ប្រែសម្រួល៖សហការី
អ៊ុយក្រែន៖ កាលពីថ្ងៃអង្គារ ទី២៦ ធ្នូ រដ្ឋមន្ត្រីក្រសួងមហាផ្ទៃអ៊ុយក្រែន លោក Ihor Klymenko បានអះអាងថាកងកម្លាំងរុស្ស៊ីបានធ្វើការវាយប្រហារលើស្ថានីយរថភ្លើងនៅភាគខាងត្បូងនៃទីក្រុង Kherson បានបំផ្លាញរថភ្លើងមួយខ្សែនិងបានសម្លាប់ប៉ូលិសម្នាក់និងរងរបួសពីរនាក់ក្នុងខណ:ដែលពួកគេកំពុងប្រតិបត្តិការក្នុងការជម្លៀសអ្នកស្រុកចេញពីតំបន់ដែលរងការវាយប្រហារ។
រដ្ឋមន្ត្រីក្រសួងមហាផ្ទៃអ៊ុយក្រែន លោក Klymenko បានថ្លែងថា ជនស៊ីវិលជាង ១៤០ នាក់បានកំពុងជាប់នៅក្នុងស្ថានីយរថភ្លើង ហើយភ្លាមៗនោះប៉ូលិសក៏បានដឹកនាំការជម្លៀសអ្នកស្រុកចេញពីតំបន់ដែលរងការវាយប្រហារ។
លោក Klymenko បានបង្ហោះសារនៅលើ Telegram ថា “អរគុណចំពោះសកម្មភាពប្រកបដោយការលះបង់របស់មន្ត្រីប៉ូលិសអ្នកស្រុកត្រូវបានជម្លៀសទៅកាន់កន្លែងសុវត្ថិភាព” ដោយជោគជ័យតែជាអកុសលបណ្តាលឲ្យលោកអនុសេនីយ៍ឯកដែលជាមន្ត្រីប៉ូលិសមកពីតំបន់ Kirovohrad ត្រូវបានសម្លាប់ដោយសារតែការបាញ់ស្រោចគ្រាប់ផ្លោងរបស់កងកម្លាំងរុស្ស៊ីនិងបណ្តាលឲ្យរបួសមន្ត្រីប៉ូលិសពីរនាក់ថែមទៀតដែលឥឡូវនេះកំពុងនៅក្នុងមន្ទីរពេទ្យដើម្បីព្យាបាលរបួស”។
ស្ថានីយរថភ្លើងនិងរថភ្លើងមួយខ្សែត្រូវបានរងការខូចខាតលោក Klymenko បានបន្ថែមថា “ស្ថានការណ៍ត្រូវបានគ្រប់គ្រងបានយ៉ាងល្អចំណែកស្ថានីយរថភ្លើងនិងរថភ្លើងក៏បានត្រៀមបន្តដំណើរការឡើងវិញផងដែ “។ជនស៊ីវិលពីរនាក់ក៏ត្រូវបានរងរបួសហើយកំពុងព្យាបាលនៅក្នុងមន្ទីរពេទ្យ។
ប្រធានាធិបតីអ៊ុយក្រែន លោក Volodymyr Zelenskyy ដំបូងឡើយបានរាយការណ៍ពីការវាយប្រហារនេះថាចំនួនអ្នកស្លាប់និងអ្នរងរបួសកំពុងត្រូវបានកំណត់អត្តសញ្ញាណ។
ទីក្រុង Kherson ត្រូវបានទាហានរុស្ស៊ីវាយកាន់កាប់ភ្លាមៗបន្ទាប់ពីក្រុងម៉ូស្គូចូលឈ្លានពានអ៊ុយក្រែននៅចុងខែកុម្ភៈ ឆ្នាំ២០២២។
ក្រោយមកកងទ័ពអ៊ុយក្រែនក៏បានវាយដណ្តើមយកមកកាន់កាប់វិញធ្វើឲ្យកងកម្លាំងរុស្ស៊ីបានដកថយទៅផ្នែកម្ខាងនៃទន្លេ Dnipro ដែលលាតសន្ធឹងឆ្លងកាត់ទីក្រុង Kherson ។
ទីក្រុងនេះកំពុងរងនូវការទម្លាក់គ្រាប់បែកនិងការបាញ់ផ្លោងស្រោចដូចទឹកភ្លៀងរបស់កងទ័ពរុស្ស៊ីតាមអាកាសនិងតាមថ្មើរជើងជាប្រចាំចាប់តាំងពីពេលនោះមក។ កាលពីព្រឹកថ្ងៃអង្គារ ប្រមុខយោធា ឈរជើងនៅតំបន់Kherson លោក Roman Mrochko បានឲ្យដឹងថា ទីក្រុងនេះបានស្ថិតនៅក្រោមការវាយប្រហាររបស់កងទ័ពរុស្ស៊ីក្នុងរយៈពេល ២៤ ម៉ោងកន្លងមកបណ្តាលឲ្យមន្ត្រីប៉ូលិសម្នាក់ស្លាប់និងពីរនាក់ទៀតរងរបួសនិងមានជនស៊ីវិលចំនួន ២ នាក់បានរងរបួសដែលក្នុងនោះមានម្នាក់របួសធ្ងន់រួមជាមួយនិងស្ថានីយរថភ្លើងនិងរថភ្លើងមួយខ្សែរងការបំផ្លិចបំផ្លាញដោយសារតែគ្រាប់ផ្លោងរបស់រុស្សី៕
ប្រភព៖ Agency/fs