ប្រែសម្រួល៖ ស.សម្បត្តិ
![](https://cambodiaflashnews.com/wp-content/uploads/2021/06/top-banner.gif)
តូក្យូ៖ បើយោងតាមការចុះផ្សាយដែលគេបានដឹងថា បន្ទាប់ពីមានហេតុការណ៍យន្តហោះពីគ្រឿងបានបុកគ្នាកាលពីថ្ងៃអង្គារ ទី២ មករា ឆ្នាំ២០២៤ នៅអាកាសយានដ្ឋាន ហានណេដា នៃក្រុងតូក្យូ ដែលនៅទីបញ្ចប់យន្តហោះទាំងពីរគ្រឿងនោះត្រូវបានបំផ្លិចបំផ្លាញដោយសារតែភ្លើងឆេះបន្សល់ទុកនូវកំទេចកំទីសាកសពយន្តហោះតែប៉ុណ្ណោះ។
មនុស្ស៥នាក់នៅលើយន្តហោះឆ្មាំឆ្នេរសមុទ្របានស្លាប់ បន្ទាប់ពីត្រូវបានបុកដោយយន្តហោះ Airbus A350 របស់ ក្រុមហ៊ុនអាសចរណ៏ជប៉ុនហៅថា JAL ដែលកំពុងរត់លើផ្លូវចូលមកចត ប៉ុន្តែមានរឿងដ៏គួរឲ្យភ្ញាក់ផ្អើលមួយដោយសារតែអ្នកដំណើរនៅលើយន្តហោះ JAL Airbus A350 របស់ក្រុមហ៊ុនអាសចរណ៏ជប៉ុនទាំង ៣៧៩នាក់ត្រូវបានជម្លៀសចេញដោយសុវត្ថិភាពនៅមុនពេលដែលយន្តហោះនេះផ្ទុះឡើងជះអណ្តាតភ្លើងយ៉ាងសន្ធោសន្ធៅលេបត្របាក់តួយន្តហោះទាំងុមូលឆេះខ្ទេចបន្សល់ទុកនូវកំទេចកំទីសាកសពយន្តហោះតែប៉ុណ្ណោះ។
- ដំណើររឿង
យោងតាមការចេញផ្សាយដោយរដ្ឋាភិបាលជប៉ុន ជើងហោះហើរ JAL-៥១៦ របស់ក្រុមហ៊ុនអាកាសចរណ៍ជប៉ុន ដំណើរការដោយ Airbus A៣៥០ ដែលបានមកដល់កោះហុកកៃដូត្រូវបានគេបោសសម្អាតយន្តហោះនៅវេលាម៉ោង ៥ ល្ងាចក្រោយមកក៏បានបន្តដំណើរមកកាន់ព្រលាន ហាណេដា ក្នុងទីក្រុងតូក្យូ ដោយមានអ្នកដំណើរចំនួន ៣៧៩ នាក់រួមទាំងនាវិកនៅលើយន្តហោះហើយក៏បានសួរមកកាន់អ្នកគ្រប់គ្រងចរាចរណ៍ផ្លូវអាកាសដើម្បីសុំការចុះចតនៅលើផ្លូវរត់លេខ ៣៤R ។
ចំណែកយន្តហោះ tarmac របស់កងឆ្មាំឆ្នេរសមុទ្រដែលមានជើងហោះហើរលេខ JA722A ត្រូវបានណែនាំក្នុងរយ:ពេល ១៥ វិនាទីក្រោយមកឲ្យរង់ចាំនៅត្រង់ “ចំណុច C៥” ដែលមានទីតាំងយ៉ាងហោចណាស់ចម្ងាយ ៥០ ម៉ែត្រពីគែមនៃផ្លូវរត់របស់យន្តហោះ JAL-៥១៦ ។
បន្ទាប់មកអ្នកបើកយន្តហោះ JA722A របស់កងឆ្មាំឆ្នេរសមុទ្របានទទួលយកការបញ្ជាភ្លាមៗ ។
ប្រហែលពីរនាទីក្រោយមក ជើងហោះហើររបស់ Japan Airlines បានធ្វើការចុះចតហើយក៏បានបុកជាមួយនឹងយន្តហោះ DHC-8 របស់កងឆ្មាំឆ្នេរសមុទ្រ យោងតាមហេតុការណ៍ជាក់ស្តែងបានបង្ហាញឲ្យឃើញថា យន្តហោះដែលបានធ្វើការចុះចតក្រោយនេះបានបន្តដំណើរលើផ្លូវរត់យ៉ាងពិតប្រាកដមែន។
កាពីទែនរបស់យន្តហោះ JA722A Genki Miyamoto គឺជាមនុស្សតែម្នាក់គត់ដែលអាចនៅរស់រានមានជីវិតបានទូរសព្ទទាក់ទងភ្លាមៗបន្ទាប់ពីឧបទ្ទវហេតុនេះបានកើតឡើងគាត់បានបញ្ជាក់ថាគាត់បានទទួលការអនុញ្ញាតឲ្យហោះឡើង។
អ្នកនាំពាក្យរបស់ក្រុមហ៊ុនអាកាសចរណ៍ JAL បានប្រាប់ AFP កាលពីថ្ងៃព្រហស្បតិ៍ថា បុគ្គលិកជើងហោះហើរ JAL មិនបាន “មើលឃើញ” យន្តហោះផ្សេងទៀតទេ បើទោះបីជាពួកគេម្នាក់បានប្រទះឃើញទំនងដូចជា “វត្ថុ” អ្វីម្យ៉ាងនៅមុនពេលដែលបានប៉ះទង្គិចគ្នាក៏ដោយ។
- ប្រអប់ខ្មៅ
អ្នកស៊ើបអង្កេតនៅមិនទាន់បានធ្វើសេចក្តីសន្និដ្ឋានជាសាធារណៈនៅឡើយទេ។ឧបករណ៍ថតសំឡេងនៅក្នុងពេលហោះហើររបស់យន្តហោះ JAL និងឧបករណ៍ថតសំឡេងរបស់យន្តហោះឆ្មាំឆ្នេរសមុទ្រត្រូវបានគេរកឃើញ។
អ្នកជំនាញអាកាសចរណ៍ Guido Carim Junior មកពីសាកលវិទ្យាល័យ Griffith បានប្រាប់ AFP ថា “ត្រូវតែរង់ចាំការស៊ើបអង្កេតលើគ្រោះថ្នាក់មួយនេះឲ្យបានហ្មត់ចត់ ដើម្បីធ្វើសេចក្តីសន្និដ្ឋានថា តើមានអ្វីកើតឡើង”។
លោកបានបន្តថា” ជាទូទៅ គ្រោះថ្នាក់បែបនេះតែងតែកើតចេញពីកត្តាជាច្រើនដែលមានដំណើររឿងជាប់ពាក់ព័ន្ធគ្នាទៅវិញទៅមក ហើយយើងមិនអាចប្រញាប់ប្រញាល់ដាក់កំហុសលើមនុស្ស ឬលើបច្ចេកវិទ្យាមិនដំណើរការបានភ្លាមៗនោះទេ”។
- ភ្លើងឆេះ
គេសង្កេតឃើញមានអណ្តាតភ្លើងពណ៌ដូចទឹកក្រូចឆាបឆេះឡើង និងមានផ្សែងខ្មៅអាប់នៅខាងក្រោមកន្ទុយយន្តហោះ JAL នៅពេលវាបន្ទាបខ្លួនចុះរត់លើផ្លូវ។ ចំណែកយន្តហោះឆ្មាំឆ្នេរមិនអាចបង្ហាញនូវរូបភាពនៅក្នុងឧបទ្ទវហេតុនេះបានទេ។
វីដេអូដែលថតបានដោយអ្នកដំណើរបានបង្ហាញពីអណ្តាតភ្លើងបានឆាបឆេះនៅក្រោមកន្ទុយយន្តហោះ ហើយមានផ្សែងហុយទ្រលោមពាសពេញកាប៊ីន ក្នុងខណ:ពេលនោះដែរក៏មានឮសម្លេងទារកយំ ហើយនិងសម្លេងមនុស្សស្រែកឆោឡោហៅឲ្យបើកទ្វារយន្តហោះ។
សារព័ត៌មានNHK បានរាយការណ៍ថា អ្នកបម្រើការលើយន្តហោះទាំងប្រាំបួននាក់ត្រូវការការអនុញ្ញាតជាមុនសិនទើបអាចបើកទ្វារយន្តហោះដែលជាច្រកសម្រាប់សង្គ្រោះបន្ទាន់ ហើយប្រធានរបស់ពួកគេបានជូនដំណឹងដល់កាប៊ីនយន្តហោះអំពីអគ្គិភ័យដើម្បីទទួលបានការអនុញ្ញាតបើកទ្វារយន្តហោះ។
- ការចាកចេញពីលើយន្តហោះ
យោងតាមច្បាប់អន្តរជាតិចែងថា អ្នកដំណើរលើយន្តហោះគួរតែអាចជម្លៀសចេញឲ្យបានពេញលេញនៅក្នុងរយៈពេល ៩០ វិនាទី ដោយប្រើពាក់កណ្តាលនៃច្រកចេញសង្គ្រោះបន្ទាន់។
ក្នុងករណីនេះមានច្រកចេញសង្គ្រោះបន្ទាន់ចំនួន៨ ប៉ុន្តែនៅខាងមុខមានតែពីរប៉ុណ្ណោះទេ និងមួយនៅខាងក្រោយខាងឆ្វេងមិនអាចប្រើប្រាស់បានដោយសារភ្លើងកំពុងតែឆាបឆេះ។
ក្រុមហ៊ុនអាកាសចរណ៍បាននិយាយថា ដោយសារតែប្រព័ន្ធ intercom លែងដំណើរការ បន្ទប់កាប៊ីនយន្តហោះមិនអាចផ្តល់ការអនុញ្ញាតសម្រាប់ច្រកចេញខាងក្រោយដើម្បីប្រើប្រាស់បានទេ។
ក្រុមនាវិកនៅខាងក្រោយចាត់ទុកថា វាជារឿងបន្ទាន់សម្រាប់អ្នកដំណើរក្នុងការចុះតាមទ្វារខាងក្រោយ ដូចដែលពួកគេធ្លាប់បានហ្វឹកហាត់។
- អ្នកចុងក្រោយ
អាកាសយាននិកបានប្រើម៉ៃក្រូហ្វូនដែលមានសំឡេងមិនសូវឮខ្លាំងនោះទេ ក្រុមនាវិកដែលមានកម្លាំងចំនួន ១២ នាក់បានដឹកនាំដំណើរការជម្លៀសមនុស្សទាំងអស់ ៣៦៧ នាក់ ចេញពីយន្តហោះដោយឲ្យពួកគេចុះពីលើយន្តហោះតាមច្រកទ្វាសង្គ្រោះបន្ទាន់នៅអមស្លាបទាំងសងខាង។
ដំណើរការនេះត្រូវចំណាយពេលចំនួន ១៨ នាទីដើម្បីជម្លៀសមនុស្សទាំងអស់ចេញពីលើយន្តហោះដោយអ្នកបើកយន្តហោះជាមនុស្សចុងក្រោយគេបង្អស់ដែលបានដើរលើចេញពីយន្តហោះនៅវេលាម៉ោង ៦:០៥ ល្ងាច។
- មានមនុស្សតែពីរនាក់ប៉ុណ្ណោះដែលរងរបួស
មួយសន្ទុះក្រោយមក អណ្តាតភ្លើងបានថមថយទៅវិញ ហើយរថយន្តពន្លត់អគ្គិភ័យរាប់សិបគ្រឿងកំពុងព្យាយាមពន្លត់ភ្លើង។ ដំណើរការនោះបានបញ្ចប់ទាំងស្រុងដោយចំណាយពេលអស់ប្រាំបីម៉ោងត្រឹម។
- វត្ថុដែលបន្សល់ទុកនៅលើយន្តហោះ
អ្នកជំនាញបាននិយាយថា មានរឿងដែគួរឲ្យកត់សម្គាល់ ដែលអ្នកដំណើរបានបន្សល់ទុកនូវរបស់របររបស់ពួកគេនៅលើយន្តហោះ រួមទាំងសត្វឆ្កែចិញ្ចឹមយ៉ាងតិចមួយក្បាល និងឆ្មាមួយក្បាលផងដែរ។
អ្នកជំនាញផ្នែកឧស្សាហកម្មអាកាសចរណ៍មកពីសាកលវិទ្យាល័យគ្រប់គ្រងសិង្ហបុរី Terence Fan បានប្រាប់ AFP ថា “អ្នកដំណើរត្រូវតែធ្វើតាមការណែនាំ” ។
“នេះគឺជានីតិវិធីក្នុងការជម្លៀសមនុស្សក្នុងគ្រាអាសន្នចេញពីលើយន្តហោះដែលត្រូវបានតាក់តែងឡើងសម្រាប់ក្រុមអាកាសយាននិកនេះមិនមែនមានន័យថានៅទីបំផុតវត្ថុដែលសេសល់នៅលើយន្តហោះទាំងនោះអាចសង្ឃឹមថារួចផុតពីភ្លើងឆេះនោះទេ “៕
ប្រភព៖ AFP/rc