ប្រែសម្រួល៖ សហការី
បាងកក៖ នៅថ្ងៃចន្ទ ទី២៥ ខែធ្នូ គណបក្សចលនាឆ្ពោះទៅមុខរបស់ប្រទេសថៃ ដែលបានឈ្នះការបោះឆ្នោតនៅឆ្នាំនេះ ប៉ុន្តែមិនបានដឹកនាំរដ្ឋាភិបាលបាននិយាយថាខ្លួនមានទំនុកចិត្តលើសំណុំរឿងរបស់តុលាការដែលស៊ើបអង្កេតលើយុទ្ធនាការរបស់ខ្លួនដែលបានសន្យាធ្វើកំណែទម្រង់ច្បាប់ប្រមាថព្រះមហាក្សត្រ។
គណបក្សចលនាឆ្ពោះទៅមុខបានឈ្នះអាសនៈភាគច្រើននៅក្នុងការស្ទង់មតិកាលពីខែឧសភា ប៉ុន្តែមេដឹកនាំនៅពេលនោះលោក ពីតា លឹមចារុងរ៉ាត ត្រូវបានរារាំងមិនឲ្យក្លាយជានាយករដ្ឋមន្ត្រីដោយក្រុមអភិរក្សនិយមនៅក្នុងព្រឹទ្ធសភា។
ការសន្យាបស់គណបក្សក្នុងការធ្វើកំណែទម្រង់ច្បាប់ស្តីពីការប្រមាថព្រះមហាក្សត្រដ៏តឹងតែងរបស់ប្រទេសថៃបានធ្វើឲ្យមានការរំជើបរំជួលដល់សមាជិកព្រឹទ្ធសភាដែលគាំទ្រយោធាភាគច្រើនជារាជានិយម សមាជិកព្រឹទ្ធសភាទាំងនោះត្រូវបានតែងតាំងដោយរបបយោធា។
តុលាការធម្មនុញ្ញកំពុងពិចារណាលើញត្តិដែលលើកហេតុផលថា ការសន្យារបស់គណបក្សចលនាឆ្ពោះទៅមុខក្នុងការកែទម្រង់ច្បាប់ប្រមាថព្រះមហាក្សត្រ ស្មើនឹងការប៉ុនប៉ងផ្តួលរំលំរបបរាជានិយមអាស្រ័យរដ្ឋធម្មនុញ្ញ។
អតីតមេដឹកនាំគណបក្ស ចលនាឆ្ពោះទៅមុខលោក ពីតា ដែលបានដឹកនាំគណបក្សនៅក្នុងការបោះឆ្នោត ប៉ុន្តែបានលាលែងពីតំណែង បានផ្តល់ភស្តុតាងនៅក្នុងសវនាការកាលពីថ្ងៃចន្ទ ហើយបាននិយាយថាមាន “ដំណើរការល្អ”។
លោក ពីតា បាននិយាយថា “ប្រសិនបើអ្នកក្រឡេកមើលអនុភាពនៃច្បាប់និងការចោទប្រកាន់ក្នុងស្ថានភាពដ៏អាក្រក់បំផុតនោះគឺ តុលាការធម្មនុញ្ញនឹងស្នើសុំឲ្យយើងបញ្ឈប់ដំណើរការយុទ្ធនាការលើការធ្វើវិសោធនកម្មរដ្ឋធម្មនុញ្ញ” លោក ពីតា បាននិយាយដោយច្រានចោលការលើកឡើងថា គណបក្សរបស់លោកកំពុងប្រឈមនឹងហានិភ័យរំលាយចោល។
តុលាការបាននិយាយថា ខ្លួននឹងប្រកាសសាលក្រមក្នុងសំណុំរឿងនេះនៅថ្ងៃទី ៣១ ខែមករា។
គណបក្សចលនាឆ្ពោះទៅមុខទទួលបានការគាំទ្រពីប្រជាជនថៃវ័យក្មេង និងអ្នករស់នៅតាមទីក្រុងដែលធុញទ្រាន់នឹងការគ្រប់គ្រងរបស់របបយោធាជិតមួយទសវត្សរ៍ហើយក៏ទទួលបានជ័យជំនះក្នុងការបោះឆ្នោតដ៏គួរឲ្យភ្ញាក់ផ្អើលនៅក្នុងខែឧសភា។
ប៉ុន្តែលោក ពីតា លឹមចារុងរ៉ាត ត្រូវបានរារាំងមិនឲ្យឈរឈ្មោះសម្រាប់តំណែងនាយករដ្ឋមន្ត្រី ហើយគណបក្ស ចលនាឆ្ពោះទៅមុខ ត្រូវបានរារាំងមិនអោយបង្កើតរដ្ឋាភិបាល ខណៈដែលគណបក្សភឿថៃរបស់អតីតមេបក្សប្រឆាំងថាក់ស៊ីន ស៊ីណាវ៉ាត្រា បានឡើងកាន់អំណាចជំនួសវិញក្នុងសម្ព័ន្ធភាពជាមួយគណបក្សដែលគាំទ្រដោយយោធា។
លោក ពីតា លឹមចារុងរ៉ាត ក៏កំពុងប្រឈមមុខនឹងដំណើរការក្តីក្នុងសំណុំរឿងមួយទៀតនៅតុលាការធម្មនុញ្ញដែលរារាំងគាត់ពីការធ្វើនយោបាយក្រោមហេតុផលថាមានកាន់កាប់ភាគហ៊ុននៅក្នុងក្រុមហ៊ុនប្រព័ន្ធផ្សព្វផ្សាយដែលផ្ទុយនឹងច្បាប់បោះឆ្នោតសម្រាប់សភាថៃ៕
ប្រភព៖ AFP/mi