ដោយ៖ អាឡិចសាន់ឌឺ ហ៊ីល
លោក ពូទីន មានការជឿជាក់ថាខ្លួននឹងឈ្នះការបោះឆ្នោតប្រធានាធិបតីឆ្នាំ ២០២៤ ដែលជាអាណត្តិប្រធានាធិបតីរុស្ស៊ីទីប្រាំរបស់គាត់។ លោក វ្ល៉ាឌីមៀ ពូទីន បានប្រកាសថា លោកមានមហិច្ឆតាឈរឈ្មោះក្នុងការបោះឆ្នោតប្រធានាធិបតីនៅឆ្នាំ ២០២៤ខាងមុខនេះ សម្រាប់អាណត្តិប្រធានាធិបតីរុស្ស៊ីទីប្រាំ។
រឿងនេះមានការភ្ញាក់ផ្អើលតិចតួចដោយហេតុថាលោកពូទីនបានដឹកនាំប្រទេសរុស្ស៊ីអស់រយៈពេល ២៤ ឆ្នាំរួចមកហើយបើតាមការស្ទង់មតិបានបង្ហាញថាសង្រ្គាមដែលកំពុងបន្តនៅក្នុងប្រទេសអ៊ុយក្រែនបានជំរុញឲ្យពលរដ្ឋរុស្សីបន្តការគាំទ្រដល់រូបគាត់។
អ្នកបោះឆ្នោតរុស្ស៊ីនៅមជ្ឈមណ្ឌល Levada បានធ្វើការស្ទង់មតិកាលពីខែកញ្ញាអំពីនិន្នាការរបស់ពលរដ្ឋរុស្ស៊ីចំពោះបញ្ហាសង្គ្រាមនៅអ៊ុយក្រែន។ នៅក្នុងពេលដែលត្រូវបានសួរថាតើពួកគេគាំទ្រសង្រ្គាមស្ស៊ីនៅអ៊ុយក្រែនដែរឬទេ ៧៣ ភាគរយនៃអ្នកឆ្លើយតបបាននិយាយថា “គាំទ្រ” ។ នៅក្នុងខែកុម្ភៈ ឆ្នាំ ២០២២ ដែលជាខែនៃការលុកលុយរបស់រុស្ស៊ីចូលទៅក្នុងទឹកដីអ៊ុយក្រែន៦៨ ភាគរយបានគាំទ្រ។
អ្នកខ្លះប្រហែលជាមានការសង្ស័យចំពោះការបោះឆ្នោតក្នុងប្រទេសរុស្ស៊ី ប៉ុន្តែមានរឿងដែលគួរកត់សម្គាល់ថា តួលេខទាំងនេះគឺបានមកពីអង្គការមួយដែលត្រូវបានរដ្ឋាភិបាលរុស្ស៊ីចាត់ទុកថាជា “ភ្នាក់ងាររបស់បរទេស”។ គឺមិនសំខាន់ទេថាអ្នកណាជាអ្នកបោះឆ្នោតបើតាមទិន្នន័យបង្ហាញថាប្រជាជនរុស្ស៊ីភាគច្រើនគាំទ្រសង្គ្រាមប្រឆាំងអ៊ុយក្រែន។
បើតាមការស្ទង់មតិថ្មីៗបន្ថែមទៀតដោយមូលនិធិទស្សនៈសាធារណៈរបស់រុស្ស៊ីបានបង្ហាញថាប្រហែល ៧៨ ភាគរយនៃប្រជាជនរុស្ស៊ីបានគាំទ្រលើការដឹកនាំរបស់លោកពូទីន។
តែក៏មានសញ្ញាបង្ហាញពីការធ្លាក់ចុះនៃការគាំទ្រចំពោះការបន្តធ្វើសង្រ្គាមរបស់លោកពូទិននៅអ៊ុយក្រែន នៅចុងឆ្នាំ ២០២២។ នៅក្នុងរដូវស្លឹកឈើជ្រុះឆ្នាំ ២០២២ រដ្ឋាភិបាលរុស្ស៊ីបានចាប់ផ្តើមបញ្ជូនទ័ពបម្រុងដ៏សំខាន់ដើម្បីវាយលុកយកជ័យជំនះនៅលើសមរភូមិអ៊ុយក្រែនទីមួយគឺហ។ហ៊ុមព័ទ្ធទីក្រុង Kyiv និងបន្ទាប់មកវាយយកក្រុង Kharkhiv ។ កត្តានេះហើយបាននាំឲ្យយុវជនរុស្សីជាច្រើនរត់ចេញពីប្រទេស ដើម្បីគេចពីកំណែនកងទ័ព។
ក្រោយមកកងកម្លាំងរុស្ស៊ីថមថយកម្លាំងប្រយុទ្ធហើយក៏បានដកថយពីទីតាំងឈរជើងដ៏រឹងមាំរបស់ពួកគេនៅច្រាំងខាងលិចនៃទន្លេ Dnipro នៅ Kherson ។ ភាពមិនអំណោយផលក្នុងការធ្វើសង្គ្រាមក្នុងទឹកដីអ៊ុយក្រែនបានបង្កឲ្យពលរដ្ឋរុស្សីមិនពេញចិត្តជាមួយនឹងស្ថានភាពនេះ។នៅក្នុងខណ:ពេលដែលខ្ញុំបានទៅទស្សនាក្រុងម៉ូស្គូ និង Murmansk កាលពីខែតុលា ឆ្នាំ ២០២២ ប្រជាជនរុស្ស៊ីបានបង្ហាញពីទស្សន:មួយចំនួនទាក់ទងនឹងការបោះឆ្នោតដោយលើកឡើងពីបញ្ហាសង្គ្រាមរបស់រុស្សីបដែលកំពុងធ្លាក់ក្នុងស្ថានមួយមិនច្បាស់លាស់។
រដ្ឋាភិបាលរុស្ស៊ីមិនលើកលែងចំពោះអ្នកចេញមុខប្រឆាំងជាសាធារណៈលើបញ្ហាសង្រ្គាមនៅអ៊ុយក្រែន ឬនិយាយាប៉ះពាល់ដល់នយោបាយធ្វើសង្រ្គាមរបស់លោកពូទីន។ កត្តាទាំងនេះគឺជាហេតុផលរួមនាំឲ្យមានផលប៉ះពាល់មួយចំនួនលើប្រជាប្រិយភាពរបស់លោកពូទិនសម្រាប់ការបោះឆ្នោត។ ការបរាជ័យរបស់កងទ័ពអ៊ុយក្រែនក្នុងការវាយលុកនៅរដូវក្តៅបានជម្រុញឲ្យមានទំនុកចិត្តតិចតួចឡើងវិញពីពលរដ្ឋរុស្សី។ រឿងដ៏រសើបជាងនេះទៅទៀតនោះគឺរដ្ឋាភិបាលរុស្ស៊ីនៅតែរក្សាការសម្ងាត់នូវចំនួនទាហានរុស្ស៊ីដែលត្រូវបានសម្លាប់នៅអ៊ុយក្រែន។
ខ្ញុំបានរកឃើញបញ្ហាមួយចំនួននៅក្នុងអំឡុងពេលដែលស្នាក់នៅក្នុងទីក្រុងមូស្គូ និង Ryazan ក្នុងខែវិច្ឆិការដោយមើលឃើញថាមានពលរដ្ឋរុស្ស៊ីវ័យចំណាស់ជាច្រើន ជាពិសេសមកពីមជ្ឈដ្ឋានខុសៗគ្នាបានបង្ហាញពីការគាំទ្រដល់គោលនយោបាយធ្វើសង្រ្គាមរដ្ឋាភិបាលរុស្ស៊ី។
- អធិប្បាយអំពីការគាំទ្រនយាបាយធ្វើសង្គ្រាមរបស់រុស្សី
ដោយសារតែមានការរួបរួមគ្នាគាំទ្រគោលនយោបាយរដ្ឋាភិបាលរុស្ស៊ីក្នុងការឆ្លើយតបនឹងសង្គ្រាមភូមិសាស្ត្រនយោបាយរបស់លោកខាងលិចដែលជាកត្តាចម្បងជំរុញឲ្យមានសង្រ្គាមផ្ទុះឡើង។
ពលរដ្ឋរុស្ស៊ីភាគច្រើនប្រាកដជាទទួលយកការបកស្រាយរបស់រដ្ឋាភិបាលលើដើមចមនៃសង្គ្រាមនេះ។ ហេតុផលទាំងនោះមិនដូចទស្សន:របស់ពួកគេដែលបានធ្វើការឆ្លុះបញ្ចាំងលើបញ្ហាពាក់ព័ន្ធនឹងសង្រ្គាមនៅក្នុងខែកុម្ភៈ ឆ្នាំ ២០២២ នោះទេ។
បកមកនិយាយចាប៉ពីខែកុម្ភៈឆ្នាំ ២០២២ គឺរុស្ស៊ីបានចាប់ផ្តើមធ្វើសង្រ្គាមនៅលើទឹកដីអ៊ុយក្រែនដោយយកលេសថារុស្ស៊ីការពារសិទ្ធិជនជាតិភាគតិចរុស្ស៊ីដែលបំបែកខ្លួននៅតំបន់ Donbas និងប្រឆាំងការឈ្លានពានរបស់ណាតូចូលទៅក្នុងទឹកដីអតីតអវកាសសូវៀត។ “de-Nazification” នៃភាគខាងកើតអ៊ុយក្រែនក៏ត្រូវបានរងការវាយប្រហារផងដែរ។
ការការពារសិទ្ធិជនជាតិភាគតិចរុស្ស៊ីនៅភាគខាងកើតអ៊ុយក្រែនបានឆ្លុះបញ្ចាំងយ៉ាងច្បាស់នូវការគាំទ្រក្នុងកម្រិតមួយដោយសារតែប្រជាជនរុស្ស៊ីមានការជឿជាក់លើដើមចមនៃសង្រ្គាមនេះ។ ក៏ប៉ុន្តែបើទោះជាមានការពង្រីកខ្លួនរបស់អង្គការណាតូដែលជាការគំរាមកំហែងមកលើរុស្សីក៏ដោយក៏មិនអាចយកធ្វើជាអំណះអំណាងសម្រាប់ជាដើមចមក្នុងការធ្វើសង្គ្រាមនៅក្នុងពេលនោះទេ។ លើសពីនេះទៀតនោះរុស្សីបានបំផុសគំនិតថ្មីៗដោយចោទលោកខាងលិចថាកំពុងលាក់ពុតដើម្បិកំចាត់រុស្សីនិងឈានទៅ “លុបបំបាត់” ឥទ្ធិពលអំណាចនយោបាយ និងសេដ្ឋកិច្ចរបស់រុស្ស៊ីនៅក្នុងតំបន់អ៊ីរ៉ុបទាំងមូល។
ទឹកលុយបានដើរតួយ៉ាងសំខាន់ដើម្បីរក្សាលំនឹងនៃការគាំទ្ររបស់កងទ័ពរុស្សី រដ្ឋាភិបាលរុស្ស៊ីបានដំឡើងប្រាក់ឈ្នួលដល់កងទ័ពដើម្បីលើកទឹកចិត្តនិងដើម្បីរក្សាភាពស្មោះត្រង់។ គិតត្រឹមខែកញ្ញាកន្លងទៅ ប្រាក់ឈ្នួលអប្បបរមាប្រចាំខែដែលត្រូវបានផ្តល់ជូនដល់អ្នកដែលចុះឈ្មោះគឺមានចំនួនបីដងនៃមធ្យមភាគរបស់ថវិការជាតិ។ កាលពីខែមិថុនា រដ្ឋាភិបាលបានប្រកាសថាខ្លួននឹងដំឡើងប្រាក់ខែដល់កងទ័ពចំនួន១០,៥ ភាគរយបន្ថែមទៀត។
- ការលាក់ពុតរបស់លោកខាងលិចគ្រាន់តែជាល្បែងក្នុងដៃរុស្ស៊ី
តាមរយៈសកម្មភាពរបស់មហាអំណាចលោកខាងលិចបានបង្កឲ្យមានភាពងាយស្រួលដល់រដ្ឋាភិបាលរុស្ស៊ីក្នុងការលាតត្រដាងពីការលាក់ពុតរបស់លោកខាងលិច។ ការគាំទ្ររបស់លោកខាងលិចដោយមិនងាករេចំពោះសង្គ្រាមរបស់អ៊ីស្រាអែលនៅហ្គាហ្សាជាសញ្ញាបញ្ជាក់ថា សហរដ្ឋអាមេរិកមានស្តង់ដាពីរដូចជាច្បាប់មួយសម្រាប់មិត្តរបស់ខ្លួន និងច្បាប់មួយទៀតសម្រាប់សត្រូវរបស់ខ្លួន។
អ៊ីស្រាអែលដែលគាំទ្រដោយអាមេរិកបាននិងកំពុងសម្លាប់ជនស៊ីវិលក្នុងអត្រាលើសពីអ្វីដែលកម្លាំងរុស្ស៊ីបានធ្វើនៅអ៊ុយក្រែន។ ហើយខណៈពេលដែលមន្ត្រីលោកខាងលិច បានថ្កោលទោសភ្លាមៗចំពោះការវាយប្រហាររបស់រុស្ស៊ីលើជនស៊ីវិលនៅអ៊ុយក្រែន ចំណែកការថ្កោលទោសចំពោះសកម្មភាពរបស់អ៊ីស្រាអែលត្រូវបានបំបិទចោលទៅវិញ។
ជាងនេះទៅទៀតលោកខាងលិចបានដាក់សេដ្ឋកិច្ចរុស្ស៊ីឲ្យនៅឯកោដូច្នេះហើយធ្វើឲ្យការបកស្រាយរបស់រដ្ឋាភិបាលរុស្ស៊ីដែលចោទថាលោកខាងលិចចង់លុបបំបាត់ប្រទេសរុស្ស៊ីចេញពីពិភពលោកនោះគឺវាកាន់តែងាយស្រួលក្នុងការបញ្ចុះបញ្ចូលពលរដ្ឋជាសាធារណៈឲ្យមានការគាំទ្រដល់នយោបាយរបស់រដ្ឋាភិបាលរុស្ស៊ី។
ក្នុងពេលជាមួយគ្នានេះលោកខាងលិចក៏បានធ្វើឲ្យលេចចេញជាកំហុសមួយចំនួនដែលធ្វើឲ្យកាន់តែងាយស្រួលសម្រាប់រដ្ឋាភិបាលរុស្ស៊ីបង្ហាញពលរដ្ឋខ្លួនថាកំពុងប្រយុទ្ធប្រឆាំងនឹងពួកហ្វាស៊ីសនិយមនៅអ៊ុយក្រែន។ ជម្លោះ Yaroslav Hunka ថ្មីៗនេះ នៅក្នុងសភាកាណាដា គឺជាអំណោយផលសម្រាប់រដ្ឋាភិបាលរុស្ស៊ីឃោសនាប្រឆាំងនឹងលោកខាលិច។
- ចំណងសេដ្ឋកិច្ចថ្មី
ការដាក់ទណ្ឌកម្មរបស់លោកខាងលិចដែលមិនធ្លាប់មានពីមុនមកក្នុងគោលបំណងធ្វើឲ្យសេដ្ឋកិច្ចរុស្ស៊ីនៅឯកោពីពិភពលោកហើយចុះខ្សោយដែលជាគន្លឺះធ្វើឲ្យរុស្សីមិនទទួលបានជោគជ័យក្នុងការធ្វើសង្រ្គាមនៅអ៊ុយក្រែន។
ផ្ទុយទៅវិញ វាបានប្រែក្លាយទៅជាការបង្កឲ្យមានភាពច្របូកច្របល់នៅក្នុងប្រទេសលោកខាងលិចហាក់ដូចជាជួយជំរុញឲ្យរុស្ស៊ីបង្កើនទំនាក់ទំនងកាន់តែស៊ីជម្រៅជាមួយចិន និងដៃគូអន្តរជាតិផ្សេងទៀត។
លោកពូទីនបានលើកសរសើរនូវអ្វីដែលលោកហៅថាសមត្ថភាពរបស់រុស្ស៊ីក្នុងការ “ផ្តល់ធនធានធម្មជាតិយ៉ាងពេញលេញដល់ពិភពលោក”។ ខណៈដែលអតិផរណាមានកម្រិតខ្ពស់ ហាងលក់ដូររបស់រុស្ស៊ីនៅតែពេញដដែល ហើយភាពអត់ការងារធ្វើនៅតែមានកម្រិតទាបដូចធម្មតា។ ថ្មីៗនេះ មូលនិធិរូបិយវត្ថុអន្តរជាតិបានបន្ទាបការព្យាករកំណើនសេដ្ឋកិច្ចរបស់ប្រទេសរុស្ស៊ីសម្រាប់ឆ្នាំ ២០២៤ ប៉ុន្តែការព្យាករនោះនៅតែមានអំណោយផលបើធៀបទៅនឹងប្រទេសដូចជាកាណាដា បារាំង អ៊ីតាលី និងចក្រភពអង់គ្លេសជាដើម។
តើគួរឲ្យសរសើរដែរឬទេចំពោះសមត្ថភាពរបស់រុស្ស៊ីក្នុងការទប់ទល់នឹងទណ្ឌកម្មនិងការប្រយុទ្ធប្រឆាំងរបស់លោកខាងលិចនិងណាតូដើម្បីជួយដល់អ៊ុយក្រែនបានប្រែក្លាយទៅជាការរួមចំណែកជួយឲ្យមានការកើនឡើងនូវការគាំទ្រដល់រដ្ឋាភិបាលរុស្សីជាសាធារណៈចំពោះការធ្វើសង្រ្គាមនិងសម្រាប់លោកពូទីនបន្តកាន់អំណាចជាបន្តទៅទៀត។
សូមបញ្ជាក់ថា៖ អាឡិចសាន់ឌឺ ហ៊ីល គឺជាសាស្ត្រាចារ្យផ្នែកប្រវត្តិសាស្ត្រយោធានៅសាកលវិទ្យាល័យកាល់ហ្គារី។ ការអត្ថាធិប្បាយនេះត្រូវបានចេញផ្សាយជាលើកដំបូងនៅលើ The Conversation ។
ប្រភព៖ Others/el