ប្រែសម្រួល៖សហការី
នៅថ្ងៃអង្គារ ១២ ធ្នូ ប្រធានាធិបតីចិន លោក ស៊ី ជីនពីង នឹងបំពេញទស្សនកិច្ចនៅប្រទេសវៀតណាមជាលើកដំបូងក្នុងរយៈពេលប្រាំមួយឆ្នាំកន្លងមកដើម្បីប្រឆាំងនឹងឥទ្ធិពលអាមេរិកដែលកំពុងកើនឡើងជាមួយប្រទេសវៀតណាម។
លោក Xi នឹងជួបជាមួយលោក Nguyen Phu Trong ដែលជាមេដឹកនាំបក្សកុម្មុយនិស្តកំពុងកាន់អំណាច បន្ទាប់ពីបានធ្វើឲ្យប្រសើរឡើងនូវទំនាក់ទំនងការទូតជាមួយក្រុងវ៉ាស៊ីនតោន នៅពេលដែលប្រធានាធិបតីសហរដ្ឋអាមេរិកលោក Joe Biden បានធ្វើទស្សនកិច្ចកាលពីខែកញ្ញាកន្លងទៅ។
ដំណើរទស្សនកិច្ចរបស់លោក Biden គឺជាផ្នែកមួយនៃកិច្ចខិតខំប្រឹងប្រែងរបស់សហរដ្ឋអាមេរិកជុំវិញពិភពលោក ដើម្បីទប់ស្កាត់អំណាចនិងឥទ្ធពលរបស់ចិនដែលកំពុងកើនឡើង និងដើម្បីធានាការផ្គត់ផ្គង់សម្ភារសំខាន់ៗដែលត្រូវការសម្រាប់ការផលិតបច្ចេកវិទ្យាថ្មីទំនើបៗ។
វៀតណាមបានប្រកាន់គោលជំហរជាយូរហើយដោយប្រើប្រាស់វិធីសាស្ត្រនយោបាយ “ការទូតឫស្សី” ដើម្បីរក្សានូវលក្ខខណ្ឌទំនាក់ទំនងល្អជាមួយប្រទេសមហាអំណាចទាំងពីរ។
សហរដ្ឋអាមេរិកបានរួមចំណែកក្នុងការចែករំលែកនូវកង្វល់ដែលកាន់តែកើនឡើងដោយសារការអះអាងរបស់ចិនក្នុងការវាតទីលើសមុទ្រចិនខាងត្បូងដែលបង្កឲ្យមានជាជម្លោះប៉ុន្តែវៀតណាមនៅតែរក្សាទំនាក់ទំនងសេដ្ឋកិច្ចជិតស្និទ្ធជាមួយប្រទេសចិនដដែល ខណៈដែលប្រទេសទាំងពីរនេះកំពុងកាន់អំណាចដោយបក្សកុម្មុយនិស្តដូចគ្នា។
វៀតណាម និងចិនបានឈរនៅលើគោលការណ៏ “ភាពជាដៃគូយុទ្ធសាស្ត្រគ្រប់ជ្រុងជ្រោយ”។ ក្រុងហាណូយ និងក្រុងវ៉ាស៊ីនតោន បានធ្វើឲ្យមានការប្រសើរឡើងនូវទំនាក់ទំនងរវាងប្រទេសទាំងពីរក្នុងកម្រិតដូចគ្នាកាលពីខែកញ្ញា។
អ្នកនាំពាក្យក្រសួងការបរទេសចិន លោក Wang Wenbin បានថ្លែងថា ដំណើរទស្សនកិច្ចនេះនឹងមានការពិភាក្សាអំពី “ការជម្រុញទំនាក់ទំនងរវាងចិននិងវៀតណាមឲ្យកាន់តែស៊ីជម្រៅថែមទៀត”។
លោក Xi ជំរុញវៀតណាមឲ្យចូលរួមជាមួយ “សហគមន៍នៃជោគវាសនារួមគ្នា” របស់គាត់ ដែលជាការកំណត់យ៉ាងច្បាស់លាស់មួយសំដៅទៅលើចក្ខុវិស័យនៃកិច្ចសហប្រតិបត្តិការនាពេលអនាគតលើបញ្ហាសេដ្ឋកិច្ច សន្តិសុខ និងនយោបាយ។
លោក Wang បាននិយាយថា របៀបវារៈសម្រាប់ដំណើទស្សនកិច្ចររបស់លោក Xi រួមមាន “នយោបាយ សន្តិសុខ កិច្ចសហប្រតិបត្តិការជាក់ស្តែង ការបង្កើតវេទិការសាធារណៈ បញ្ហាពហុភាគី និងបញ្ហាដែនសមុទ្រជាដើម”។
លោក Xi នឹងជួបពិភាក្សាជាមួយនាយករដ្ឋមន្ត្រីវៀតណាម Pham Minh Chinh និងប្រធានាធិបតី Vo Van Thuong នៅថ្ងៃពុធនេះដែលនឹងការដាក់កម្រងផ្កានៅលើមឈូសរបស់មេដឹកនាំបដិវត្តហូជីមិញ។
ដំណើរទស្សនកិច្ចរយៈពេលពីរថ្ងៃនេះកើតឡើងនៅចំពេលដែលមានសភាពតានតឹងកំពុងកើនឡើងរវាងចិននិងហ្វីលីពីននៅសមុទ្រចិនខាងត្បូងបន្ទាប់ពីមានការប្រឈមមុខដាក់គ្នារវាងនាវារបស់ប្រទេសទាំងពីនៅលើតំបន់ថ្មប៉ប្រះទឹក។
ប្រទេសហ្វីលីពីនបានអះអាងថា ខ្លួនបានកោះហៅអ្នកការទូតរបស់ចិនកាលពីថ្ងៃចន្ទ ហើយបានព្រមានពីលទ្ធភាពបណ្តេញទូតចិនចេញពីប្រទេស។
វៀតណាម រួមជាមួយម៉ាឡេស៊ី ប្រ៊ុយណេ និងតៃវ៉ាន់ ក៏មានការទាមទារតំបន់ត្រួតស៊ីគ្នានៅសមុទ្រចិនខាងត្បូង។
ក្នុងរយៈពេលមួយទសវត្សរ៍កន្លងមកនេះ ប្រទេសចិនបានពង្រីកការកាន់កាប់ដែនទឹកនៅសមុទ្រចិនខាងត្បូង ដោយបង្កើតកោះយោធា ដែលមានផ្លូវយន្តហោះ កំពង់ផែ និងប្រព័ន្ធរ៉ាដាយោធាដើម។
ក្នុងដំណើរទស្សនកិច្ចរបស់លោក Biden ទៅកាន់វៀតណាមអាមេរិកបានរួមគ្នាធ្វើការព្រមានប្រឆាំងនឹងការគំរាមកំហែងដោយប្រើកម្លាំងបាយរបស់ចិន នៅសមុទ្រចិនខាងត្បូង។
វៀតណាមគឺជារដ្ឋសមាជិកអាស៊ានមួយក្នុងចំណោមសមាជិកអាស៊ានមួយចំនួនដែលមានការខកចិត្តចំពោះការបង្កើតផែនទីផ្លូវការថ្មីមួយរបស់ចិនដែលបានចេញផ្សាយកាលពីខែកញ្ញាបានបង្ហាញពីការកំណត់ដែលអធិបតេយ្យភាពរបស់ចិនលើដែនសមុទ្រដែលសម្បូរដោយធនធានធម្មជាតិស្ទើរតែទាំងស្រុង។
អ្នកវិភាគនិយាយថាក៏ដូចគ្នានឹងដំណើររបស់លោក Biden ក្នុងខែកញ្ញាផងដែរសម្រាប់ លោក Xi វិញអាចនឹងស្វែងរកកិច្ចសហប្រតិបត្តិការកាន់តែជិតស្និទ្ធលើរ៉ែដ៏កម្រសម្រាប់ប្រើក្នុងការផលិតឧបករណ៍បច្ចេកវិទ្យាកម្រឹតខ្ពស់ ដូចជាស្មាតហ្វូន និងអាគុយរថយន្តអគ្គិសនី។
ប្រព័ន្ធផ្សព្វផ្សាយដែលគ្រប់គ្រងដោយរដ្ឋរបស់វៀតណាមបានរាយការណ៍កាលពីខែមុនថា China Rare Earth Group កំពុងស្វែងរកឱកាសដើម្បីធ្វើការជាមួយក្រុមហ៊ុនរុករករ៉ែដ៏ធំរបស់វៀតណាម Vinacomin ។
ចំណែកសហរដ្ឋអាមេរិក និងវៀតណាមកាលពីខែកញ្ញាក៏បានព្រមព្រៀងគ្នាសហការគ្នាដើម្បីជួយទីក្រុងហាណូយក្នុងការបង្កើនបរិមាណអភិវឌ្ឍន៍ធនធានរ៉ែកម្ររបស់ខ្លួន៕
ប្រភព៖ AFP