ប្រែសម្រួល៖ រតនា
![](https://cambodiaflashnews.com/wp-content/uploads/2021/06/top-banner.gif)
តៃប៉ិ៖សាររបស់លោក សុង តាវ ប្រធានការិយាល័យកិច្ចការតៃវ៉ាន់របស់ចិន ដែលធ្វើការអំពាវនាវជាងពីរសប្តាហ៍នៅមុនពេលតៃវ៉ាន់រៀបចំការបោះឆ្នោតប្រធានាធិបតី និងសភានៅថ្ងៃទី ១៣ ខែមករា នៅក្រោយពេលដែលមានការកត់សម្គាល់របស់លោកប្រធានាធិបតី ស៊ី ជិនពិង នៅក្នុងសុន្ទរកថាឆ្នាំថ្មីរបស់គាត់ថា “ការបង្រួបបង្រួម” របស់ចិនជាមួយតៃវ៉ាន់គឺជៀសមិនរួច។
នៅថ្ងៃអង្គារ ទី២ មករា លោក សុង តាវ ប្រធានការិយាល័យកិច្ចការតៃវ៉ាន់របស់ចិន បានអំពាវនាវ
ឲ្យប្រជាជនតៃវ៉ាន់គាំទ្រដំណើរការនៃ “ការបង្រួបបង្រួមដោយសន្តិវិធី” ដោយថ្លែងថា នេះគឺជាបំណងប្រាថ្នាទូទៅរបស់ប្រជាជននៃភាគីទាំងពីរនៅលើច្រកសមុទ្រតៃវ៉ាន់។
លោក សុង បាននិយាយនៅក្នុងសារឆ្នាំថ្មីរបស់គាត់នៅលើគេហទំព័រការិយាល័យរបស់គាត់ថា “មាតុភូមិនឹងត្រូវបានបង្រួបបង្រួមហើយនៅទីបញ្ចប់នឹងត្រូវបានបង្រួបបង្រួមដោយជៀសមិនរួច” ។
នេះជាបំណងប្រាថ្នារួមរបស់ប្រជាជនទាំងសងខាងនៅលើច្រកសមុទ្រតៃវ៉ាន់។
លោកបានសង្កត់ធ្ងន់ថា ប្រជាជនតៃវ៉ាន់គួរតែ “លើកកម្ពស់ទំនាក់ទំនងទៅវិញទៅមកក្នុងគោលបំណងងាកទៅរកផ្លូវត្រូវដើម្បីការអភិវឌ្ឍដោយសន្តិភាពនិងជំរុញដំណើរការបង្រួបបង្រួមជាតិមាតុភូមិដោយសន្តិវិធី”។
រដ្ឋាភិបាលតៃវ៉ាន់ ច្រានចោលការទាមទារនូវអធិបតេយ្យភាពរបស់ចិន។ ទាំងគណបក្សវឌ្ឍនភាពប្រជាធិបតេយ្យដែលកំពុងកាន់អំណាច និងគណបក្សប្រឆាំងដ៏ធំបំផុត គឺបក្សគួមីនតាង និយាយថា មានតែប្រជាជនតៃវ៉ាន់ប៉ុណ្ណោះដែលអាចសម្រេចអនាគតរបស់ពួកគេបាន។
ប្រទេសចិនបានផ្តល់ឲ្យតៃវ៉ាន់នូវគំរូស្វ័យភាព “ប្រទេសមួយ ប្រព័ន្ធពីរ” ប៉ុន្តែគ្មានភាគីតៃវ៉ាន់ណាមួយគាំទ្រគំនិតនោះទេ។
លោក សុង បានរំលឹកឡើងវិញនូវការគាំទ្ររបស់ប្រទេសចិនចំពោះ “ប្រទេសមួយ ប្រព័ន្ធពីរ” និងការប្រឆាំងនឹងឯករាជ្យភាពផ្លូវការរបស់តៃវ៉ាន់ ឬ “ការជ្រៀតជ្រែកដោយកងកម្លាំងខាងក្រៅ” ។
សាររបស់លោកមិនបាននិយាយអំពីការបោះឆ្នោតដែលការិយាល័យកិច្ចការតៃវ៉ាន់របស់ចិនបានចាត់ទុកជាជម្រើសរវាងសង្គ្រាមនិងសន្តិភាព។
ប្រទេសចិនបានបន្តដាក់សម្ពាធយោធានៅជុំវិញកោះនេះ បានបញ្ចប់ការកាត់បន្ថយពន្ធមួយចំនួនសម្រាប់តៃវ៉ាន់ និងបានគំរាមកំហែងចាត់វិធានការសេដ្ឋកិច្ចបន្ថែមទៀត នៅពេលដែលការបោះឆ្នោតបានខិតកាន់តែជិតមកដល់៕
ប្រភព៖ Reuters/fh