ប្រែសម្រួល៖ ស.សម្បត្តិ
បន្ទាប់ពីមានការវាយប្រហារដែលមិនធ្លាប់មានពីមុនមកដោយកងទ័ពអ៊ុយក្រែនកាលពីចុងសប្តាហ៍លើទីក្រុង Belgorod របស់ប្រទេសរុស្ស៊ី។ នៅថ្ងៃចន្ទ ទី០១ មករានេះ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានព្រមានថាក្រុងមូស្គូនឹងបង្កើនការវាយប្រហារលើគោលដៅយោធាអ៊ុយក្រែទ្វេដង។
ការវាយប្រហារដោយកងទ័ពអ៊ុយក្រែនកាលពីថ្ងៃសៅរ៍នេះបានសម្លាប់មនុស្សចំនួន ២៤ នាក់ និងបានធ្វើឲ្យមនុស្សជាង ១០០ នាក់រងរបួសនៅក្នុងទីក្រុង Belgorod ។ ដើម្បីសងសឹកទៅនឹងការវាយប្រហារដោយកងទ័ពអ៊ុយក្រែនកាលពីថ្ងៃសៅរ៍ ក្រុងមូស្គូបន្ទាប់មកក៏បានបើកការវាយប្រហារជាទ្រង់ទ្រាយធំទៅលើទីក្រុងនានារបស់អ៊ុយក្រែន។
កាលពីថ្ងៃចន្ទនៅក្នុងអំឡុងពេលដែលលោកពូទីន ធ្វើដំណើរទៅកាន់មន្ទីរពេទ្យយោធា គាត់បានថ្លែង ថា “យើងនឹងបង្កើនការវាយប្រហារឲ្យកាន់តែខ្លាំងជាងមុនទ្វេដង យើងមិននៅស្ងៀមឈរមើលឧក្រិដ្ឋកម្មប្រឆាំងនឹងជនស៊ីវិលនោះទេហើយនេះជាការពិត” ។
លោកបានសង្កត់ធ្ងន់ថា រុស្ស៊ីនឹងបង្កើនការវាយប្រហារកាន់តែខ្លាំងចំពោះអ្វីដែលលោកហៅថា “ការដំឡើងសាច់ដុំផ្នែកយោធា”។
លោក ពូទីន បានប្រកាសថាជិតពីរឆ្នាំហើយការវាយលុកដោយកងយោធារបស់ទីក្រុងមូស្គូនៅលើទឹកដីអ៊ុយក្រែននៅតែបន្តហើយ “យើងកំពុងបន្តបង្កើនការវាយប្រហាររនៅថ្ងៃនេះ និងថ្ងៃស្អែក យើងនឹងបន្តវាយប្រហារឲ្យកាន់តែខ្លាំងក្លាជាងមុន” ។
ក្រុង Kyiv បានបញ្ជាក់ថារុស្ស៊ីបានបើកការវាយប្រហារលើគោលដៅយោធារបស់ខ្លួនដោយប្រើយន្តហោះគ្មានមនុស្សបើកមួយចំនួនកាលពីថ្ងៃឆ្លងឆ្នាំ។
លោកពូទីនបាននិយាយទៅកាន់កងទ័ពរបស់គាត់ដែលរងរបួសដោយបានអង្គុយក្បែរពួកគេក្នុងឯកសណ្ឋានពេទ្យថា “អ្វីដែលបានកើតឡើងនៅទីក្រុង Belgorod គឺជាអំពើភេរវកម្ម” ។”ខ្ញុំនឹកមិនឃើញរកពាក្យអ្វីផ្សេងពីនេះហៅនោះទេ” ។
លោកបានចោទប្រកាន់កងកម្លាំងអ៊ុយក្រែនថាបានកំណត់គោលដៅសម្រាប់បើកការវាយប្រហារគឺ “នៅចំកណ្តាលទីក្រុងដែលជាកន្លែងមនុស្សម្នាកំពុងធ្វើដំណើរនៅមុនថ្ងៃចូលឆ្នាំសកល” លោក ពូទិន បានចោទប្រកាន់កងកម្លាំងអ៊ុយក្រែនថាពួកគេមានចេតនាវាយប្រហារលើជនស៊ីវិលរុស្សី។
មេដឹកនាំរុស្ស៊ីបាននិយាយថា “គំនិតផ្តួចផ្តើមជាយុទ្ធសាស្ត្រ” នៅក្នុងការដោះស្រាយជម្លោះដែលត្រូវបានដាក់ចេញសម្រាប់ធ្វើការចរចាជាមួយអ៊ុយក្រែនគឺអាស្រ័យទៅលើគោលជំហររបស់រុស្ស៊ី។
លោកបានបញ្ជាក់ថា៖ “ទោះជានៅក្នុងហេតុផលណាក៏ដោយខ្ញុំត្រូវការឲ្យអ៊ុយក្រែនធ្វើការបំភ្លឺឲ្យបានច្បាស់លាស់អំពីការវាយប្រហារដែលមិនធ្លាប់មានពីមុនមកលើជនស៊ីវិលរុស្សី។
យោងតាមទីភ្នាក់ងារសារព័ត៌មានរដ្ឋ TASS របស់រុស្ស៊ីបានឲ្យដឹងថា លោក ពូទីនបានប្រកាសអំពីគោលជំហររបស់ខ្លួនថា “រុស្សីចង់បញ្ចប់ជម្លោះដែលបានអូសបន្លាយពេលអស់ជិតពីរឆ្នាំមកនេះ ឲ្យបានលឿនតាមដែលអាចធ្វើទៅបាន” ក៏ប៉ុន្តែ “ត្រូវយោងទៅតាមលក្ខខណ្ឌរបស់រុស្សីទាំងអស់” ។
លោកបានចោទប្រកាន់ជាថ្មីម្តងទៀតថាអ៊ុយក្រែនកំពុងត្រូវបានលោកខាងលិចខ្ចីដៃប្រើប្រាស់ដើម្បី “ដោះស្រាយជម្លោះរបស់ខ្លួន” ជាមួយរុស្ស៊ី៕
ប្រភព៖ AFP/rc