ប្រែសម្រួល៖ សហការី
ហ្ស៊េរុយសាឡឹម៖ ផែនការយោធាអ៊ីស្រាអែល ក្នុងការស៊ើបអង្កេតផ្ទៃក្នុងលើការវាយប្រហាររបស់ ក្រុមហាម៉ាស កាលពីថ្ងៃទី ៧ ខែតុលា ដែលបង្កឲ្យមានសង្រ្គាមនៅតំបន់ហ្គាហ្សា កំពុងរងការរិះគន់ ពីមន្ត្រីស្តាំនិយម ដែលចង់ឲ្យមានការពិនិត្យឡើងវិញឲ្យកាន់តែស៊ីជម្រៅលើគោលនយោបាយសម្រាប់ដោះស្រាយជុំវិញបញ្ហាប៉ាឡេស្ទីន។
នៅក្នុងអំឡុងសន្និសីទសារព័ត៌មានដ៏ខ្លីមួយនៅល្ងាចថ្ងៃព្រហស្បតិ៍ ទី៤ មករា ប្រមុខយោធាអ៊ីស្រាអែល លោកឧត្តមសេនីយ Herzi Halevi បានជូនដំណឹងដល់រដ្ឋមន្ត្រីសន្តិសុខជាតិអំពីការស៊ើបអង្កេតដែលបានគ្រោងទុក ។
របាយការណ៏ស្តីពីសន្និសីទនេះត្រូវបានបិទបាំង ក៏ប៉ុន្តែព័ត៌មានមួយចំនួនត្រូវបានផ្សព្វផ្សាយដោយប្រព័ន្ធផ្សព្វផ្សាយរបស់អ៊ីស្រាអែល រួមទាំងការរិះគន់របស់មន្ត្រីមួយចំនួនដែលមានវត្តមាននៅក្នុងសន្និសីទនោះផងដែរ។
ការវាយឆ្មក់កាលពីថ្ងៃទី ៧ ខែតុលាដោយក្រុមសកម្មប្រយុទ្ធហាម៉ាស ដែលអ៊ីស្រាអែលបានឲ្យដឹងថា មានមនុស្សប្រហែល ១,២០០ នាក់ត្រូវបានសម្លាប់ និងប្រហែល ២៤០ នាក់ត្រូវបានចាប់ធ្វើជាចំណាប់ខ្មាំង បានលេចចេញជាសំណួរថាតើកងរក្សាសន្តិសុខរបស់ប្រទេសនេះដេកលក់ឬមួយយ៉ាងណា ហេតុនេះហើយបានធ្វើឲ្យនាយករដ្ឋមន្ត្រី Benjamin Netanyahu រងនូវការរិះគន់យ៉ាងច្រើន។
មិនដូចមន្ត្រីកំពូលៗមួយចំនួនទៀតដែលជាអ្នកមិនបានទទួលខុសត្រូវដោយផ្ទាល់លើផ្នែករក្សាសន្តិសុខជាតិនោះទេ។ លោកនាយករដ្ឋមន្ត្រីបាននិយាយជាទូទៅបន្ថែមទៀតលើតម្រូវការជាយថាហេតុជាសាធារណៈដែលត្រូវតាក់តែងគោលនយោបាយដោយយោងតាមការព្យាករសម្រាប់រយៈពេលវែងលើការស្វែងរកដំណោះស្រាយជុំវិញបញ្ហានៅតំបន់ Gaza ។
មន្ត្រីស្តាំនិយមពីរនាក់បាននិយាយថា ពួកគេមានការខកចិត្តចំពោះការដាក់បញ្ចូលការស៊ើបអង្កេតរបស់យោធាដែលដឹកនាំដោយលោក Shaul Mofaz ដែលជាឧត្តមសេនីយ៍ចូលនិវត្តន៍ និងជារដ្ឋមន្ត្រីការពារជាតិ នៅពេលដែលកងទ័ពអ៊ីស្រាអែលបានដកចេញពីតំបន់ Gaza Strip ដោយឯកតោភាគីនៅក្នុងឆ្នាំ ២០០៥ ហើយបានបំផ្លាញការតាំងទីលំនៅរបស់ជនជាតិជ្វីហ្វនៅទីនោះផងដែរ។
រដ្ឋមន្ត្រីទាំងពីររូបនោះគឺលោក Itamar Ben-Gvir និង Bezalel Smotrich បានចោទប្រកាន់អតីតឧត្តមសេនីយម្នាក់ទៀតដែលបានជួយស៊ើបអង្កេតថាបានធ្វើឲ្យយោធាចុះខ្សោយដោយគាំទ្រក្រុមដែលបានតវ៉ាទាមទារម្តងហើយម្តងទៀតឲ្យមានការផ្លាស់ប្តូរប្រព័ន្ធតុលាការដែលតែងតាំងដោយលោក Netanyahu កាលពីឆ្នាំមុន។
លោក Ben-Gvir បាននិយាយនៅលើសារបង្ហោះថា “អ្នកទាំងនេះគឺជាមនុស្សដែលគួរតែស្ថិតនៅក្រោមការស៊ើបអង្កេត ហើយត្រូវតែបែងចែកឲ្យដាច់ស្រឡះថាអ្នកណាដែលមិនគួរដាក់ឲ្យស្ថិតនៅក្រោមការស៊ើបអង្កេត” ។
នៅក្នុងការបង្ហោះសារតាមអ៊ីនធឺណិតផ្ទាល់ខ្លួនរបស់គាត់លោក Smotrich បាននិយាយថាគាត់មិនមានគោលការណ៍ប្រឆាំងនឹងការត្រួតពិនិត្យរបស់យោធាដែលមានបំណងកែលម្អការធ្វើសង្គ្រាមនោះទេ។
ប៉ុន្តែការស៊ើបអង្កេតលើគោលដៅណាមួយដែលជាដើមចមនាំឲ្យមានព្រឹត្តិការណ៍នៅថ្ងៃទី ៧ ខែតុលា គឺទាមទារឲ្យដាក់បញ្ចូលសមាសភាពគណៈរដ្ឋមន្ត្រីនៅក្នុងនោះដែរ។
ការិយាល័យអ្នកនាំពាក្យយោធាអ៊ីស្រាអែលបានបញ្ជាក់ថា ការស៊ើបអង្កេតនៅមិនទាន់បានចាប់ផ្តើមនៅឡើយទេ ដោយបន្ថែមថា “បុគ្គលិកការិយាល័យទូទៅកំពុងរៀបចំផែនការសម្រាប់ដំណើរការស៊ើបអង្កេត និងចេញសេចក្តីសម្រេចតែងតាំងប្រធានក្រុមសម្រាប់ដឹកនាំការស៊ើបអង្កេត”៕
ប្រភព៖ Reuters/ga