ប្រែសម្រួល៖ សហការី
![](https://cambodiaflashnews.com/wp-content/uploads/2021/06/top-banner.gif)
នៅថ្ងៃព្រហស្បតិ៍ ទី៧ ធ្នូ មន្ត្រីអភិរក្សសត្វព្រៃបាននិយាយថា ម៉ាឡេស៊ីបានចាប់ផ្តើមដាក់អន្ទាក់ចាប់យកខ្លាំក្នុងគោលបំណងផ្លាស់ប្តូរទីតាំងរបស់ពួកវាដោយសារតែនៅក្នុងរយៈពេលពីរខែកន្លងមកនេះមានមនុស្សចំនួន៣នាក់ត្រូវបានខ្លាខាំស្លាប់។
ក្នុងប៉ុន្មានសប្តាហ៍ថ្មីៗនេះមន្ត្រីអភិរក្សសត្វព្រៃបានរាយអន្ទាក់ទ្រុងចំនួន ១១ និងកាមេរ៉ាចំនួន ២០ ក្នុងតំបន់ព្រៃនៃស្រុក Gua Musang រដ្ឋ Kelantan ភាគឦសានប្រទេសដែលជាកន្លែងខ្លាបានវាយប្រហារលើមនុស្សកាន់តែច្រើនឡើង។
ប្រធាននាយកដ្ឋានសត្វព្រៃ និងឧទ្យានជាតិក្នុងរដ្ឋ Kelantan លោក Mohamad Hafid Rohani បានប្រាប់ AFP ថា ចាប់តាំងពីឆ្នាំ ២០២១ មកទល់នឹងពេលនេះមានការវាយប្រហារដោយសត្វខ្លាចំនួនប្រាំលើកដែលបណ្តាលឲ្យមនុស្សចំនួន ៤ នាក់បានស្លាប់នៅក្នុង ស្រុក Gua Musang ។
មានការខាំសម្លាប់មនុស្សអស់បីនាក់បានកើតឡើងនៅក្នុងខែតុលា និងខែវិច្ឆិកាឆ្នាំនេះ។
លោក Hafid បាននិយាយថា “យើងមានការព្រួយបារម្ភយ៉ាងខ្លាំងក្រោយបានឮដំណឹងដ៏អាក្រក់បំផុតក្នុងរយៈពេលជាច្រើនទសវត្សរ៍ដែលសត្វខ្លាបានខាំសម្លាប់មនុស្សក្នុងចំនួនច្រើនបែបនេះ។
អន្ទាក់ដែលជាទ្រុងរាងចតុកោណរុំដោយស្លឹកត្នោតដែលស៊ីគ្នានិងស្ថានភាពក្នុងព្រៃត្រូវបានច្នៃឡើងហើយបានដាក់ពង្រាយនៅត្រង់តំបន់ “ក្តៅ” ដែលតែងតែមានការវាយប្រហារដោយសត្វខ្លាជាញឺកញាប់។
មួយកន្លែងទៀតត្រូវបានគេពង្រាយអន្ទាក់ក្នុងចម្ការដូងប្រេង។
ពពែរស់ត្រូវបានគេដាក់បញ្ឆោតខ្លានៅក្នុងទ្រុងមួយនៅក្បែរនោះ ដើម្បីទាក់ទាញសត្វខ្លាឲ្យធំក្លិនហើយធ្លាក់ចូលអន្ទាក់។
ខ្លាប្រភេទ ម៉ាឡេយ៉ាន ត្រូវបានក្រុមការពារសហភាពអន្តរជាតិសម្រាប់ការអភិរក្សធម្មជាតិចាត់ទុកថាជាប្រភេទខ្លាដែលជិតផុតពូជ។
WWF Malaysia ប៉ាន់ប្រមាណថា មានសត្វខ្លាតិចជាង ១៥០ ក្បាលដែលនៅសេសសល់ក្នុងព្រៃ។
Hafid បាននិយាយថាសត្វខ្លាចំនួន ៣៥ ក្បាលត្រូវបានគេប៉ាន់ស្មានថាកំពុងរស់នៅក្នុងរដ្ឋ Kelantan ។
ការវាយប្រហារដោយសត្វខ្លាមកលើមនុស្សគឺកម្រណាស់ ប៉ុន្តែឧប្បត្តិហេតុបែបនេះត្រូវបានគេដឹងថាវាកើតឡើងនៅក្នុងតំបន់ដែលមានការកើនឡើងនូវការរំលោភបំពានលើជម្រករបស់សត្វទាំងនោះ។
លោក Hafid បាននិយាយថាកាលពីខែមុនថា សត្វខ្លាញីមួយក្បាលត្រូវបានជាប់អន្ទាក់ ហើយត្រូវបាននាំយកទៅកាន់មជ្ឈមណ្ឌលសង្គ្រោះសត្វព្រៃជាតិក្នុងរដ្ឋ Perak ដែលនៅជិតនោះ។
ប៉ុន្តែលោក Hafid មិនប្រាកដថាតើសក្វខ្លាញីនេះបានវាយប្រហារលើមនុស្សដែរឬយ៉ាងណានោះទេ”។
“ស្ថានភាពសោកសៅ”
លោក Sik Choon Foo អធិការប៉ូលិសក្រុង Gua Musang បាននិយាយថា មានមនុស្សពីរនាក់ដែលត្រូវបានខ្លាខាំសម្លាប់ចាប់តាំងពីឆ្នាំ ២០២១ ពួកគេជាកម្មករចម្ការ ខណៈដែលអ្នករងគ្រោះផ្សេងទៀតគឺជាអ្នកស្រុក។
លោក Choon Foo បានបញ្ជាក់តាមការពិនិត្យដានជើងរបស់វារួមទាំងការការពិនិត្យលើសាកសពជនរងគ្រោះគេបានដាក់ការសង្ស័យថាខ្លាញីមួយក្បាលនេះជាអ្នកវាយប្រហារលើជនរងគ្រោះ។
លោក Hafid បានបន្តថា សត្វខ្លាញីមួយក្បាល ដែលរងរបួសយ៉ាងធ្ងន់ធ្ងរនៅក្នុងខែកក្កដា ឆ្នាំ ២០២១ ត្រូវបានគេចាប់បានហើយបញ្ជូនទៅកាន់ទីជម្រក។
គាត់បាននិយាយថា ប៉ុន្តែខ្លាមួយក្បាលទៀតបានធ្វើការវាយប្រហារដ៏សាហាវលើមនុស្សនៅក្នុងខែមករា ឆ្នាំ ២០២២ ត្រូវបានគេបាញ់សម្លាប់ បន្ទាប់ពីវាបានហក់សំដៅទៅរកមន្ត្រីអភិរក្សសត្វព្រៃ។
មន្ត្រីអភិរក្សសត្វព្រៃបានព្រមានអ្នកស្រុកឲ្យនៅក្នុងផ្ទះ ឬប្រសិនបើចេញទៅក្រៅត្រូវដើរជាក្រុម។
សត្វខ្លាម៉ាឡាយ៉ាប្រហែល ៣,០០០ ក្បាលធ្លាប់ដើរពាសពេញព្រៃកាលពីទសវត្សរ៍ឆ្នាំ ១៩៥០ ហើយខ្លាធំត្រូវបានចាត់ទុកថាជាសត្វរបស់ជាតិសម្រាប់ប្រទេសម៉ាឡេស៊ី។
ប៉ុន្តែចំនួនសត្វខ្លាបានធ្លាក់ចុះនៅក្នុងរយៈពេលជាច្រើនទសវត្សរ៍កន្លងមកនេះដោយសារការបាត់បង់ទីជម្រកនិងការពង្រីកវិស័យកសិកម្ម ព្រមទាំងការបរបាញ់ផងដែ។
លោក Mark Rayan Darmaraj នាយកសមាគមអភិរក្សសត្វព្រៃ បាននិយាយថា ហេតុផលមួយដែលធ្វើឲ្យខ្លាវាយប្រហារមកលើមនុស្សអាចជាការថយចុះនៃចំនួនជ្រូកព្រៃ ដែលជាចំណីរបស់សត្វខ្លាដ៏សំខាន់មួយ និង ដោយសារជំងឺប៉េស្តជ្រូកអាហ្រ្វិក។
Rayan បាននិយាយថា វិធានការផ្លាស់ទីលំនៅរបស់សត្វខ្លាធំគឺជា “ស្ថានភាពដ៏សោកសៅ” ប៉ុន្តែវាគឺជា “វិធានការជាក់ស្តែងបំផុត” សម្រាប់សត្វដែលត្រូវបានគេដឹងថាជាសត្វកាចសាហាវដែលតែងតែវាយប្រហារ ឬសម្លាប់មនុស្ស និង ដើម្បីរក្សាសត្វសាហាវទាំងនេះឲ្យនៅឆ្ងាយពីមនុស្ស៕
ប្រភព៖ AFP