ប្រែសម្រួល៖ ស.សម្បត្តិ
![](https://cambodiaflashnews.com/wp-content/uploads/2021/06/top-banner.gif)
ហាណូយ៖ នៅថ្ងៃពុធ ទី០៣ មករា ឆ្នាំ២០២៤នេះ អតីតរដ្ឋមន្ត្រីសុខាភិបាលវៀតណាម និងជនដែលជាប់ពាក់ព័ន្ធចំនួន ៣៧នាក់ផ្សេងទៀត ត្រូវបានកាត់ទោសនៅទីក្រុងហាណូយ ពីបទរំលោភតួនាទីនិងកេងប្រវ័ញ្ញប្រាក់ក្នុងការលក់ឧបករណ៍ធ្វើតេស្ត COVID-19 លើសពីតម្លៃដើម។
ក្រុមហ៊ុនពាក់កណ្តាលឯកជន វៀត អា ដែលផលិតឧបករណ៍ធ្វើតេស្ត COVID-19ក៏មានជាប់ពាក់ព័ន្ធក្នុងរឿងអាស្រូវនេះផងដែរហើយត្រូវបាននាំខ្លួនឲ្យចូលទៅបំភ្លឺក្នុងតុលាការពីរឿងអាស្រូវនេះដោយបានធ្វើសក្ខីកម្មបញ្ជាក់លើការចោទប្រកាន់របស់តុលាការថាបានឃើញមន្ត្រីជាន់ខ្ពស់ក្រសួងសុខាភិបាលវៀតណាមធ្វើសកម្មភាពសម្របសម្រួលក្នុងការចុះកិច្ចព្រមព្រៀងលក់ឧបករណ៍ធ្វើតេស្ត COVID-19 ក្នុងតម្លៃរាប់លានដុល្លារដើម្បីផ្គត់ផ្គង់ដល់មន្ទីរពេទ្យ និងសហគមន៍មូលដ្ឋានក្នុងតម្លៃដ៏ច្រើនសន្ធឹកសន្ធាប់។
![](https://cambodiaflashnews.com/wp-content/uploads/2024/01/011-300x170.png)
នៅក្នុងរូបភាពដែលបង្ហោះលើប្រព័ន្ធផ្សព្វផ្សាយរដ្ឋបានបង្ហាញពីជនជាប់ចោទសុទ្ធតែមានពាក់ម៉ាស់ទាំងអស់ត្រូវបានអមដំណើរដោយក្រុមប៉ូលិសដែលមានឯកសណ្ឋានត្រឹមត្រូវទៅកាន់អគារតុលាការក្នុងទីក្រុងហាណូយ។
ក្នុងចំណោមពួកគេ មានអតីតរដ្ឋមន្ត្រីក្រសួងសុខាភិបាល លោក ង្វៀន ថាញ់ឡុង ដែលត្រូវបានចោទប្រកាន់ពីបទទទួលប្រាក់សំណូកចំនួន ២.២៥ លានដុល្លារអាមេរិក និងអតីតអភិបាលក្រុងហាណូយ លោក ជុ ង៉ុកអាញ់ ដែលត្រូវបានចោទប្រកាន់ពីបទ “រំលោភលើបទប្បញ្ញត្តិស្តីពីការគ្រប់គ្រងទ្រព្យសម្បត្តិរដ្ឋ”។
យ៉ាងហោចណាស់មានមន្ត្រីតូចតាច និងអ្នកជំនួញចំនួន ១០០នាក់ ត្រូវបានចាប់ខ្លួននៅទូទាំងប្រទេស ដែលមានជាប់ពាក់ព័ន្ធនឹងរឿងអាស្រូវពុករលួយទាំងនេះ។
អំពើពុករលួយទទួលសំណូកសូកព៉ាន់នេះត្រូវបានគេប៉ាន់ស្មានថាមានទឹកប្រាក់ចំនួន ១៧២ លានដុល្លារនិងសម្រាប់ក្រុមហ៊ុន វៀត អា មានចំនួន៣៤ លានដុល្លារអាមេរិក ដែលក្នុងនោះត្រូវបានតុលាការធ្វើការចោទថាបានលួចប្រាក់ត្រឡប់ទៅវិញតាមរយ:ការសូកប៉ាន់
មន្ត្រី។
យោងតាមប្រព័ន្ធផ្សព្វផ្សាយរដ្ឋក្រុមហ៊ុន វៀត អា បានធ្វើការបំភ្លឺថា ក្រុមហ៊ុនបានផលិតឧបករណ៍ធ្វើតេស្តចំនួន ៨.៧ លាននៅក្នុងអំឡុងពេលជំងឺរាតត្បាត ដោយភាគច្រើនត្រូវបានបញ្ជូនទៅកាន់មន្ទីរពេទ្យពេទ្យនៅទូទាំងប្រទេស។
ខាងតុលាការយោធាក្នុងទីក្រុងហាណូយកាលពីសប្តាហ៍មុន បាននាំខ្លួននាយកប្រតិបត្តិក្រុមហ៊ុន ផាន គក់ វៀត មកកាត់ទោសដាក់ពន្ធនាគារ ២៥ ឆ្នាំពីបទរំលោភទំនុកចិត្ត និងរំលោភលើបទប្បញ្ញត្តិដេញថ្លៃរបស់រដ្ឋ។
គាត់ត្រូវប្រឈមនឹងការចោទប្រកាន់បន្ថែមទៀតនៅក្នុងការកាត់ក្តីរយៈពេលបីសប្តាហ៍ដែលត្រូវបានចាប់ផ្តើមនៅក្នុងថ្ងៃពុធនេះ។
ប្រទេសវៀតណាមមានភាពល្បីល្បាញនៅទូទាំងពិភពលោកចំពោះការចាត់វិធានការដ៏មានប្រសិទ្ធភាពរបស់ខ្លួនក្នុងការទប់ស្កាត់ជំងឺរាតត្បាតដំបូងគេ។
ប៉ុន្តែមន្ត្រីវៀតណាមត្រូវបានគេរកឃើញថាមានលុយដាក់ហោប៉ៅយ៉ាងច្រើនសន្ធឹកសន្ធាប់ដោយសារការទទួលសំណូកពីក្រុមហ៊ុនរៀបចំជើងហោះហើរធ្វើមាតុភូមិនិវត្តន៍ និងការធ្វើតេស្តសហគមន៍។
កាលពីឆ្នាំមុន មន្ត្រីបីនាក់ត្រូវបានកាត់ទោសឲ្យជាប់គុកអស់មួយជីវិត ខណៈរាប់សិបនាក់ផ្សេងទៀតត្រូវបានកាត់ទោសឲ្យជាប់ពន្ធនាគាររយៈពេលយូរពីបទស៊ីសំណូក និងប្រព្រឹត្តអំពើពុករលួយជុំវិញជើងហោះហើរធ្វើមាតុភូមិនិវត្តន៍។
![](https://cambodiaflashnews.com/wp-content/uploads/2024/01/022-300x169.png)
នៅក្នុងឆ្នាំ ២០២២ សភាជាតិរបស់វៀតណាមបានដកលោក ផាំ ប៊ិញ មិញ និង វូ ឌុក ដាំ ចេញពីតំណែងជាឧបនាយករដ្ឋមន្ត្រី។
លោក មិញ គឺជារដ្ឋមន្ត្រីក្រសួងការបរទេស ដែលបានដឹកនាំការរៀបចំជើងហោះហើរ ដើម្បីនាំជនជាតិវៀតណាមពីក្រៅប្រទេសមកប្រទេសកំណើត ខណៈដែលលោក ដាំ ជាអ្នកទទួលបន្ទុកដោះស្រាយការឆ្លើយតបនឹងជំងឺកូវីដ-១៩ នៅតាមព្រំដែនវៀតណាម។
សេចក្តីថ្លែងការណ៍របស់គណៈកម្មាធិការមជ្ឈិមបក្សបាននិយាយនៅពេលនោះថា ការបោសសម្អាត មន្ត្រីពុករលួយដែលដឹកនាំដោយអគ្គលេខាបក្សកុម្មុយនិស្តវៀតណាមលោក ង្វៀន ភូទ្រុង ក៏បានសម្រេចទម្លាក់លោកប្រធានាធិបតី ង្វៀន ស្ស៊ុនភុក ដែល “ទទួលបន្ទុកផ្នែកនយោបាយ” ចំពោះភាពកំសោយរបស់លោកនៅក្នុងការគ្រប់គ្រងមន្ត្រីនៅក្រោមបង្គាប់នោះ៕
ប្រភព៖ AFP