ប្រែសម្រួល៖ កញ្ញាស្រីស្រស់
កាលពីថ្ងៃព្រហស្បតិ៍ក្រុមហ៊ុន Nike បានព្យាករលើការចំណាយរបស់អ្នកប្រើប្រាស់ដោយធ្វើការកាត់បន្ថយការលក់ផលិតផលប្រចាំឆ្នាំរបស់ខ្លួនលើអាជីវកម្មអនឡាញនិងការផ្សព្វផ្សាយពាណិជ្ជកម្មឲ្យសមស្របតាមទិដ្ឋភាពជាក់ស្តែងនៃតម្រូវការដោយបាននិយាយថា ខ្លួនគ្រោងនឹងកាត់បន្ថយការផ្គត់ផ្គង់សិទ្ធិផ្តាច់មុខលើផលិតផលសំខាន់ៗដើម្បីគ្រប់គ្រងការចំណាយ ដោយបានទម្លាក់ភាគហ៊ុនរបស់ខ្លួនធ្លាក់ចុះមកនៅត្រឹម ១១ ភាគរយ។
ក្រុមហ៊ុនបាននិយាយថា ខ្លួនកំពុងខិតខំសន្សំប្រាក់ឲ្យបានចំនួន ២ ពាន់លានដុល្លារនៅក្នុងរយៈពេល ៣ ឆ្នាំខាងមុខ តាមរយៈការរឹតបន្តឹងការផ្គត់ផ្គង់ផលិតផល កាត់បន្ថយសេវាគ្រប់គ្រងតាមរយ:បង្កើនស្វ័យសកម្មនិងកែលម្អចង្វាក់ផ្គត់ផ្គង់របស់ខ្លួន។
ផ្នែកលក់ដុំរបស់ក្រុមហ៊ុន Nike ទទួលរងសម្ពាធជាបន្តបន្ទាប់ ខណៈដែលអ្នកលក់រាយរក្សាការរឹតបន្តឹងលើការរក្សាស្តុកផលិតផល និងដាក់ការបញ្ជាទិញតិចជាងមុនដោយសារតែអ្នកប្រើប្រាស់បានកាត់បន្ថយការចំណាយធ្វើឲ្យមានផលប៉ះពាល់ដល់អាជីវកម្មឌីជីថលរបស់ខ្លួនផងដែរ។
Nike CFO Matthew Friend បាននិយាយថា “យើងកំពុងសំឡឹងមើលលើនិន្នាកាប្រែប្រួលរបស់អ្នកប្រើប្រាស់នៅជុំវិញពិភពលោកដោយយកចិត្តទុកដាក់បំផុត ” គេបន្ថែមថា បើទោះបីជាមានកំណើនអតិថិជននៅតាមហាងក៏ដោយ ក៏ក្រុមហ៊ុននៅតែមើលឃើញសកម្មភាពផ្សព្វផ្សាយនៅក្នុងអាជីវកម្មឌីជីថលរបស់ខ្លួននៅមានកម្រិតនៅឡើយ។
ក្រុមហ៊ុនបានព្យាករថាប្រាក់ចំណូលពេញមួយឆ្នាំនឹងកើនឡើងប្រហែល ១ ភាគរយគឺធ្លាក់ចុះជាងពីការព្យាករកាលពីលើកមុនដែលថាកំណើនមានភាគរយច្រើនជាងនេះ។ យោងតាមទិន្នន័យរបស់ LSEG អ្នកវិភាគបានរំពឹងថានឹងមានកំណើនដល់ទៅ ៣.៣ ភាគរយ។
អ្នកវិភាគភាគហ៊ុនជាន់ខ្ពស់នៅ Morningstar លោក David Swartz បាននិយាយថា “ក្រុមហ៊ុន Nike កំពុងនិយាយអំពីការកាត់បន្ថយចំនួនផលិតផលប្រហែលជាក្រុមហ៊ុនមានអារម្មណ៍ថាមានផលិតផលច្រើនពេកដែលមិនមានប្រាក់ចំណេញខ្ពស់ ហើយពិបាកលក់ចេញ” ។
ក្រុមហ៊ុន Nike រំពឹងថានឹងមានការសន្សំប្រាក់ចាប់ពី ៤០០ លានដុល្លារទៅ ៤៥០ លានដុល្លារពីការចំណាយលើការរៀបចំរចនាសម្ព័ន្ធនៅមុនដំណាច់ឆ្នាំសារពើពន្ធ ដែលជាកត្តាពាក់ព័ន្ធចម្បងជាមួយនឹងការចំណាយលើការបែងចែកបុគ្គលិកនៅក្នុងត្រីមាសទីបី។
ការលក់នៅក្នុងប្រទេសចិនមានការកើនឡើង ៤ ភាគរយនៅត្រឹមត្រីមាសទីពីរដែលបង្ហាញពីការធ្លាក់ចុះតិចតួចក្រោម ៥ ភាគរយធៀបនឹងត្រីមាសទី ១ ដែលបង្ហាញថាតម្រូវការនៅមិនទាន់មានស្ថិរភាពនៅឡើយនៅលើទីផ្សារ។
ក្រុមហ៊ុនបានប្រកាសពីប្រាក់ចំណូលសរុបចំនួន ១៣.៣៩ពាន់លានដុល្លារក្នុងត្រីមាសទីពីរ ដែលនៅក្រោមការព្យាករ ១៣.៤៣ ពាន់លានដុល្លារ។
ភាគហ៊ុនរបស់ Nike បានកើនឡើងតិចជាង ៥ ភាគរយនៅឆ្នាំនេះ ធៀបនឹងកំណើន ២៤ ភាគរយនៅក្នុងសន្ទស្សន៍ S&P 500 និង ភាគរយធៀបនឹងគូប្រជែង Adidas មាន ៥២.៥ ៕
ប្រភព៖ Reuters