ប្រែសម្រួល៖ ស.សម្បត្តិ
ប្រភពយោធាស៊ីរីបានឲ្យដឹងថាកាលពីថ្ងៃព្រហស្បតិ៍ ទី ២៨ ធ្នូ អ៊ីស្រាអែលបានធ្វើការវាយប្រហារយ៉ាងសន្ធាប់តាមអាកាសលើគោលដៅមូលដ្ឋានការពារដែនអាកាសស៊ីរីសំខាន់ៗនៅភាគខាងត្បូងប្រទេស នេះជាយុទ្ធនាការទម្លាក់គ្រាប់បែកក្នុងទ្រង់ទ្រាយដ៏ធំចុងក្រោយបង្អស់គិតចាប់តាំងពីកា
រផ្ទុះសង្រ្គាមនៅតំបន់ហ្គាហ្សាកាលពីថ្ងៃទី ៧ ខែតុលាកន្លងមក។
ប្រភពយោធាស៊ីរីបាននិយាយលើប្រព័ន្ធផ្សព្វផ្សាយរដ្ឋថានៅមុននេះមានការវាយប្រហារដោយកាំជ្រួចចេញពីទិសដៅក្នុងតំបន់ Golan Heights ដែលគ្រប់គ្រងដោយកងយោធាអ៊ីស្រាអែលដោយបានកំណត់គោលដៅលើទីតាំងជាច្រើនដែលខ្លួននៅមិនទាន់បានកំណត់អត្តសញ្ញាណបានទាំងស្រុងនៅឡើយ។
ប្រភពយោធាស៊ីរីបានបន្ថែមថា ” ប្រព័ន្ធការពារដែនអាកាសរបស់ស៊ីរីបានប្រឈមមុខនឹងការវាយប្រហារដោយកាំជ្រួចរបស់អ៊ីស្រាអែល ហើយស៊ីរីបានបាញ់ទម្លាក់បានខ្លះដោយមានការខាតបង់ត្រឹមតែសម្ភារមួយចំនួនតែប៉ុណ្ណោះ”។
ក្រោយមក ប្រភពពីកងទ័ពស៊ីរី ត្រូវបានដកស្រង់ចេញពីប្រព័ន្ធផ្សព្វផ្សាយរដ្ឋ ដោយនិយាយថា អ៊ីស្រាអែលបានធ្វើការវាយប្រហារមួយលើកទៀត បន្ទាប់ពីពាក់កណ្តាលអធ្រាត្រ នៅជិតរដ្ឋធានី ប៉ុន្តែកងទ័ពស៊ីរីមិនបានផ្តល់ព័ត៌មានលម្អិតនោះទេ។
មិនមានការធ្វើអត្ថាធិប្បាយភ្លាមៗពីកងយោធាអ៊ីស្រាអែលនោះទេ។ ចំណែករ៉យទ័រក៏នៅមិនទាន់អាចធ្វើការផ្ទៀងផ្ទាត់របាយការណ៍នេះពីប្រភពឯករាជ្យណាមួយបាននៅឡើយដែរ។ ចាប់តាំងពីមានការវាយប្រហារនៅថ្ងៃទី ៧ ខែតុលា ដោយក្រុមហាម៉ាសលើជនស៊ីវិល និងទាហានអ៊ីស្រាអែល កងយោធាអ៊ីស្រាអែលក៏បានបង្កើនការវាយលុករបស់ខ្លួនទៅលើគោលដៅកងជីវពលហាម៉ាសដែលគាំទ្រដោយអ៊ីរ៉ង់នៅក្នុងប្រទេសស៊ីរី ថែមទាំងបានវាយកំទេចប្រព័ន្ធការពារដែនអាកាសរបស់កងទ័ពស៊ីរី និងកងកម្លាំងស៊ីរីមួយចំនួនផងដែរ។
យោងតាមប្រភពចារកម្មយោធាស៊ីរី និងមន្ត្រីសន្តិសុខនៅក្នុងតំបន់ដែលដឹងអំពីបញ្ហានេះបានបញ្ជាក់ថា ការវាយប្រហារត្រូវបានគេជឿថាបានកំណត់គោលដៅលើមូលដ្ឋានការពារដែនអាកាសរបស់កងទ័ពស៊ីរី និងស្ថានីយរ៉ាដានៅក្នុងតំបន់ Tel al-Sahn ក្នុងខេត្ត Sweida ភាគនិរតីនៃប្រទេសស៊ីរី។
កាលពីខែមុន ប្រព័ន្ធការពារប្រឆាំងយន្តហោះមួយផ្សេងទៀតនៅក្នុងទីក្រុង Tel Qulaib និង Tel Maseeh នៅភាគខាងត្បូងប្រទេសស៊ីរី ត្រូវបានវាយប្រហារដែលប្រភពស៊ើបការណ៍សម្ងាត់ជាន់ខ្ពស់របស់ស៊ីរីបាននិយាយថា គឺជាយុទ្ធនាការដ៏ខ្លាំងក្លាមួយរបស់កងយោធាអ៊ីស្រាអែល ដើម្បីរំខានដល់ប្រព័ន្ធការពារដែនអាកាសស៊ីរី ដែលអ៊ីរ៉ង់បានជួយដាក់ពង្រាយបន្ថែម។
ប្រភពយោធាស៊ីរី ក្នុងតំបន់មួយផ្សេងទៀតដែលបានស្នើសុំមិនបញ្ចេញឈ្មោះដោយសារតែភាពរសើបនៃបញ្ហានេះបាននិយាយថា “ទីក្រុងតេអេរ៉ង់កំពុងបង្កើនកិច្ចខិតខំប្រឹងប្រែងរបស់ខ្លួនក្នុងការផ្តល់ឲ្យស៊ីរីនូវប្រព័ន្ធការពារដែនអាកាសដែលអាចបន្សាបប្រសិទ្ធភាពវាយប្រហាររបស់អ៊ីស្រាអែល” ។
លោកបានបន្ថែមថា៖ “រឿងទាំងនេះគឺទាក់ទងនឹងសង្រ្គាមនៅតំបន់ហ្កាហ្សាដែលជាព្រឹត្តិការណ៍មួយបង្កឲ្យមានការរាលដាលនូវជម្លោះក្នុងតំបន់។
អ៊ីស្រាអែលបានធ្វើការវាយប្រហារជាច្រើនឆ្នាំមកលើអ្វីដែលខ្លួនបានពិពណ៌នាថាជាគោលដៅទាក់ទងនិងអ៊ីរ៉ង់ក្នុងប្រទេសស៊ីរី ដែលឥទ្ធិពលរបស់ទីក្រុងតេអេរ៉ង់បានកើនឡើងចាប់តាំងពីបានចាប់ផ្តើមលូកដៃគាំទ្រប្រធានាធិបតី Bashar al-Assad ដោយផ្ទាល់នៅក្នុងសង្គ្រាមស៊ីវិលដែលបានចាប់ផ្តើមនៅក្នុងឆ្នាំ ២០១១កន្លងមក ។
អ្នកជំនាញយោធាអ៊ីស្រាអែលបាននិយាយថា ការវាយប្រហារនេះគឺជាផ្នែកមួយនៃការកើនឡើងនូវជម្លោះក្នុងកម្រិតទាបទៅលើគោលដៅកាន់កាប់ដោយអ៊ីរ៉ង់ដើម្បីពន្យឺតការពង្រឹងតំបន់កាន់កាប់របស់អ៊ីរ៉ង់នៅក្នុងប្រទេសស៊ីរី។
ក្រុមយុទ្ធជនសម្ព័ន្ធមិត្តជាមួយនឹងអ៊ីរ៉ង់ រួមទាំងក្រុមហេសបូឡា ពេលនេះបានវាយប្រហារនៅតាមតំបន់ធំៗភាគខាងកើត ភាគខាងត្បូង និងភាគពាយ័ព្យនៃប្រទេសស៊ីរី និងនៅតាមតំបន់ជាយក្រុងជាច្រើនជុំវិញរដ្ឋធានីដាម៉ាកុស៕
ប្រភព៖ Reuters/ga