ប្រែសម្រួល៖ ស.សម្បត្តិ
![](https://cambodiaflashnews.com/wp-content/uploads/2021/06/top-banner.gif)
យេរូសាឡឹម៖នៅថ្ងៃអង្គារ ទី ២ មករា លោក អីលូនលើវី អ្នកនាំពាក្យរដ្ឋាភិបាលអ៊ីស្រាអែលបាននិយាយ ថា អ៊ីស្រាអែលនឹងបង្ហាញខ្លួននៅចំពោះមុខតុលាការយុត្តិធម៌អន្តរជាតិ (ICJ) នៅទីក្រុងឡាអេ ដើម្បីប្រឆាំងនឹងការចោទប្រកាន់ពីបទប្រល័យពូជសាសន៍ប្រឆាំងនឹងមនុស្សជាតិរបស់ប្រទេសអាហ្រ្វិកខាងត្បូង ជុំវិញសំណុំរឿងសង្គ្រាមជាមួយក្រុមហាម៉ាសនៅក្នុងតំបន់ហ្គាហ្សា។
សូមរំលឹកថាកាលពីថ្ងៃសុក្រមុនប្រទេសអាហ្រ្វិកខាងត្បូងបានស្នើសុំ ICJ ធ្វើការកោះហៅរដ្ឋាភិបាលអ៊ីស្រាអែលជាបន្ទាន់មួយដោយចោទថាអ៊ីស្រាអែលបានរំលោភលើកាតព្វកិច្ចរបស់ខ្លួនដោយមិនគោរពតាមអនុសញ្ញាប្រល័យពូជសាសន៍ឆ្នាំ ១៩៤៨ ក្នុងការបង្ក្រាបរបស់ខ្លួនប្រឆាំងនឹងក្រុមហាម៉ាស។
លោក លើវី បាននិយាយថា៖ “យើងជឿជាក់ថាប្រវត្តិសាស្ត្រនឹងវិនិច្ឆ័យមេដឹកនាំអាហ្វ្រិកដោយគ្មានមេត្តា”។
តុលាការយុត្តិធម៌អន្តរជាតិICJ ដែលជួនកាលគេស្គាល់ថាជាតុលាការពិភពលោក គឺជាកន្លែងរបស់អង្គការសហប្រជាជាតិសម្រាប់ធ្វើការដោះស្រាយជម្លោះរវាងរដ្ឋនិងរដ្ឋនាៗ។ ក្រសួងការបរទេសអ៊ីស្រាអែលបាននិយាយថាការប្តឹងនេះគឺគ្មានមូលដ្ឋានច្បាប់ទេ។
សង្គ្រាមនេះកើតឡើងដោយការវាយប្រហារឆ្លងព្រំដែនដោយក្រុមសកម្មប្រយុទ្ធហាម៉ាសនៅថ្ងៃទី ៧ តុលា ដែលអ៊ីស្រាអែលនិយាយថាក្រុមហាម៉ាសបានសម្លាប់មនុស្ស ១ ២០០ នាក់។
មន្ត្រីសុខាភិបាលប៉ាឡេស្ទីនបាននិយាយថា អ៊ីស្រាអែលបានសងសឹកជាមួយនឹងការវាយលុកតាមផ្លូវអាកាស និងដី ដែលបានសម្លាប់មនុស្សស្លូតត្រង់អស់ជាង ២២,០០០ នាក់។ ខណៈពេលដែលតួលេខអ្នកស្លាប់របស់ខ្លួនមិនមានភាពខុសប្លែកគ្នារវាងអ្នកប្រយុទ្ធ និងជនស៊ីវិលនោះទេ ក្រសួងបាននិយាយថា ៧០ ភាគរយនៃអ្នកស្លាប់នៅហ្គាហ្សាគឺជាស្ត្រី និងអ្នកដែលមានអាយុក្រោម ១៨ ឆ្នាំ។ អ៊ីស្រាអែលជំទាស់នឹងតួលេខជនរងគ្រោះប៉ាឡេស្ទីន ហើយបាននិយាយថា ខ្លួនបានសម្លាប់យុទ្ធជនចំនួន ១,០០០ នាក់។
លើវី បានរាយបញ្ជីវិធានការតាមលំដាប់លំដោយដើម្បីបង្ហាញថាយោធារបស់អ៊ីស្រាអែលបានអនុវត្តយ៉ាងត្រឹមត្រូវដើម្បីកាត់បន្ថយគ្រោះថ្នាក់ដល់ជនដែលមិនជាប់ពាក់ព័ន្ធនឹងការប្រយុទ្ធ។
លោក លើវី បាននិយាយថា ក្រុម ហាម៉ាស មានទំនួលខុសត្រូវខាងសីលធម៌ពេញលេញសម្រាប់សង្រ្គាមដែលពួកគេជាអ្នកបង្កឡើង ហើយកំពុងធ្វើការពីខាងក្នុងរូងក្រោមដី និងក្រោមមន្ទីរពេទ្យ សាលារៀន វិហារអ៊ីស្លាម ផ្ទះសម្បែង និងបរិក្ខាររបស់ UNជាដើម។
លោកបានបន្ថែមដោយមិនបានបញ្ជាក់លម្អិតថា អាហ្រ្វិកខាងត្បូងមានជម្លោះក្នុងឧក្រិដ្ឋកម្មរបស់ក្រុមហាម៉ាសប្រឆាំងនឹងអ៊ីស្រាអែល។
ក្រុម ហា ម៉ាស បដិសេធការប្រើប្រជាជននៅហ្គាហ្សាជាខែលការពារមនុស្ស៕
ប្រភព៖ Reuters/ec