការវាយដំលើចៅក្រមនៅក្នុងបន្ទប់សវនាការរបស់តុលាការ Las Vegas ដោយបានវាយទៅលើលោកស្រីចៅក្រម ខណៈដែលគាត់ហៀបនឹងចេញសាលក្រមសម្រេចដាក់ទោសឲ្យជាប់ពន្ធនាគារ។ នៅក្នុងហេតុការណ៏ដ៏ច្របូកច្របល់មួយដែលត្រូវបានគេថតនៅក្នុងវីដេអូនៅក្នុងបន្ទប់សវនាការរបស់តុលាការ។
នៅមួយសន្ទុះមុនពេលមានការវាយដំមកលើរូបលោកស្រីចៅក្រមបុរសជនជាប់ចោទឈ្មោះ Redden បានធ្វើការស្នើសុំឲ្យលោកស្រីចៅក្រមសម្រេចបន្ធូរបន្ថយទោស ដោយនិយាយថាគាត់មិនសមនឹងត្រូវកាត់ទោសឲ្យជាប់គុកនោះទេ។
នៅក្នុងរូបភាពវីដេអូបានបង្ហាញពីសកម្មភាពរបស់ជនល្មើសឈ្មោះ Redden ហក់ទៅសង្គ្រុបវាយលោកស្រីចៅក្រម ខណៈដែលគាត់កំពុងព្យាយាមគេចចេញពីកន្លែងនោះ។ បុរសពីរនាក់ និងមន្ត្រីតុលាការឯកសណ្ឋានម្នាក់បានប្រតាយប្រតប់គ្នាដោយបានប្រើកណ្តាប់ដៃដាល់ទៅលើ Redden នៅមុនពេលត្រូវបានអូសចេញពីបន្ទប់សវនាការរបស់តុលាការ។
លោកស្រីចៅក្រម Holthus ហាក់ដូចជាមានអារម្មណ៏ភិតភ័យខណ:ដែលគាត់បានងើបដើរចេញពីកៅអីខាងក្រោយ ចំណែកអ្នកនាំពាក្យរបស់តុលាការបានប្រាប់អ្នកសារព័ត៌មាន Las Vegas Review-Journal ថា គាត់បានរងរបួស ហើយកំពុងត្រូវបានពេទ្យពិនិត្យមុខរបួសចំណែកស្ថានភាពរបួសរបស់គាត់មិនត្រូវបានពេទ្យបញ្ជាក់ឲ្យដឹងនោះទេ។
សារព័ត៌មាន Review-Journal បានរាយការណ៍ថា ឆ្មាំការពារមួយរូបត្រូវបានបញ្ជូនទៅកាន់មន្ទីរពេទ្យ បន្ទាប់ពីទទួលរងរបួសតែមិនគំរាមកំហែងដល់អាយុជីវិតនោះទេ។
មន្ត្រីតុលាការ និងមេធាវីដែលពាក់ព័ន្ធនឹងករណីនេះមិនអាចសុំការធ្វើអត្ថាធិប្បាយបានភ្លាមៗទេ។
ជនល្មើស Redden ត្រូវបានឃុំខ្លួននៅក្នុងពន្ធនាគារ Clark County កាលពីថ្ងៃព្រហស្បតិ៍។ គាត់ត្រូវប្រឈមនឹងករណីជាច្រើនថែមទាំងមានការបំភិតបំភ័យថានឹងមានការចោទប្រកាន់បន្ថែមទៀតពីបទវាយដំលើមន្ត្រីសាធារណៈកាលពីថ្ងៃពុធ។
ជនល្មើស Redden បានស្ថិតនៅក្នុងតុលាការកាលពីថ្ងៃពុធដើម្បីចូលរួមសវនាការកាត់ទោសក្នុងសំណុំរឿងមុនដែលជនល្មើសបានសារភាពពីទោសកំហុសរបស់ខ្លួន។
បើយោងតាមកំណត់ត្រារបស់តុលាការបានបង្ហាញថាជនល្មើស Redden ត្រូវបានឃុំខ្លួនបន្ទាប់ពីគាត់ត្រូវបានគេរកឃើញថាមានទោសពីបទលួចនៅក្នុងឆ្នាំ ២០១៩ ហើយបន្ទាប់មកនៅឆ្នាំ ២០២១ ពីបទបង្ករបួសស្នាមលើរូបកាយអ្នកស្រុក៕
ប្រភព៖ Reuters/fs