ប្រែសម្រួល៖ បញ្ញា
![](https://cambodiaflashnews.com/wp-content/uploads/2021/06/top-banner.gif)
តុលាការតួកគីកាលពីថ្ងៃអង្គារបានចេញដីកាចាប់ខ្លួនប្រធានក្លិប Ankaragucu លោក Faruk Koca ពីបទដាល់អាជ្ញាកណ្តាលនៅមុនចុងបញ្ចប់នៃការប្រកួត Super Lig ហើយក៏បានឃាត់ខ្លួនជនសង្ស័យពីរនាក់ផ្សេងទៀតពីបទប្រើហិង្សា។
សហព័ន្ធបាល់ទាត់តូកគី (TFF) បានថ្លែងថា ខ្លួនបានផ្អាកការប្រកួតលីកទាំងអស់ បន្ទាប់ពីឧប្បត្តិហេតុ ដ៏សែនអាម៉ាសនេះបានកើតឡើងនៅពេលដែល Koca បានដាល់អាជ្ញាកណ្តាល Halil Umut Meler ដែលទទួលបន្ទុកការប្រកួតក្នុងប្រទេសរបស់ Ankaragucu ទល់នឹង Rizespor កាលពីថ្ងៃចន្ទកន្លងទៅ។
លោក Yilmaz Tunc រដ្ឋមន្ត្រីក្រសួងយុត្តិធម៌ បាននិយាយថា Koca និងអ្នកពាក់ព័ន្ធក្នុងការប្រើអំពើរហិង្សាពីរនាក់ផ្សេងទៀតត្រូវបានចាប់ខ្លួនពីបទបង្ករបួសស្នាមដល់មន្ត្រីសាធារណៈបន្ទាប់ពីព្រះរាជអាជ្ញាទទួលបានការសារភាពរពីពួកគេ។
Tunc បាននិយាយនៅលើវេទិកាប្រព័ន្ធផ្សព្វផ្សាយសង្គម X ដែលពីមុនត្រូវបានគេស្គាល់ថាជា Twitter ថា “ការស៊ើបអង្កេតក្នុងឧប្បត្តិហេតុនេះកំពុងតែបន្តយ៉ាងយកចិត្តទុកដាក់បំផុត” ។ តុលាការបានចេញដីកាសម្រេចដាក់ជនសង្ស័យបីនាក់បន្ថែមទៀតឲ្យស្ថិតនៅក្រោមការគ្រប់គ្រងរបស់តុលាការ។
បើយោងតាមខ្សែវីដេអូពីទូរទស្សន៍រដ្ឋ TRT បានបង្ហាញឲ្យឃើញថា Koca បានចូលទៅក្នុងទីលានប្រកួត ហើយបានវាយទៅលើ Meler នៅពេលដែលគាត់កំពុងតែផ្លុំកញ្ចែចុងក្រោយបន្ទាប់ពី Rizespor រកបានគ្រាប់បាល់តាមស្មើនៅនាទីទី ៩៧ ក្នុងលទ្ធផលស្មើ ១-១ នៅកីឡដ្ឋាន Eryaman ។
អ្នកគាំទ្រ Ankaragucu បានចូលទៅក្នុងទីលានបន្ទាប់ពីការប្រកួតត្រូវបានបញ្ចប់ហើយ Meler ក៏ត្រូវបានគេទាត់បន្ថែមទៀតក្នុងខណ:ពេលដែលគាត់ដួល នៅទីបំផុតគាត់ត្រូវបានជួយសង្រ្គោះដោយក្រុមប៉ូលិស។
សហព័ន្ធបាននិយាយថា Ankaragucu ដែលមានប្រធានក្លិបនិងអ្នកដែលមានកំហុសក្នុងការវាយតប់លើអាជ្ញាកណ្តាល នឹងត្រូវ “ដាក់ទណ្ឌកម្មក្នុងលក្ខខណ្ឌធ្ងន់ធ្ងរបំផុតតាមដែលអាចធ្វើទៅបាន” ។
ប្រធាន FIFA លោក Gianni Infantino បាននិយាយថា ព្រឹត្តិការណ៍ដែលបានកើតឡើងបន្ទាប់ពីការប្រកួតគឺ “ពិតជាមិនអាចទទួលយកបានទេ”។
លោកបានបន្ថែមថាបើគ្មានអាជ្ញាកណ្តាលសម្រាប់ការប្រកួតក៏គ្មានការលេងបាល់ទាត់ដែរ។
Meler ក្នុងវ័យ ៣៧ ឆ្នាំជាអាជ្ញាកណ្តាលរបស់ FIFA តាំងពីឆ្នាំ ២០១៧ មកបានចូលកាន់តំណែងគ្រប់គ្រងការប្រកួតវគ្គចែកពូលក្នុងក្របខ័ណ្ឌ Champions League របស់ Lazio ជាមួយក្រុម Celtic នៅថ្ងៃទី ២៨ ខែវិច្ឆិកា។
ប្រធានាធិបតីតួកគីលោក Tayyip Erdogan បាននិយាយនៅលើ X ថាកីឡាគឺ “មិនត្រូវប្រើអំពើហិង្សា” ។
យើងនឹងមិនអនុញ្ញាតឲ្យមានអំពើហិង្សាកើតឡើងនៅក្នុងកីឡាតួកគីទៀតទេ។
អាជ្ញាកណ្តាលនៅក្នុងប្រទេសតួកគីតែងតែរងការរិះគន់ដោយអ្នកគ្រប់គ្រងក្លិប និងប្រធានសម្រាប់ការសម្រេចចិត្តរបស់ពួកគេ ប៉ុន្តែកម្រជាគោលដៅនៃការវាយប្រហារដោយហិង្សាណាស់។
ក្រុម Ankaragucu បានឈរលើតារាងលេខរៀងទី ១១ មាន ១៨ ពិន្ទុ ជាប់ចំណាតថ្នាក់លេខ ៣ ក្រោម Rizespor មាន ២២ ពិន្ទុបន្ទាប់ពីការប្រកួតចំនួន ១៥លើក៕
ប្រភព៖ Reuters