ប្រែសម្រួល៖ កញ្ញាស្រីស្រស់
កាលពីថ្ងៃព្រហស្បតិ៍ ២១ ធ្នូ ប្រភពការទូតបាននិយាយថា ក្រុមប្រឹក្សាសន្តិសុខអង្គការសហប្រជាជាតិ បានលើកពេលបោះឆ្នោតជាថ្មីម្តងទៀតក្នុងការគាំទ្រសេចក្តីសម្រេចលើសង្គ្រាមរវាងក្រុមហាម៉ាសនិងអ៊ីស្រាអែលដែលត្រូវបានពន្យារពេលជាច្រើនលើកមកហើយ។
ការពន្យារពេលរហូតដល់ថ្ងៃសុក្របានកើតឡើងដោយសារតែសហរដ្ឋអាមេរិកបានជំទាស់នឹងខ្លឹមសាមួយចំនួនក្នុងអំឡុងពេលធ្វើសេចក្តីព្រាងលើសេចក្តីសម្រេចដោយនិយាយថាខ្លួនត្រៀមខ្លួនរួចជាស្រេចដើម្បីគាំទ្រលើសេចក្តីសម្រេចនេះ។
បន្ទាប់ពីការពន្យារពេលអស់ជាច្រើនថ្ងៃ សេចក្តីព្រាងចុងក្រោយបង្អស់ដែលដកស្រង់ដោយ AFP បានអំពាវនាវឲ្យមាន “ការអនុញ្ញាតជាបន្ទាន់ឲ្យក្រុមមនុស្សធម៌ធ្វើសកម្មភាពប្រកបដោយសុវត្ថិភាព និងគ្មានការរារាំងហើយថែមទាំងបង្កើតលក្ខខណ្ឌសម្រាប់ការបញ្ចប់ជម្លោះប្រកបដោយនិរន្តរភាព” តែមិនបានអំពាវនាវឲ្យមានការបញ្ចប់ការប្រយុទ្ធគ្នាភ្លាមៗនោះទេ។
ឯកអគ្គរដ្ឋទូតអង្គការសហប្រជាជាតិរបស់ទីក្រុងវ៉ាស៊ីនតោនលោកស្រី Linda Thomas-Greenfield បានប្រាប់អ្នកយកព័ត៌មានថា “ប្រសិនបើដំណោះស្រាយត្រូវបានដោះទៅមុខ នោះយើងអាចគាំទ្រវាបាន”។
លោកស្រីបានបដិសេធចំពោះការលុបចោលខ្លឹមសាមួយចំនួនក្នុងសេចក្តីព្រាងលើសេចក្តីសម្រេចនេះ។
លោកស្រីបានបន្តថា សេចក្តីព្រាងលើសេចក្តីសម្រេចនេះគឺជាដំណោះស្រាយដ៏រឹងមាំមួយដែលត្រូវបានគាំទ្រយ៉ាងពេញទំហឹងដោយក្រុមប្រទេសអារ៉ាប់។
ជម្លោះការទូតនៅទីស្នាក់ការអង្គការសហប្រជាជាតិក្នុងទីក្រុង Manhattan បណ្តាលឲ្យការបោះឆ្នោតត្រូវបានពន្យារពេលជាច្រើនដងនៅក្នុងសប្តាហ៍នេះ ធ្វើឲ្យស្ថានការណ៍កាន់តែយ៉ាប់យ៉ឺននៅក្នុងតំបន់ហ្គាហ្សា និងអ្នកស្លាប់មានចំនួនកាន់តែកើនឡើង។
អ្នកវិភាគ International Crisis Group លោក Richard Gowan បាននិយាយថា “មើលទៅសហរដ្ឋអាមេរិកទំនងជាទាញយកការគាំទ្រពីសមាជិកក្រុមប្រឹក្សាសន្តិសុខផ្សេងទៀតដើម្បីជៀសវាងការវេតូ ប៉ុន្តែជាលទ្ធផលមើលទៅទំនងជានៅខ្សោយ” ។
អេមីរ៉ាតអារ៉ាប់រួមកំពុងគាំទ្រសេចក្តីសម្រេចលើជម្លោះដែលត្រូវបានធ្វើវិសោធនកម្មលើផ្នែកសំខាន់ៗមួយចំនួនដើម្បីធានាបានដល់ការសម្របសម្រួលលើការអនុវត្តយន្តការជាក់ស្តែង នេះបើយោងតាមសេចក្តីព្រាងច្បាប់ដែលដកស្រង់ដោយ AFP ។
ការទាមទារឲ្យភាគីទាំងអស់ “អនុញ្ញាត និងសម្របសម្រួលការប្រើប្រាស់ផ្លូវទៅកាន់តំបន់ហ្គាហ្សាស្ទ្រីបទាំងមូល រួមទាំងច្រកព្រំដែនសម្រាប់ការផ្តល់ជំនួយមនុស្សធម៌” ។
អ៊ីស្រាអែលបានទម្លាក់គ្រាប់បែកលើច្រកចេញចូលសម្រាប់ផ្តល់ជំនួយដែលទើបនឹងបើកឡើងវិញកាលពីថ្ងៃព្រហស្បតិ៍ អាជ្ញាធរហាម៉ាសបានអះអាងដូច្នេះ។
សមាជិកក្រុមប្រឹក្សាសន្តិសុខដែលមានសមាជិក១៥នាក់បានកំពុងពុះពារធ្វើការជាច្រើនថ្ងៃដើម្បីស្វែងរកចំណុចរួមលើសេចក្តីសម្រេចនេះ។
- ស្ថានភាពពោរពេញដោយការ “អស់សង្ឃឹម”
អ៊ីស្រាអែលដែលគាំទ្រដោយសម្ព័ន្ធមិត្តរបស់ខ្លួនគឺសហរដ្ឋអាមេរិកបានប្រឆាំងនឹងពាក្យ “បទឈប់បាញ់” ហើយក្រុងវ៉ាស៊ីនតោនបានប្រើវ៉េតូពីរដងដើម្បីរារាំងសេចក្តីសម្រេចដែលប្រឆាំងដោយអ៊ីស្រាអែលចាប់តាំងពីសង្រ្គាមចាប់ផ្តើម។
កាលពីថ្ងៃពុធនាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយថា នឹងមិនមានបទឈប់បាញ់នៅក្នុងតំបន់ Gaza រហូតដល់មាន “ការលុបបំបាត់” ក្រុមហាម៉ាសចោលទាំងស្រុង។
ភាពរង្គោះរង្គើការទូតបានកើតឡើងនៅចំពេលដែលអ្នកឃ្លាំមើលការអត់ឃ្លានរបស់អង្គការសហប្រជាជាតិបានព្រមានថា “មនុស្សគ្រប់រូបនៅក្នុងតំបន់ហ្គាហ្សាដែលហែកហួរដោយសង្រ្គាម ត្រូវបានព្យាករណ៏ថានឹងប្រឈមមុខនឹងអសន្តិសុខស្បៀងកម្រិតខ្ពស់ក្នុងរយៈពេលប្រាំមួយសប្តាហ៍ខាងមុខ”។
លោក Stephane Dujarric អ្នកនាំពាក្យរបស់អង្គការសហប្រជាជាតិ បាននិយាយថា “កម្មវិធីស្បៀងអាហារពិភពលោកបាននឹងកំពុងចាត់ទុកសន្តិសុខស្បៀងស្ថិតនៅក្នុងស្ថានភាពអស់សង្ឃឹម ហើយគ្មាននរណាម្នាក់នៅក្នុងតំបន់ហ្គាហ្សាមានសុវត្ថិភាពនោះទេ។ នោះហើយជាមូលហេតុដែលយើងទាំងអស់គ្នាបានអំពាវនាវឲ្យមានបទឈប់បាញ់មួយក្នុងហេតុផលមនុស្សធម៌ជាបន្ទាន់” ។
ក្រុមហាម៉ាសបានឆ្មក់ចូលទឹកដីអ៊ីស្រាអែលកាលពីថ្ងៃទី ៧ ខែតុលា ដោយបានសម្លាប់មនុស្សប្រហែល ១,១៤០ នាក់ ដែលភាគច្រើនជាជនស៊ីវិល នេះបើយោងតាមការបូកសរុបរបស់ AFP ដោយផ្អែកលើតួលេខរបស់អ៊ីស្រាអែល។
អ៊ីស្រាអែលបានឆ្លើយតបជាមួយនឹងការវាយប្រហារតាមអាកាស និងទ័ពថ្មើរជើងឥតឈប់ឈរ។ ការិយាល័យផ្សព្វផ្សាយព័ត៌មានរបស់រដ្ឋាភិបាលហាម៉ាសនៅតំបន់ហ្គាហ្សាស្ទ្រីបបាននិយាយកាលពីថ្ងៃពុធថាមនុស្សយ៉ាងហោចណាស់ ២០.០០០ នាក់ត្រូវបានសម្លាប់ក្នុងនោះមានកុមារ ៨.០០០ នាក់ និងស្ត្រី ៦.២០០ នាក់៕
ប្រភព៖ AFP/rc