ប្រែសម្រួល៖ រតនា
សិង្ហបុរី៖ ក្រុមហ៊ុនអាកាសចរណ៍សិង្ហបុរី (SIA) នឹងចាប់ផ្តើមបើកដំណើរការជើងហោះហើរអចិន្ត្រៃយ៍រវាងសិង្ហបុរី និងអាកាសយានដ្ឋាន Gatwick នៃទីក្រុងឡុងដ៍ចាប់ពីខែមិថុនា ឆ្នាំ ២០២៤ខាងមុខនេះតទៅ។
កាលពីថ្ងៃចន្ទទី១៨ ធ្នូ ក្រុមហ៊ុនអាកាសចរណ៍បានថ្លែងនៅក្នុងសេចក្តីប្រកាសព័ត៌មាន ថាសេវាកម្មហោះហើរនឹងដំណើរការ ៥ លើកនៅក្នុងមួយសប្តាហ៍។
រួមជាមួយនឹងសេវាប្រចាំថ្ងៃ ៤ ដងនាពេលបច្ចុប្បន្នសម្រាប់ជើងហោះហើរទៅកាន់អាកាសយានដ្ឋាន Heathrow ទីក្រុងឡុងដ៏ដែលនឹងមានជើងហោះហើរសរុបទៅកាន់ទីក្រុងឡុងដ៍ដល់ទៅ ៣៣ លើកប្រចាំសប្តាហ៍នាពេលបច្ចុប្បន្ន។
ក្រុមហ៊ុនអាកាសចរណ៍សិង្ហបុរី (SIA) បាននិយាយថា សំបុត្រសម្រាប់ជើងហោះហើររបស់ SIA ទៅកាន់អាកាសយានដ្ឋាន Gatwick នៃទីក្រុងឡុងដ៍ នឹងត្រូវបានចេញជាបណ្តើរៗសម្រាប់លក់តាមរយៈបណ្តាញចែកចាយផ្សេងៗចាប់ពីថ្ងៃអង្គារនេះតទៅហើយ។
SIA បាននិយាយថា តាមបទប្បញ្ញត្តិ ជើងហោះហើរ SQ310 ពីសិង្ហបុរីនឹងដំណើរការនៅក្នុងថ្ងៃចន្ទនេះ និង ព្រហស្បតិ៍ សុក្រ សៅរ៍ និងថ្ងៃអាទិត្យជាបន្តបន្ទាប់ ដោយបន្ថែមថាជើងហោះហើរដំបូងនឹងចាកចេញពីសិង្ហបុរីនៅថ្ងៃទី ២១ ខែមិថុនា ឆ្នាំ ២០២៤ នៅវេលាម៉ោង ១១:៥៥ យប់។
ជើងហោះហើរត្រឡប់មកវិញ SQ309 -ពីអាកាសយានដ្ឋាន Gatwick នឹងដំណើរការនៅថ្ងៃចន្ទ អង្គារ សុក្រ ថ្ងៃសៅរ៍ និងថ្ងៃអាទិត្យ ដោយជើងហោះហើរដំបូងនឹងចេញដំណើរនៅថ្ងៃទី ២២ ខែមិថុនា ឆ្នាំ ២០២៤ នៅម៉ោង ១០.១៥ នាទីព្រឹក ម៉ោងក្នុងស្រុក។
ជើងហោះហើរនេះនឹងមកដល់ប្រទេសសិង្ហបុរីនៅថ្ងៃទី ២៣ ខែមិថុនា ឆ្នាំ ២០២៤វេលាម៉ោង ៦.២០ ព្រឹក។
SIA បាននិយាយថា ការមកដល់ពេលព្រឹកព្រលឹមនឹងផ្តល់ឲ្យអតិថិជននូវជម្រើសក្នុងការតភ្ជាប់ទៅកាន់ជើងហោះហើរ SIA និង Scoot ទៅកាន់គោលដៅនាៗនៅទូទាំងអាស៊ីអាគ្នេយ៍ អូស្ត្រាលី និងនូវែលសេឡង់ជាដើម។
SIA នឹងប្រើប្រាស់យន្តហោះប្រភេទ Airbus A350-900 របស់ខ្លួនសម្រាប់ការហោះហើរទៅកាន់អាកាសយានដ្ឋាន Gatwick របស់ទីក្រុងឡុងដ៍ ដែលមានកៅអីអង្គុយចំនួន ២៥៣ នៅក្នុងថ្នាក់កាប៊ីនចំនួនបី។
វាបានបន្ថែមថា វានឹងមានកៅអីចំនួន ៤២ ក្នុងថ្នាក់ Business Class ២៤ កៅអីក្នុង Premium Economy Class និង ១៨៧ កៅអីក្នុង Economy Class។
ការបន្ថែមព្រលានយន្តហោះ Gatwick បង្កើនចំនួនគោលដៅអឺរ៉ុបនៅក្នុងបណ្តាញ SIA ដល់ ១៤ ។
ជាមួយនឹងការណែនាំនៃសេវាកម្មថ្មី “អតិថិជននឹងមានជើងហោះហើរបន្ថែមដើម្បីជ្រើសរើសនៅពេលហោះហើររវាងប្រទេសសិង្ហបុរី និងចក្រភពអង់គ្លេស” លោក Dai Haoyu អនុប្រធានជាន់ខ្ពស់ស្តីទីនៃ SIA នៃផែនការទីផ្សារបាននិយាយយ៉ាងដូច្នេះ។
លោកបានបន្ថែមថា “វាក៏ជាជម្រើសក្នុងការធ្វើដំណើរបន្ថែមទៅកាន់ចំណុចផ្សេងៗទៀតនៅក្នុងទ្វីបអឺរ៉ុប និងតំបន់អាស៊ីប៉ាស៊ីហ្វិកផងដែរ”។
លោក Stewart Wingate នាយកប្រតិបត្តិនៃទីក្រុងឡុងដ៍ Gatwick បាននិយាយថា ផ្លូវហោះហើរថ្មីនេះនឹង “ផ្តល់នូវសក្តានុពលនៃការតភ្ជាប់ដ៏ធំ មិនត្រឹមតែទៅកាន់គោលដៅដ៏អស្ចារ្យរបស់សិង្ហបុរីប៉ុណ្ណោះទេ ប៉ុន្តែកាន់តែទូលំទូលាយនៅទូទាំងអាស៊ីអាគ្នេយ៍ អូស្ត្រាលី និងនូវែលសេឡង់”៕
ប្រភព៖ CNA/fh(rj)